ރާއްޖެއިން ކޮވިޑް-19 އަށް ޕޮޒިޓިވްވި އިންޑިއާ މީހުންނަށް ރާއްޖޭގައި ހުންނަ އިންޑިއާގެ ހައިކޮމިޝަނުން ކެއަރ ޕެކޭޖް ފޮނުވަން ފަށައިފިއެވެ.

ރާއްޖޭގައި މަސައްކަތްކުރާ އިންޑިއާގެ މީހުންގެ ތެރެއިން 11 މީހަކު ވަނީ ކޮވިޑް-19 އަށް ޕޮޒިޓިވްވެފައެވެ.

އިންޑިއަން ހައިކޮމިޝަންގެ ޑެޕިއުޓީ ހައިކޮމިޝަނަރ ރޯހިތް ރަތީޝް ރާއްޖެ.އެމްވީ އަށް ވިދާޅުވީ، މިހާތަނަށް ހަތް ކެއަރ ޕެކޭޖް ފޮނުވާފައިވާ ކަމަށެވެ. އަދި ބާކި ހުރި ކެއަރ ޕެކޭޖްތައް ހަވާލު ކުރުމުގެ މަސައްކަތް ކުރަމުންދާ ކަމަށް އޭނާ ވިދާޅުވިއެވެ.

ރޯހިތް ވިދާޅުވީ، ބަލިވި މީހުންނަށް ފޮނުވާ ކެއަރ ޕެކޭޖްގައި ހުންނަނީ ޒަރޫރީ ބޭނުންތަކަށް ބޭނުންވާ ތަކެތި ކަމަށެވެ. އޭގެ ތެރޭގައި، ކާތެއްޗާއި، ބެޑްޝީޓްގެ އިތުުރުން އެހެނިހެން ތަކެތި ހިމެނޭ ކަމަށެވެ.

ރާއްޖެއިން ކޮވިޑް-19 އަށް މިހާތަނަށް 191 މީހަކު ވަނީ ޕޮޒިޓިވްވެފައެވެ. އެއް ދުވަހެއްގެ މައްޗަށް އެންމެ ގިނަ މީހުން ބައްޔަށް ޕޮޒިޓިވްވެފައިވަނީ އާދިއްތަ ދުވަހުއެވެ. އެއީ 50 މީހުންނެވެ. ބައްޔަށް ޕޮޒިޓިވްވި މީހުންގެ އެންމެ ހާލުވެސް ރަނގަޅެވެ.