ސާމްޕަލް ދިނުމަށް ދެކޮޅުހުދި 4 ފަރާތެއްގެ މައްޗަށް ކޯޓު އަމުރު ނެރެފި
މިކަމާއި ގުޅިގެން ސިވިލްކޯޓުން 4 އަމުރެއް ނެރެފައިވޭ
ކަރަންޓީނަށް މީހަކު ގެންދިއުމުގެ މަސައްކަތުގައި ފުލުހުން ހަރަކާތްތެރިވަނީ
ކޮވިޑް-19 އަށް ޓެސްޓް ކުރުމަށް ސާމްޕަލް ދޭން ދެކޮޅުހެދި ހަތަރު ފަރާތެއްގެ މައްޗަށް ކޯޓު އަމުރެއް ނެރެފި އެވެ.
މިކަމާއި ގުޅިގެން ސިވިލް ކޯޓުން ބުނެފައިވަނީ، ކޮވިޑް-19 އަށް ޓެސްޓް ކުރުމަށްޓަކައި ސާމްޕަލް ދިނުމަށް ދެކޮޅު ހަދާފައިވާ ހަތަރު ފަރާތެއްގެ މައްޗަށް ސާމްޕަލް ދިނުމަށް އެންގާކަމަށެވެ. އެގޮތުން، ސާމްޕަލް ނަގައިދިނުމަށް ޑިރެކްޓަރ އޮފް ޕަބްލިކް ހެލްތު ކޮށްފައިވާ އަމުރު ތަންފީޒުކުރުމަށް އެކަމުގައި ޝާމިލްވާ ފަރާތްތަކަށާއި ފުލުހުންގެ މައްޗަށް ވަނީ ނެރެފަ އެވެ.
ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 ރާއްޖޭގައި ފެތުރެން ފެށުމާއި ގުޅިގެން، މާލެ ޞަރަޙައްދު ވަނީ ފުރަބަންދު ކޮށްފަ އެވެ. އަދި ހުއްދައާ ނުލާ މީހުން ދިރިއުޅޭ އެއްވެސް ރަށަކުން ލަފާފުރުން މަނާކޮށްފަ އެވެ. މާލެ ޞަރަޙައްދުގެ އިތުރުން، މެދު ރާއްޖެތެރެ އާއި އުތުރުގެ ރަށްތަކަކުން ވަނީ މި ވައިރަސް ފެނިފަ އެވެ.
ކަރަންޓީނަށް ދިއުމާއި ސާމްޕަލްތައް ނަގަން ދެކޮޅު ހެދުމަކީ ޢާންމު ޞިއްޙަތު ރައްކާތެރި ކުރުމުގެ ޤާނޫނުގެ ދަށުން ކުށެކެވެ. ކަރަންޓީނަށް އެމީހަކު ގެންދިއުމުގެ ޢަމުރުތައް ނެރުމުގެ ބާރުވެސް ކޯޓުތަކަށް ލިބިގެން ވެއެވެ. އަދި މިފަދަ ޢާންމު ޞިއްޙަތުގެ ކުއްލި ނުރައްކަލުގެ ޙާލަތުގައި ތެދު މަޢުލޫމާތު ހާމަކުރުމަކީ ހުރިހާ ފަރާތްތަކަށް ވެސް އެޤާނޫނުން ލާޒިމުކުރާ ކަމެކެވެ.
