އޭޕްރީލް މަހުގެ ބިލް ހެދުމަށްޓަކައި ގްރޭޓަރ މާލެ ސަރަހައްދުގެ ކަސްޓަމަރުން ވީ އެންމެ އަވަހަކަށް މީޓަރުގެ ފޮޓޯ ފޮނުވައިދިނުމަށް މާލެ ވޯޓަރ އެންޑް ސްވަރޭޖް ކޮމްޕެނީ ޕްރައިވެޓް ލިމިޓެޑް (އެމްޑަބްލިޔުއެސްސީ) އިން އެދިއްޖެއެވެ.

އެ ކުންފުނިން ބުނީ ލޮކްޑައުން މުއްދަތުގައި ފޮޓޯ ފޮނުވަން ޖެހޭނީ ލޮކްޑައުންގެ ކުރިން ރީޑިންގ ނުނެގޭ ކަސްޓަމަރުން އެކަނި ކަމަށެވެ. އެ ކަސްޓަމަރުން ފޮޓޯ ފޮނުވައި ދިނުމަށް އެދި މެސެޖު ކުރުމަށް ހަމަޖެހިފައިވާ ކަމަށް އެ ކުންފުނިން ބުނެއެވެ.

އެމްޑަބްލިޔުއެސްސީ އިން މިހެން ބުނެފައިވާއިރު މޮބައިލް އެޕްލިކޭޝަނަށް ރަޖިސްޓަރީވެފައިވާ ގޭބީސީތަކަށް ފެން ބިލު ފޮނުވޭނީ ހަމައެކަނި އެމްޑަބްލިޔުއެސްސީ އެޕްގެ ޒަރިއްޔާއިން ކަމަށް އެ ކުންފުނިން ވަނީ ދާދި ފަހުން ބުނެފައެވެ.

އެމްޑަބްލިޔުއެސްސީގެ މޮބައިލް އެޕްލިކޭޝަން ބޭނުންކުރާ ފަރާތްތަކަށް ކުރިއެކޭ އެއްފަދައިން، މިހާރުވެސް ބިލު ތައްޔާރުވުމާއެކު، ފޯނަށް ނޯޓިފިކޭޝަން ލިބޭނެ ކަމަށާއި އެޕްލިކޭޝަން މެދުވެރިކޮށް ބިލަށް ފައިސާ ދެއްކޭނެ ކަމަށް ވެސް އެ ކުންފުނިން ބުންޏެވެ.

އެމްޑަބްލިޔުއެސްސީގެ މޮބައިލް އެޕްލިކޭޝަނާއި އޮންލައިން ޚިދުމަތްތަކުގެ އިތުރު މަޢުލޫމާތު ކުންފުނީގެ ކަސްޓަމަރ ކެއަރ ސެންޓަރ ހޮޓްލައިން 105 އަށް ގުޅުއްވުމުން ލިބޭނެ ކަމަށާއި މިދަނޑިވަޅުގައި ޑިޖިޓަލް ޚިދުމަތްތައް ބޭނުންކުރައްވައި، ރައްކާތެރިވެ ތިބުމަށް އެންމެހައި ކަސްޓަމަރުންނަށް އެ ކުންފުނިން ވަނީ އިލްތިމާސްކޮށްފައެވެ.