މާރުކޭޓު ގޮޅިތައް ކުއްޔަށް ދޫކޮށްފައިވާ ފަރާތްތަކުން ތިންވަނަ ފަރާތަކަށް ކުއްޔަށް ދޭނަމަ ގޮޅިތައް އަތުލަނީ
5 މެއި 2020 | އަންގާރަ 14:14ތިންވަނަ ފަރާތަކަށް ކުއްޔަށް ދިނުމަށް މެދުވެރިވާ މައިގަނޑު އެއް ސަބަބަކީ ގޮޅިތަކުގެ ސައިޒު ކުޑަވުމުގެ ސަބަބުން
މާރުކޭޓް ގޮޅިއެއްގައި ތަކެތި ވިއްކަނީ
މާރުކޭޓު ގޮޅިތައް ކުއްޔަށްދޫކޮށްފައިވާ ފަރާތްތަކުން ތިންވަނަ ފަރާތަކަށް ކުއްޔަށް ދީގެން ވިޔަފާރިކުރަމުންދާ ގޮޅިތައް އެފަދަ ފަރާތްތަކުން އަތުލުމަށް ރައްޔިތުންގެ މަޖިލީހުގެ ލާމަރުކަޒީ ކޮމިޓީން ހުށަހަޅައިފި އެވެ.
އެކޮމިޓީން މިގޮތަށް ހުށަހަޅާފައިވަނީ ކޮވިޑް -19 ރޯގާ ފެތުރުނަ ނުދިނުމަށް އަޅާ ފިޔަވަޅުތަކުގެ ސަބަބުން ޢާއިލާ ތަކާއި ވިޔަފާރިތަކުގެ އާމްދަނީއަށް އަންނަ ނުރަނގަޅު ބަދަލުތަކުން އަރައިގަތުމަށް ، ސަރުކާރުން ހިންގުމަށް ނިންމާފައިވާ ޕްރޮގްރާމް ތަންފީޒު ކުރުމަށް މަޖިލީހުން ދެކޭގޮތް ކަނޑައެޅުމާ ގުޅޭ ގޮތުން ރައްޔިތުންގެ މަޖިލީހަށް ހުށަހެޅި މައްސަލަ އެކޮމިޓީން ދިރާސާކޮށް ނިންމުމަށްފަހު ހުށަހެޅި ރިޕޯޓްގަ އެވެ. މިރިޕޯޓް އަންގާރަ ދުވަހުގެ ޖަލްސާގައި ވަނީ ފާސްކޮށްފަ އެވެ. އެއީ ވޯޓުގައި ބައިވެރިވެ ވަޑައިގެންނެވި 54 މެމްބަރުންގެ ވޯޓުންނެވެ.
މިރިޕޯޓްގައި މާލޭގެ މާރުކޭޓުގެ ހާލަތު ރަނގަޅުކުރުމަށް ސަރުކާރުން ކުރަމުންގެންދާ މަސައްކަތްތަކާ ގުޅިގެން ކޮމިޓީން ދެން ހުށަހަޅާފައިވަނީ މާރުކޭޓުގެ ގޮޅިތައް ތިންވަނަ ފަރާތަކަށް ކުއްޔަށް ދިނުމަށް މެދުވެރިވާ މައިގަނޑު އެއް ސަބަބަކީ ގޮޅިތަކުގެ ސައިޒު ކުޑަވުމުގެ ސަބަބުން ދެ ގޮޅި އެއްކޮށްލައިގެން ވިޔަފާރިކުރުން ކަމުގައިވާތީ، އަލަށް އިއުލާން ކޮށްގެން ގޮޅިތައް ދޫކުރާއިރު އެ ގޮޅިތަކަކީ އެކަށީގެންވާ ސައިޒްތަކެއްގެ ގޮޅިތަކެއްކަން ކަށަވަރުކުރުމަށް ވަނީ އެދިފަ އެވެ.
މީގެއިތުރުން ކޮމިޓީ ރިޕޯޓްގައި ކޮވިޑް-19 ގެ ސަބަބުން ދިމާވެފައިމިވާ ޙާލަތުގައި މާލެ ސިޓީ ކައުންސިލުން ކުރަމުންގެންދާ މަސައްކަތްތަކާ ގުޅޭގޮތުން މެންބަރުން ސުވާލުކޮށް ފާހަގަކުރެވުނު ކަންކަން ވަނީ ހިމަނާފަ އެވެ.
