މަޖިލީހުގެ މި ހިނގާ ދައުރު މެއި 31 އަށް ދައްމާލައިފި
29 އެޕްރީލު 2020 | ބުދަ 09:20މިއީ 2020 ވަނަ އަހަރުގެ ފުރަތަމަ ދައުރު
ރައްޔިތުންގެ މަޖިލިސް ކުރާ އިދާރާ
ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރު ނިންމުމަށްފަހު ލިބޭ ޗުއްޓީ ކެންސަލް ކުރުމަށްފަހު، މަޖިލީހުގެ މިއަހަރުގެ ފުރަތަމަ ދައުރު އަންނަ މެއި މަހުގެ 31 ވަނަ ދުވަހުގެ ނިޔަލަށް އިތުރުކުރުމަށް ފާސްކޮށްފި އެވެ.
ރައްޔިތުންގެ މަޖިލީހުގެ ބުދަ ދުވަހުގެ ޖަލްސާގައި މަޖިލީހުގެ މިއަހަރުގެ ފުރަތަމަ ދައުރު ނިންމުމަށްފަހު، ލިބޭ އެއްމަސް ދުވަހުގެ ޗުއްޓީ ކެންސަލް ކުރުމަށާއި އަދި މިއަހަރުގެ ފުރަތަމަ ދައުރު މެއި މަހުގެ 31 ވަނަ ދުވަހުގެ ނިޔަލަށް އިތުރު ކުރުމަށް ހުށަހެޅުއްވީ، މަޖިލީހުގެ ރައީސް މުހައްމަދު ނަޝީދު އެވެ.
ބުދަ ދުވަހުގެ ޖަލްސާގައި، މަޖިލީހުގެ މިއަހަރުގެ ފުރަތަމަ ދައުރު މެއި މަހުގެ 31 ވަނަ ދުވަހުގެ ނިޔަލަށް އިތުރު ކުރުމަށް ފާސްކޮށްފައިވަނީ ވޯޓުގައި ބައިވެރިވެވަޑައިގެންނެވި 67 މެމްބަރުންގެ އަގުލަބިއްޔަތުންނެވެ.
ރައްޔިތުންގެ މަޖިލީހުގެ ފުރަތަމަ ދައުރަކީ ފެބްރުއަރީ މަހުގެ ފުރަތަމަ ދުވަހުން ފެށިން އޭޕްރީލް މަހުގެ ނިޔަލަށެވެ. އެހެންކަމުން މި އޭޕްރީލް ނިމުމާއެކު މަޖިލީހުގެ ޤަވާއިދު ބުނާގޮތުން އެއް މަސް ދުވަހުގެ ޗުއްޓީއެއް މެންބަރުންނަށް ލިބެ އެވެ.
މަޖިލީހުގެ ރައީސް ނަޝީދު ވިދާޅުވީ، މިއަހަރުގެ ފުރަތަމަ ދައުރު ނިމުމާއެކު ލިބޭ ޗުއްޓީ ނުނަގައި، މަޖިލީހުގެ ޖަލްސާތައް ބޭއްވޭ ގޮތަށް މަޖިލީހުގެ މެންބަރުން ތިއްބެވުމަކީ ކޮވިޑް-19ގެ މިޙާލަތުގައި ޤައުމު އޮތްއިރު، މުހިންމު ކަމެއް ކަމަށެވެ.
މަޖިލީހުގެ މިއަހަރުގެ ފުރަތަމަ ދައުރު މެއި މަހުގެ 31 ވަނަ ދުވަހަށް އިތުރު ކުރެއްވުމުން މަޖިލީހުގެ މިއަހަރުގެ ދެވަނަ ދައުރު ޖުލައި މަހުން ފެށިގެން ކުރިއަށްދާނެ އެވެ. އެހެންކަމުން މަޖިލީހުގެ މެންބަރުންނަށް މިއަހަރު ފުރަތަމަ ދައުރުނިމި، ދެވަނަ ދައުރު ފެށޭއިރު ލިބޭ ޗުއްޓީއެއް ނުލިބޭނެ އެވެ.
ރައީސް، ނަޝީދު ވިދާޅުވީ، ކޮވިޑް-19ގެ މިޙާލަތުގައި މަޖިލިސް ހިންގުމަކީ ސަރުކާރު ހިންގުމަށް ފަސޭހަވެ، އަދި ސަރުކާރާ ދައުލަތުގެ އިދާރާތައް ޒިންމާދާރު ކުރުމަށް ވެސް މުހިންމު ކަމެއްކަމަށެވެ. އަދި ރައްޔިތުންނަށް ވެސް އެންމެ ފައިދާހުރި ގޮތަކަށްވާނީ މިޙާލަތުގައި މަޖިލިސް ކުރިއަށް ދިއުންކަމަށް ރައީސް ނަޝީދު ވިދާޅުވި އެވެ.
ރައީސް ނަޝީދު ވިދާޅުވީ، ކޮވިޑް-19 ގެ މިހާލަތުގައި ވެސް މަޖިލީހުގެ މަސައްކަތްތައް ކުރެވޭގޮތަށް ހަމަޖެހިފައިވާތީ، މިހާލަތުގައި މަޖިލީހުގެ މަސައްކަތްތައް ކުރުމަށް އެއްވެސް ހުރަހެއް ނެތްކަމަށެވެ. ކޮވިޑް-19 ރޯގާ އާ ގުޅިގެން، މަޖިލީހުގެ ޖަލްސާތައް މިހާރު ކުރިއަށް ގެންދަނީ، ވީޑިއޯ ކޮންފަރެންސް މެދުވެރިކޮށެވެ.
