އީއެފްއެލް ޗެމްޕިއަންޝިޕް (އިނގިރޭސި ދެވަނަ ޑިވިޝަން) ގައި ވާދަކުރަމުން އަންނަ ޑާބީ ކައުންޓީގެ ކުޅުންތެރިންގެ މުސާރަ ކުޑަކުރަން ނިންމައިފި އެވެ.

މިހާރު ދުނިޔޭގައި ހަލުވިކަމާއިއެކު ފެތުރެމުން އަންނަ ކޮރޯނާވައިރަސް (ކޮވިޑް-19) ގެ ސަބަބުން ކްލަބަށް ދިމާވާ މާލީ ގޮންޖެހުންތަކުން އަރައިގަތުމަށް ޑާބީ ކައުންޓީގެ ކުޅުންތެރިންގެ މުސާރަ ކުޑަކުރި ނަމަވެސް، މުސާރައިން އުނިކުރަން ނިންމި ވަކިވަރެއް ހާމަކޮށްފައެއް ނުވެއެވެ.

ކާޑިފްގެ ކުޅުންތެރިންގެ އިތުރަށް އެޓީމުގެ ކޯޗު ފިލިޕް ކޯކޫ އާއި ޗީފް އެގްޒެކްޓިވް ސްޓެފަން ޕިއާސް ގެ މުސާރަވެސް ވަނީ ކުޑަކޮށްފައެވެ. ޑާބީ ކައުންޓީގެ ކުޅުންތެރިންގެ މުސާރަ ކުޑަކުރިއިރު، މީގެ ކުރިން އެޓީމުގެ ފޯވާޑް ވޭން ރޫނީ ވަނީ ކުޅުންތެރިންގެ މުސާރަ ކުޑަކުރުމާ ދެކޮޅަށް ވާހަކަދައްކާފައެވެ.

ކާޑިފްގެ ކުޅުންތެރިންގެ މުސާރަ ކުޑަކުރިއިރު، މީގެ ކުރިން އީއެފްއެލް ޗެމްޕިއަންޝިޕް ގައި ވާދަކުރަމުން އަންނަ ލީޑްސް ޔުނައިޓެޑް، ބްރިސްޓޯލް ސިޓީ، ވިގަން، ސްވޯންސީ ސިޓީ އަދި ބާމިންހަމް ސިޓީން ވަނީ ކުޅުންތެރިންގެ މުސާރަ ކުޑަކޮށްފައެވެ. އަދި އިނގިރޭސި އެއްވަނަ ޑިވިޝަން ކަމަށްވާ ޕްރިމިއާ ލީގުން މިހާތަނަށް ކުޅުންތެރިންގެ މުސާރަ ކުޑަކޮށްފައިވަނީ އާސެނަލް، ޝެފީލްޑް ޔުނައިޓެޑް، ވަޓްފޯޑް، ސައުތެމްޓަން އަދި ވެސްޓް ހޭމް ޔުނައިޓެޑުންނެވެ.

ކޮވިޑް-19 އާ ގުޅިގެން ގިނަ ކްލަބުތަކަށް މާލީގޮތުން ގޮންޖެހުންތަކާ ކުރިމަތިލާން ޖެހިފައިވާއިރު، އިނގިރޭސިވިލާތުގައި ވަނީ ހުރިހާ ފުޓްބޯޅަ މުބާރާތްތަކެއް މުއްދަތެއް ނެތް ގޮތަށް މެދު ކަނޑާލާފައެވެ.