ރާއްޖޭގައި ތިބި ބިދޭސީން އަނބުރާ ގައުމަށް ގެންދަން ދެ ފްލައިޓެއް ހަމަޖެހިއްޖެ
26 އެޕްރީލު 2020 | އާދީއްތަ 22:45ފަސިންޖަރުން ގެންދިޔުމުގައި މޯލްޑިވިސް ޕޮލިސް ސާރވިސްއިން ހަމައެކަނި ހުއްދަ ދޭނީ ހާއްސަ ފާހެއް އޮންނަ ވެހިކަލްތަކަށް
ވެލާނާ އިންޓަރނޭޝަނަލް އެއާރޕޯޓް
2020 އޭޕްރިލް 29ގައި ރާއްޖެއިން ފުރުމަށް ހަމަޖެހިފައިވާ ރޮސިޔާ އެއަރލައިންސް އަދި އަދި 2020 އޭޕްރިލް 30 ގައި ފުރުމަށް ހަމަޖެހިފައިވާ އެއަރ ކައިރޯ ގައި ފުރުމަށް ހަމަޖެހިފައިވާ މީހުން އަމަލުކުރަންވީ ގޮތް ޓުއަރިޒަމް މިނިސްޓްރީން އާންމުކޮށްފިއެވެ.
މިކަމާއި ގުޅިގެން ޓުއަރިޒަމް މިނިސްޓްރީން ނެރުނު ނޫސްބަޔާނެއްގައި ބުނެފައިވަނީ، ރާއްޖޭގައި މިވަގުތު ތިބި ފަތުރުވެރިންނާއި ބިދޭސީ މުވައްޒަފުން އަދި އެހެނިހެން ފަސިންޖަރުން އެމީހުންގެ ޤައުމަށް ގެންދިޔުމަށް ރޮސިޔާ އެއަރލައިންސްގެ ފްލައިޓެއް އޭޕްރީލް 29 ވަނަ ދުވަހު އަދި އެއަރ ކައިރޯގެ ފްލައިޓް އޭޕްރިލް 30 ވަނަ ދުވަހު ވެލާނާ އިންޓަރނޭޝަނަލް އެއަރޕޯޓުން ފުރުމަށް ހަމަޖެހިފައިވާކަމަށެވެ.
ޓުއަރިޒަމް މިނިސްޓްރީން ބުނެފައިވަނީ، ފަސިންޖަރުން ގެންދިޔުމުގައި މޯލްޑިވިސް ޕޮލިސް ސާރވިސްއިން ހަމައެކަނި ހުއްދަ ދޭނީ ހާއްސަ ފާހެއް އޮންނަ ވެހިކަލްތަކާއި، ބޯރޑިންގް ފާހެއް އޮތް ފަސިންޖަރުން ގޮވައިގެން ދަތުރުކުރާ ވެހިކަލްތައް އެކަނިކަމަށެވެ. މި ފްލައިޓުތަކުން ފުރުމަށް ހަމަޖެހިފައިވާ ފަސިންޖަރުން ވެލާނާ އިންޓަރނޭޝަނަލް އެއަރޕޯޓަށް ދިޔުމުގައި މިކަންކަމަށް ސަމާލުވުމަށް މިނިސްޓްރީން ވަނީ އިލްތިމާސްކޮށްފައެވެ.
އެހެންކަމުން، ޓޫރިސްޓް ފެސިލިޓީތަކުގައި ތިބި ފަތުރުވެރިންނާއި ބިދޭސީ މުވައްޒަފުން އަދި އެހެނިހެން ފަސިންޖަރުން މިނިސްޓްރީ އޮފް ފޮރިން އެފެއާޒް އަދި ޓޫރިސްޓް ޕޮލިސްއާ ގުޅިގެން ވެލާނާ އިންޓަރނޭޝަނަލް އެއަރޕޯޓަށް ދިއުމުގެ އިންތިޒާމު ހަމަޖެއްސެވުމަށް ވަނީ އަންގާފައެވެ.
ޓުއަރިޒަމް މިނިސްޓްރީން ބުނެފައިވަނީ، މިހާލަތުގައި، ކަމާގުޅޭ އެންމެހައި އިދާރާތަކުން އަންގަވާ އެންގުންތަކާއި އެއްގޮތަށް އަމަލުކުރެއްވުމަށް ހުރިހައި ފަރާތްތަކަށްވެސް އިލްތިމާސްކުރާކަމަށާއި މި ދަނޑިވަޅުގައި ފުރަން ހަމަޖެހިފައިވާ ފަސިންޖަރުންނަށް އެހީތެރިކަން ފޯރުކޮށްދިނުމަށް ކައުންސިލްތަކާއި އެ ފަރާތްތައް ތިއްބަވާ ތަންތަނުން ގުޅިގެން މަސައްކަތްކުރުމަށް އެދޭކަމަށެވެ.
