"ކަރަންޓީން ފެސިލިޓީއަކީ ޖަލެއް ނޫން، ދަނޑިމާރު އަޅައިގެން ބަލަހައްޓާ ތަންތަނެއްވެސް ނޫން"
7 މެއި 2020 | ބުރާސްފަތި 05:27ހެރެތެރެ ރިސޯޓުން ފިލި 5 މީހުން ވަނީ ހައްޔަރުކޮށްފައި
އެސިސްޓެންޓް ކޮމިޝަނަރ އޮފް ޕޮލިސް އަބްދުﷲ ފައިރޫޝް
ކޮވިޑް-19 އާ ގުޅިގެން ރާއްޖޭގައި ޤާއިމު ކުރެވިފައިވާ ކަރަންޓީން ފެސިލިޓީތަކަކީ ޖަލެއް ނޫން ކަމަށާއި، "ދަނޑިމާރު" އަޅައިގެން ބަލަހައްޓާ ތަނެއް ނޫން ކަމަށް އެސިސްޓެންޓް ކޮމިޝަނަރ އޮފް ޕޮލިސް ޢަބްދުﷲ ފައިރޫޝް ވިދާޅުވެއްޖެ އެވެ.
ހެރެތެރެ ރިސޯޓުގައި ކަރަންޓީނު ކޮށްފައި ތިބި މީހުންގެ ތެރެއިން ފަސް ފިރިހެނަކު ފިލާފައި ވަނިކޮށް ފުލުހުން އެމީހުން ހޯދާފައިވާއިރު، ބުދަ ދުވަހުގެރޭ ފައިރޫޝް ކުރެއްވި ޓްވީޓެއްގައި ވިދާޅުވީ، ކަރަންޓީން ފެސިލިޓީތަކަށް ގެންދާ ފަރާތްތަކާއި، އަމިއްލައަށް އެތަންތަނުގައި ތިބެން އެއްބަސްވެގެން ދާ ފަރާތްތަކުގެ ޒިންމާއެއްވެސް އޮންނާނެ ކަމަށެވެ.
އެގޮތުން ކަރަންޓީން ފެސިލިޓީތަކަކީ ޖަލެއް ނޫން ކަމަށާއި، "ދަނޑިމާރު" އަޅައިގެން ބަލަހައްޓާ ތަނެއް ނޫން ކަމަށް ފައިރޫޝް ވަނީ ވިދާޅުވެފައެވެ.
ފައިރޫޝް އިތުރަށް ވިދާޅުވީ، އެހެން މީހުން ނުރައްކަލުގެ ތެރެއަށް ހުށަހަޅާ ފަރާތްތަކަށް އަޅަންޖެހޭ ފިޔަވަޅު ފުލުހުން އަޅާނެކަމަށެވެ.
ކޮވިޑް-19 އާ ގުޅިގެން ރައްކާތެރިކަމުގެ ފިޔަވަޅެއްގެ ގޮތުން އެކި ތަންތަނުގައި ކަރަންޓީން ކުރެވޭ ފަރާތްތައް ކަރަންޓީންގެ އުޞޫލުތަކަށް ބޯނުލަނބާ މައްސަލަތަކެއް މީގެ ކުރިންވެސް ފެންމަތިވެފައިވެއެވެ. އެގޮތުން މީގެ ކުރިން ރިސޯޓުތަކުގައި ކަރަންޓީން ކޮށްފައި ތިބި ބައެއް ފަރާތްތައް ހެލްތު ޕްރޮޓެކްޝަން އޭޖެންސީއާއި، ކަމާބެހޭ ފަރާތްތަކުން އެކުލަވާލާފައިވާ އުޞޫލުތަކާ ޚިލާފަށް ރަށްރަށަށް އަރައިގެން ފުލުހުންގެ ބެލުމުގެ ދަށަށްވެސް ގެންގޮސްފައިވެއެވެ.
