ބްރެޒިލްގެ ކުރީގެ ފޯވާޑް ރޮނާލްޑޯ ނަޒާރިއޯ ހިންގާ ސްޕެއިންގެ ކްލަބު، ރެއާލް ވަލަޑޮލިޑްގެ މެޗުތައް ބަލަން ސީޒަން ޓިކެޓް ނަފާފައިވާ ސަޕޯޓަރުންނަށް ރިފަންޑް ދޭން އެ ކްލަބުން ނިންމައިފި އެވެ.
ކޮރޯނާވައިރަސް (ކޮވިޑް-19) އާ ގުޅިގެން ސްޕެނިޝް ލީގު މުއްދަތެއް ނެތް ގޮތަށް މެދުކަނދާލާފައިވާއިރު، ލީގު އަލުން ފެށުމަށް މިހާރު އަންނަނީ މަސައްކަތް ކުރަމުންނެވެ. އެގޮތުން ކުޅުންތެރިން އެކަނި ތަމްރީނުތައް ހެދުމުގެ ހުއްދަ ސްޕެއިންގެ ސަރުކާރުން މިހާރު ވަނީ ދީފައެވެ. އެކަމަކު ޓީމުތަކުގެ ހުރިހާ ކުޅުންތެރިން އެކުގައި ތަމްރީނުތައް ހަދަން ހުއްދަ ދޭނެ ތާރީޚެއް އަދި ކަނޑައަޅާފައެއް ނުވެއެވެ. އަދި ސްޕެނިޝް ލީގުގެ ކުޅުން އަލުން ފަށާނެ ތާރީޚެއްވެސް ކަނޑައަޅާފައެއް ނުވެއެވެ.
އެކަމަކު ރިޕޯޓުތައް ބުނާ ގޮތުން ލާލީގާގެ ވިސްނުމަކީ މި މަހު 18 ވަނަ ދުވަހު ޓީމުތަކުގެ ހުރިހާ ކުޅުންތެރިން ކުޅުންތެރިން އެކުގައި ތަމްރީނުތައް ހަދަން ފަށައި، އަންނަ ޖޫން މަހު ލީގުގެ މެޗުތައް ފެށޭނެ ހާލަތަށް ދިއުމެވެ.
ރިޕޯޓުތައް ބުނާ ގޮތުން ލީގު އަލުން ފަށައިގެން މެޗުތައް ކުރިއަށް ގެންދާނީ ސަޕޯޓަރުން ނުވައްދައެވެ. އެހެންކަމުން ވަލަޑޮލިޑުން ވަނީ ސަޕޯޓަރުން ނުވައްދާ ކުޅޭ ކޮންމެ މެޗެއްގެ ޓިކެޓަށް ވާ ފައިސާ ސަޕޯޓަރުންނަށް ލިބޭނެ ކަން ހާމަކޮށްފައެވެ. އޭގެ ތެރޭގައި ވަކި ވަކި ޓިކެޓް ނެގި ފަރާތްތަކުގެ އިތުރުން ސީޒަން ޓިކެޓް ނަގާފައިވާ ސަޕޯޓަރުން ވެސް ހިމެނެއެވެ.
ވަލަޑޮލިޑަކީ ސަޕޯޓަރުންނަށް ރިފަންޑެއް ދޭނެކަން އިއުލާންކުރި ސްޕެއިންގެ ފުރަތަމަ ކްލަބެވެ. ރޮނާލްޑޯ ވަލަޑޮލިޑްގެ ހިއްސާ އެއްކޮށް ގަނެފައިވަނީ 2018 ވަނަ އަހަރުގައެވެ.
