ނައިބު ރައީސް ޖެންޑަރ މިނިސްޓަރާއި ބައްދަލުކުރައްވައިފި
ނައިބު ރައީސް ވަނީ މިނިސްޓްރީގެ ބެލުމުގެ ދަށުގައި ތިބި ފަރާތްތަކުގެ ކަންކަން ބަލަހައްޓަވަމުން ގެންދަވާ ގޮތުގެ މަޢުލޫމާތު ހޯއްދަވާފަ
ނައިބު ރައީސް އެންއީއޯސީއަށް ކުރެއްވި ޒިޔާރަތުގެ ތެރެއިން
ރައީސުލްޖުމްހޫރިއްޔާގެ ނައިބު، ފައިޞަލް ނަސީމް މިނިސްޓަރ އޮފް ޖެންޑަރ، ފެމެލީ އެންޑް ސޯޝަލް ސަރވިސަސް ޢާއިޝަތު މުޙައްމަދު ދީދީ އާއި އެމިނިސްޓްރީގެ ދަށުން ހިނގަމުންދާ އިދާރާތަކުގެ އިސްވެރިންނާއި ބައްދަލުކުރައްވައި މަޝްވަރާކުރައްވައިފި އެވެ.
އޮންލައިންކޮށް ބޭއްވެވި މަޝްވަރާ ބައްދަލުވުމުގައި ނައިބު ރައީސް ވަނީ ކޮވިޑް-19 ގެ ސަބަބުން ކުރިމަތިވެފައިވާ މިދަތި ޙާލަތުގައި ޖެންޑަރ މިނިސްޓްރީއާ އެމިނިސްޓްރީގެ ދަށުން ހިނގަމުންދާ އިދާރާތަކުން ދެމުންގެންދާ ޚިދުމަތްތަކާއި އެ އިދާރާތަކުގެ ބެލުމުގެ ދަށުގައި ތިބި ފަރާތްތަކުގެ ކަންކަން ބަލަހައްޓަވަމުން ގެންދަވާ ގޮތުގެ މަޢުލޫމާތު ހޯއްދަވާފަ އެވެ.
އެގޮތުން އެ އިދާރާތަކުގެ ބެލުމުގެ ދަށުގައި ތިބޭ ފަރާތްތަކަށް ބޭނުންވާ އެހީތެރިކަން ފޯރުކޮށްދިނުމާއި އެފަރާތްތަކަށް ބޭނުންވާ ބޭހާއި ފަރުވާގެ ކަންކަން އިންތިޒާމުކުރެވިފައިވާ ގޮތުގެ މަޢުލޫމާތު އޮޅުންފިލުއްވި އެވެ. އަދި މިނިސްޓްރީ އޮފް ޖެންޑަރ، ފެމެލީ އެންޑް ސޯޝަލް ސަރވިސަސްއާއި އެމިނިސްޓްރީގެ ދަށުން ހިނގަމުންދާ އިދާރާތަކުން ޚިދުމަތްތައް ފޯރުކޮށްދިނުމުގައި ހުރި ދަތިތަކާބެހޭގޮތުން އެ ތަންތަނުގެ އިސްވެރިންނާ މަޝްވަރާކުރެއްވި އެވެ.
މި ބައްދަލުވުމުގައި ނައިބު ރައީސް ވަނީ މާލެއެކޭ އެއްގޮތަށް މިނިސްޓްރީ އޮފް ޖެންޑަރ، ފެމެލީ އެންޑް ސޯޝަލް ސަރވިސަސްގެ ޚިދުމަތް ހޯދާ އަތޮޅުތަކުގައި ތިއްބެވި ފަރާތްތަކަށްވެސް ދަތިކަމެއްނެތި ޚިދުމަތްތައް ލިބޭކަން ކަށަވަރުކުރެއްވުމާއި އެފަރާތްތަކަށް ބޭނުންވާ އެހެންކަންކަންވެސް ބައްލަވަމުން ގެންދެވުމަށް މި ބައްދަލުވުމުގައި ބައިވެރިވެ ވަޑައިގެންނެވި ފަރާތްތަކުގެ ކިބައިން އެދިވަޑައިގެންފަ އެވެ.
