40،000 ބިދޭސީ މަސައްކަތްތެރިންނަށް އަމާޒުކޮށް، ގުޅީފަޅުގައި 30 ހެކްޓަރު ބިމެއް ހިއްކަނީ

ބިދޭސީ މަސައްކަތްތެރިންނަށް ޢަމާޒުކޮށް، ގުޅީފަޅުގައި 30 ހެކްޓަރުގެ ބިމެއް ހިއްކުމަށް ހަމަޖައްސައިފި އެވެ.

ރަސްމީ ލިޔެކިޔުމެއްނެތް ބިދޭސީ މަސައްކަތްތެރިން ރާއްޖޭގައި އުޅެމުންދާތީ، އާއި މިގޮތަށް ޤަވާއިދާ ޚިލާފަށް އުޅޭ ބިދޭސީންގެ ޖުމުލަ ޢަދަދު ކަށަވަރުކޮށް، އެނގެންނެތް ޢަދަދަކަށްވުމުން، ބިދޭސީ މަސައްކަތްތެރިންގެ ޖުމުލަ ޢަދަދުގެ އިތުރުން، ރަސްމީ ލިޔުމެއްނެތް ބިދޭސީ މަސައްކަތްތެރިންގެ ޖުމުލަ ޢަދަދު ދެނެގަތުމަށް ސަރުކާރުންގެ ކަމާގުޅޭ އިދާރާތަކުން ކުރަމުންދާ ކަންކަން އޮޅުން ފިލުވައި، އެކަންކަން ހަރުދަނާކުރުމަށް ކުރެވެންހުރި ކަންކަން ދެނެގަތުމަށް ރައްޔިތުންގެ މަޖިލީހުގެ ޤައުމީ ސަލާމާތާއި ޚާރިޖީ ގުޅުންތަކުގެ ކޮމެޓީން ދިރާސާކޮށް ނިންމި ގޮތުގެ ރިޕޯޓުގައި ކަމާގުޅޭ މުއައްސަސާތަކުން މައުލޫމާތު ހޯއްދަވާފައި އެވެ.

އެގޮތުން، އިކޮނޮމިކް މިނިސްޓްރީން އެކޮމެޓީއަށް ހިއްސާކޮށްފައިވާ މައުލޫމާތުތަކުގެ ތެރޭގައި، މާލެ ސަރަހައްދާއި ކައިރިން ގުޅީފަޅުގައި 30 ހެކްޓަރުގެ ބިމެއް ހިއްކާ އެތާނގައި "ވަރކަރސް ވިލެޖް" ނަމުގައި ވިލެޖެއް ގާއިމުކޮށް، ގާތްގަނޑަކަށް 40،000 ބިދޭސީ މަސައްކަތްތެރިންނަށް އެފަރާތްތަކުގެ ވެރިފަރާތްތަކުގެ ޚަރަދުގައި ކެއުންބުއިން ލިބޭނެ ފަދަ ގޮތަކަށް އެކޮމަޑޭޝަން ހަމަޖެހިގެންދާނެ ކަމަށެވެ.

މިކަމަކީ، ގާނޫނާއި ގަވާއިދުތަކާ އެއްގޮތަށް ރާއްޖޭގައި މަސައްކަތް ކުރުމުންދާ ފަރާތްތަކުގެ ތެެރެއިން، މާލެ ސަރަހައްދުގައި އުޅޭ ބިދޭސީ މަސައްކަތްތެރިން، މާލެ ސިޓީގައި ތޮއްޖެހިފައި ތިބެންޖެހިފައިވާ، ތިބުން ނިމުމަކަށް ގެނައުމަށްޓަކައި ސަރުކާރުން ހިންގާ މަޝްރޫއެކެވެ.

މިހާރު ރާއްޖޭގައި ފެތުރެމުންދާ ކޮވިޑް-19 ރޯގާއާ ގުޅިގެން އެންމެ ބޮޑު ނުރައްކަލެއް އޮތީވެސް، މާލެ ސިޓީގައި ދިރިއުޅޭ ބިދޭސީ މަސައްކަތްތެރިންގެ ތެރޭގަ އެވެ. މިކަމަށް ހައްލެއް ގެނައުމަށް ސަރުކާރުން މިހާރުވެސް ދަނީ ވަގުތީ ހިޔާތަކެއް ބިދޭސީ މަސައްކަތްތެރިންނަށް ގާއިމު ކޮށްދެމުންނެވެ.

ދެ ލައްކައެއްހާ ބިދޭސީ މަސައްކަތްތެރިން ރާއްޖޭގައި އުޅެމުންދާއިރު، ރަސްމީ ލިޔެކިޔުންނެތް 63،000 އަށްވުރެ ގިނަ ބިދޭސީން ރާއްޖޭގައި އުޅޭކަމަށް ވެއެވެ. ދައުލަތުގެ އެއްވެސް އިދާރާއަކަށް ރާއްޖޭގައި އުޅޭ ބިދޭސީ މަސައްކަތްތެރިންގެ ކަށަވަރު އަދަދެއް ނޭނގެއެވެ.

އިކޮނޮމިކް މިނިސްޓްރީން ކޮމެޓީއަށް ފޯރުކޮށްދީފައިވާ މައުލޫމާތަކަށްބަލާއިރު، ގާނޫނާ ހިލާފަށް ގާނޫނީ އިމުން ބޭރުން ރާއްޖޭގައި މަސައްކަތްކުރާ ނުވަތަ ދިރިއުޅެމުންގެންދާ ބިދޭސީން ގާނޫނީ އިމުގެ ތެރެއަށް ވެއްދުމަށްޓަކައި އެމިނިސްޓްރީ ވަނީ 19 ސެޕްޓެމްބަރު 2019 ގައި "ރެގިއުލަރައިޒޭޝަން" ގެ ނަމުގައި ޕްރޮގްރާމެއް ހިންގާފައި ވެއެވެ.

މިޕްރޮގްރާމްގެ ދަށުން ގާނޫނީ އިމުގެ ތެރެއަށް ވަނުމަށް މިހާތަނަށް 40،000 ބިދޭސީން ރެޖިސްޓްރީ ވެފައިވާ ކަމަށް އެމިނިސްޓްރީން ބުނެފައި ވެއެވެ.

އެ ފަރާތްތަކުގެ ތެރެއިން ގިނަ ފަރާތްތަކުގެ އަތުގައި ކާކުކަން އަންގައިދޭ ލިޔެކިޔުމެއް ނުވަތަ ޕާސްޕޯޓެއް އޮތްނަމަވެސް އެ ޑޮކިއުމެންޓްގެ މުއްދަތު ހަމަވެފައިވާ ކަމަށާއި، ރަސްމީ ސައްހަ ލިޔުމެއް ނެތް ފަރާތްތަކަށް ޕާސްޕޯޓް ހެއްދުމަށް ގިނަ ވަގުތު ބޭނުންވާ ކަމަށް އިކޮނޮމިކް މިނިސްޓްރީން ބުނެ އެވެ.

ގައުމީ ސަލާމަތާއި ޚާރިޖީ ގުޅުންތަކުގެ ކޮމެޓީގެ މި ރިޕޯޓް ބުދަ ދުވަހުގެ ޖަލްސާގައި ފާސްކޮށްފައިވަނީ 69 މެމްބަރުންގެ އިއްތިފާގުންނެވެ.