މިއީ މާތްﷲ ގެ ކޯފާއެއް ނޫން: ރައީސް މައުމޫން
މީގެ ކުރިން ވެސް މުސްލިމުންނަށް މިކަހަލަ ބޮޑެތި ބަލިމަޑުކަން ދިމާވެފައިވޭ
ރައީސް މައުމޫން
މިފަހަރު ރަމަޟާން މަހާއި ކުރިމަތިލާން ޖެހިފައިވަނީ ވަރަށް ނުރައްކާތެރި ދަނޑިވަޅެއްގައި ކަމަށްވީ ނަމަވެސް މިއީ މާތްﷲ ގެ ކޯފާއެއް ނޫން ކަމަށް ކުރީގެ ރައީސުލްޖުމްހޫރިއްޔާ މައުމޫން އަބްދުލް ގައްޔޫމް ވިދާޅުވެއްޖެއެވެ.
މައުމޫން ފައުންޑޭޝަންގެ ޔޫޓިއުބް ޗެނަލްގައި "ދިނާއި ދުނިޔެ" ގެ ނަމުގައި ހިއްސާ ކުރައްވާފައިވާ ވީޑިއޯގެ ޒަރިއްޔާ އިން މި ރޯދަ މަހު ވެސް އެމަނިކުފާނު ވަނީ ދީނީ ވާހަކަތައް ރައްޔިތުންނާއި ހަމައަށް ގެނެސްދެއްވާފައެވެ. އެގޮތުން އެމަނިކުފާނު ވިދާޅުވީ މި ބަލިމަޑުކަމަކީ މާތްﷲ ގެ ކޯފާއެއް ނޫން ކަމަށާއި އެކަން އެނގެނީ ސޫރަތުލް ބަޤަރާ އިން ކަމަށެވެ.
މީގެ ކުރިން ވެސް މުސްލިމުންނަށް މިކަހަލަ ބޮޑެތި ބަލިމަޑުކަން ދިމާވެފައިވާކަން ފާހަގަކުރައްވާ މައުމޫން ވިދާޅުވީ ކީރިތި ރަސޫލާގެ އަސްހާބުންގެ ޒަމާނުގައި ޠާޢޫނު ބަލި ފެތުރިގެންދިޔަ ކަމަށެވެ. އަދި މާތްﷲ ސުވަރުގެ ވައްދަވާނެކަމުގެ ވައުދުގެ ބަސްފުޅު އިއްވަވާފައިވާ 10 ބޭކަލުންގެ ތެރެއިން ބޭކަލެއް މި ބަލީގައި އަވާހަރަވެވަޑައިގަތް ކަމަށާއި މިކަމުން ވެސް ދޭހަވަނީ މިފަދަ ބަލިމަޑުކަމަކީ މާތްﷲ ގެ ކޯފާއެއް ނޫންކަމަށް ރައީސް މައުމޫން ވިދާޅުވިއެވެ.
މިއީ އަޅުގަނޑުމެން އެންމެންގެ އިމާންތެރިކަން އިމްތިހާނު ކުރުމަށްޓަކައި ދިމާވެފައިވާ ކަމެއްކަން ފާހަގަކުރައްވާ ރައީސް މައުމޫން ވިދާޅުވީ މިކަމުން ސަލާމަތްވާނެ ގޮތް ވެސް ސޫރަތުލް ބަޤަރާގެ 155 ވަނަ އާޔަތުގައި ބަޔާންކޮށްފައިވާ ކަމަށެވެ. އެގޮތުން ކެތްތެރިންނަށް އުފާވެރިކަމުގެ ޚަބަރު ލިބިގެންދާނެ ކަމަށް ބަޔާންވެގެންވާ ކަމަށެވެ. މިފަދަ ދަނޑިވަޅެއްގައި އެންމެ މާތް ސިފަތައް ކަމުގައިވާ އަހްވަންތަކަމާއި އެއްބަނޑުއެއްބަފާކަމުގެ ސިފަ އިސްކުރަން ޖެހޭ ކަމަށް ވެސް އެމަނިކުފާނު ވިދާޅުވިއެވެ.
އެހެން މީހުންނަށް ދިމާވާ ކަންތައްތައް ތަސައްވަރުކޮށް، އެހެން މީހުންނަށް ދިމާވާ ކޮންމެ ކަމަކީ، އެއީ އަހަރުމެން އެންމެންނަށް ވެސް ދިމާވާ ކަމެއްގެ ގޮތުގައި ބަލައިގަންނަން ޖެހޭނެ ކަމަށް މައުމޫން ވިދާޅުވިއެވެ.
ދީލަތި ކަމާއެއްކޮށް އެހެން މީހުންނަށް އެހީތެރިވެދިނުމަކީ މުހިންމު ކަމެއް ކަމަށާއި މިފަދަ ކަމަކުން ސަލާމަތް ވެވޭނީ އެންމެން އެކީގައި މަސައްކަތް ކޮށްގެން ވެސް އެމަނިކުފާނު ފާހަގަކުރެއްވިއެވެ. އެ އަޒުމުގައި މަސައްކަތްކޮށްފިނަމަ ލަސްތަކެއް ނުވެ މިކަމުން ސަލާމަތް ވެވޭނެ ކަމަށް ވިދާޅުވިއެވެ.
މި ރަމަޟާން މަހު މި ދިމާވި ކަމަކީ އެއްވެސް ގޮތަކަށް އަޅުގަނޑުމެން ކަންބޮޑުވެ، ޖެހިލުންވެ، މާޔޫސްވާންވީ ކަމެއް ނޫން ކަމަށާއި އެންމެން ގުޅިގެން މާހިރުންގެ އިރުޝާދާ އެއްގޮތަށް އަމަލުކުރުމަށް މައުމޫން ނަސޭހަތްތެރި ވެވަޑައިގެންނެވިއެވެ.
އަދި އަޅުކަމުގައި ގިނަ ވަގުތު ހޭދަކޮށް މި ބަރަކާތްތެރި މައްސަރުގެ ދަރުމަ އާއި ސަވާބު ލިބިގަތުމަށް ގަދަ އަޅާ މަސައްކަތް ކުރެއްވުމަށް ވެސް އެދިވަޑައިގެންނެވި އެވެ.
