އަތޮޅުތަކުގައި ތިބި މީހުންނަށް ދަތިކަމެއްނެތި ޖެންޑަރ މިނިސްޓްރީގެ ޚިދުމަތްތައް ލިބޭކަން ކަށަވަރުކުރަންޖެހޭ: ނައިބް ރައީސް
5 މެއި 2020 | އަންގާރަ 08:28މިހާރު ކުރަމުންދާ މަސައްކަތްތަކާ ބެހޭ ގޮތުން މަޝްވަރާކުރެއްވި
ކޮވިޑް-19އާ ގުޅިގެން މުއައްސަސާތަކުން ކުރަމުންދާ މަސައްކަތް ނައިބް ރައީސް ފައިސަލް ގެންދަވަނީ ވަރަށް ގާތުން ބައްލަވަމުން
މާލެއެކޭ އެއްގޮތަށް މިނިސްޓްރީ އޮފް ޖެންޑަރ، ފެމެލީ އެންޑް ސޯޝަލް ސަރވިސަސްގެ ޚިދުމަތް ހޯދަމުން އަންނަ، އަތޮޅުތަކުގައި ތިބި މީހުންނަށް ވެސް ދަތިކަމެއްނެތި ޚިދުމަތްތައް ލިބޭކަން ކަށަވަރުކުރުމަށް ރައީސުލްޖުމްހޫރިއްޔާގެ ނައިބު، ފައިސަލް ނަސީމް އެދިވަޑައިގެންފިއެވެ.
ހޯމަ ދުވަހު އޮންލައިންކޮށް ބޭއްވި ބައްދަލުވުމެއްގައި ނައިބު ރައީސް ފައިސަލް ވަނީ ޖެންޑަރ މިނިސްޓަރު ޢާއިޝަތު މުޙައްމަދު ދީދީ އާއި، އެމިނިސްޓްރީގެ ދަށުން ހިނގަމުންދާ އިދާރާތަކުގެ އިސްވެރިންނާއެކު ޖެންޑަރ މިނިސްޓްރީގެ މަސައްކަތްތަކާ ބެހޭ ގޮތުން މަޝްވަރާކުރައްވާފައެވެ.
މިބައްދަލުކުރެއްވުމުގައި ނައިބު ރައީސް ވަނީ ކޮވިޑް-19ގެ ސަބަބުން ކުރިމަތިވެފައިވާ މި ދަތި ޙާލަތުގައި ޖެންޑަރ މިނިސްޓްރީއާއި، އެމިނިސްޓްރީގެ ދަށުން ހިނގަމުންދާ އިދާރާތަކުން ދެމުންގެންދާ ޚިދުމަތްތަކާއި، އެ އިދާރާތަކުގެ ބެލުމުގެ ދަށުގައި ތިބި ފަރާތްތަކުގެ ކަންކަން ބަލަހައްޓަމުން ގެންދާ ގޮތުގެ މަޢުލޫމާތު ހޯއްދަވާފައެވެ. އެގޮތުން، އެ އިދާރާތަކުގެ ބެލުމުގެ ދަށުގައި ތިބޭ ފަރާތްތަކަށް ބޭނުންވާ އެހީތެރިކަން ފޯރުކޮށްދިނުމާއި، އެފަރާތްތަކަށް ބޭނުންވާ ބޭހާއި ފަރުވާގެ ކަންކަން އިންތިޒާމުކުރެވިފައިވާ ގޮތުގެ މަޢުލޫމާތު އޮޅުންފިލުއްވިއެވެ.
މީގެ އިތުރުން ޖެންޑަރ މިނިސްޓްރީއާ އެމިނިސްޓްރީގެ ދަށުން ހިނގަމުންދާ އިދާރާތަކުން ޚިދުމަތްތައް ފޯރުކޮށްދިނުމުގައި ހުރި ދަތިތަކާބެހޭގޮތުން ވެސް ނައިބު ރައީސް އެ ތަންތަނުގެ އިސްވެރިންނާ މަޝްވަރާކުރެއްވިއެވެ.
ނައިބު ރައީސް ވަނީ މާލެއެކޭ އެއްގޮތަށް ޖެންޑަރ މިނިސްޓްރީގެ ޚިދުމަތް ހޯދަމުން އަންނަ އަތޮޅުތަކުގައި ތިބި ފަރާތްތަކަށްވެސް ދަތިކަމެއްނެތި ޚިދުމަތްތައް ލިބޭކަން ކަށަވަރުކުރެއްވުމާއި، އެފަރާތްތަކަށް ބޭނުންވާ އިތުރުކަންތައްތައް ވެސް ބަލަމުން ގެންދިއުމަށް އެދިވަޑައިގެންފައެވެ.
