އެނޯނިމަސްކަމަށް ބުނާ ބަޔަކު ހެލްތު ޕްރޮޓެކްޝަން އޭޖެންސީ (އެޗްޕީއޭ) ގެ ވެބްސައިޓު ހެކްކޮށްފި އެވެ.

އެ ފަރާތުންވަނީ އެ ވެބްސައިޓު ހެކްކުރުމަށްފަހު ވީޑިއޯއެއް އަޕްލޯޑްކޮށްފަ އެވެ. އޭގައި ވަނީ ކޮވިޑް-19 އާއި ގުޅިގެން ސަރުކާރުން އަޅަމުންގެންދާ ފިޔަވަޅުތަކަށް ވަރަށް ބޮޑަށް ފާޑުކިޔާފައެވެ. އަދި މި ސަރުކާރަކީ އަމިއްލަ ނިންމުންތަކެއް ނިންމުމުގެ ބާރު އަތުން ދޫވެފައިވާ ސަރުކާރެއް ކަމަށް ތުހުމަތުކުރެ އެވެ.

އިނގިރޭސިން ވާހަކަދައްކާ އަޑުއިވޭ ވީޑިއޯގައި ރާއްޖެއަށް އަވަށްޓެރި އިންޑިއާއިން އަތްގަދަކޮށްފައިވާ ކަމަށް ބުނެފައި ވެއެވެ. އެގޮތުން އިންޑިއާ އިން ވަނީ ގިނަ ސިޔާސީ ފަރާތްތަކާއި މަޖިލިސް މެމްބަރުން ގަނެފައި ކަމަށް ބުނާ އަޑު އިވެ އެވެ.

ވީޑިއޯގައި ސަރުކާރަށް ވަރުގަދަ އިންޒާރުތަކެއް ދީފައިވާއިރު، ވެރިކަމަށް އައުމަށްފަހު ދިވެހި ރައްޔިތުންގެ ހެވާ ލާބަޔަށް އެއްވެސް ކަމެއް ކޮށްފައި ނުވާކަމަށާއި ވެރިކަމަށް އަންނަން ވީ އެއްވެސް ވައުދެއް ފުއްދާފައިނުވާ ކަމަށް ބުނެ އެވެ. މިކަމުގެ ހެއްކަކަށް ކޮވިޑް-19 އާ ގުޅިގެން ސަރުކާރުން އަމަލުކުރި ގޮތުގެ ވާހަކަ އެ ވީޑިއޯގައި ވާހަކަދައްކާ ފަރާތުން ބުނެ އެވެ.

އެގޮތުން އާބާދީގެ 99 އިންސައްތަ މީހުންނަށް އާމްދަނީ ލިބޭ ދޮރުތައް ބަންދުވެފައިވާއިރު، ބޭރުން ލިބޭ އެހީ ބޭނުންކުރަނީ މަހުޖަނުންނަށް (1 ޕަރސެންޓަށް) ކަމަށް ބުނެ އެވެ. އަދި އެދެވޭ ވަރުގެ ބަދަލުތަކެއް ނުފެނިއްޖެނަމަ، ކުރިއަށް އޮތް ތަނުގައި ސަރުކާރުގެ އެހެން ނެޓްވަރކްތައް ހެއްކުރާނެ ކަމުގެ އިންޒާރު ވަނީ ވީޑިއޯގައި ދީފަ އެވެ.

މި މައްސަލަ މޯލްޑިވްސް ޕޮލިސް ސަރވިސްއިން ވަނީ ތަހުގީގުކުރަން ފަށާފަ އެވެ. ހެކް ކުރިކަމުގެ މައުލޫމާތު ލިބުނުތާ ކުޑައިރުކޮޅެއްގެ ތެރޭގައި އެޗްޕީއޭގެ ވެބްސައިޓް ވަނީ ޑައުންވެފަ އެވެ.