ކޮވިޑް-19 އާއި ގުޅިގެން މިހާތަނަށް 93 މީހަކަށް ބޯހިޔާވަހިކަން ފޯރުކޮށްދީފައިވާ ކަމަށް ނެޝަނަލް އެމަރޖެންސީ އޮޕަރެޝަން ސެންޓަރ (އެންއީއޯސީ) އިން ހާމަކޮށްފިއެވެ.

ހޮނިހިރު ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ކޮވިޑް-19 ގެ ޓާސްކް ފޯހުގެ ތަރުޖަމާނު މަބްރޫކް އަޒީޒު ވިދާޅުވީ ޖެންޑަރ މިނިސްޓްރީ އަދި ސޯޝަލް ކައުންސިލް އެއްކޮށް ކުރާ މަސައްކަތުގައި އިތުރު އެންޖީއޯތަކާއި ބައިނަލްއަގުވާމީ އޮގަނައިޒޭޝަންތަކުން ބައިވެރިވެގެން މަސައްކަތްތަކެއް ކުރަމުންދާ ކަމަށެވެ. އަދި މީގެ ތެރޭގައި އެކަމަޑޭޝަން އަދި ކާބޯތަކެތި ފޯރުކޮށްދިނުމުގެ މަސައްކަތްތައް ކުރިއަށްދާ ކަމަށެވެ.އަދި މިހާތަނަށް ޖުމްލަ 175 މީހަކަށް ބޯހިޔާވަހިކަން ފޯރުކޮށްދީފައިވާ ކަމަށް މަބްރޫކް ވިދާޅުވިއެވެ.

މީގެ އިތުރުން ކާބޯތަކެތި ބޭނުންވެގެން ފޯނުކޮށް އެކަމަށް އެދުނު މީހުންގެ ތެރެއިން 245 މީހަކަށް އެކަން ހަމަޖައްސާފައިވާ ކަމަށް ވެސް މަބްރޫކް ވިދާޅުވިއެވެ.

ކޮވިޑް-19 ގެ ކޭސްތަކެއް ފެނުމާއި ގުޅިގެން މާލެ ސަރަހައްދު ލޮކްޑައުން ކުރުމާއިއެކު އެންމެ ގިނައިން ހުށަހަޅާފައިވަނީ ބޯހިޔާވަހިކަމާއި ގުޅޭ މައްސަލަތައް ކަމަށް މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް އިން ވަނީ މީގެ ކުރިން ބުނެފައެވެ.

އެއްވެސް ސަބަބަކާހުރެ މަގުމަތިވެ ޙާލުގައި ޖެހޭ ފަރާތެއް ހުރިނަމަ ޖެންޑަރ މިނިސްޓްރީގެ ނަންބަރު 3328393ށް ގުޅައި، އެ މައުލޫމާތު ހިއްސާކުރުމަށް ސަރުކާރުން ވަނީ އެދިފައެވެ.