އައްޑޫ އިކުއެޓޯރިއަލް ހޮސްޕިޓަލުގައި ކީމޯތެރަޕީގެ ޚިދުމަތް ދޭން ފަށައިފި
26 އެޕްރީލު 2020 | އާދީއްތަ 13:01ކެންސަރަށް ފަރުވާކުރަމުންދާ ދެމީހަކަށް ފަރުވާ ދީފައިވޭ
އައްޑޫ އިކުއެޓޯރިއަލް ހޮސްޕިޓަލްގެ ޚިދުމަތްތައް ދަނީ ފުޅާ ކުރަމުން
އައްޑޫ އިކުއެޓޯރިއަލް ހޮސްޕިޓަލުގައި ފުރަތަމަ ފަހަރަށް ކީމޯތެރަޕީގެ ޚިދުމަތް ދޭން ފަށައިފިއެވެ.
އައްޑޫ އިކުއެޓޯރިއަލް ހޮސްޕިޓަލުން ބުނީ ހޮސްޕިޓަލުގައި ފުރަތަމަ ފަހަރަށް ކީމޯތެރަޕީގެ ޚިދުމަތް މިމަހުގެ 25 ވީ ހޮނިހިރު ދުވަހު ފެށާފައިވާ ކަމަށެވެ. އެގޮތުން ކެންސަރަށް ފަރުވާކުރަމުންދާ ދެމީހަކަށް ފަރުވާ ދީފައިވާ ކަމަށް އެހޮސްޕިޓަލުން ބުނެއެވެ.
ކީމޯ ތެރެޕީގެ ޚިދުމަތް ފެށި ނަމަވެސް ހޮސްޕިޓަލްގައި ކެންސަރުގެ ސްޕެޝަލިސްޓުންގެ ޑޮކްޓަރުން ނުތިބެއެވެ. އެހެންކަމުން ފަރުވާ ދިނުމުގެ ކަންކަން ކުރިއަށް ގެންދަނީ އައިޖީއެމްއެޗްގެ ސްޕެޝަލިސްޓް ޑޮކްޓަރުންގެ އިރުޝާދުގެ ދަށުންނެވެ.
މިއީ މާލެ އާއި ހުޅުމާލެ ފިޔަވައި އަތޮޅު ތެރޭގައި ތަރައްޤީކުރާ ފުރަތަމަ ޓަރޝަރީ ހޮސްޕިޓަލެވެ. މިދިޔަ ޖެނުއަރީ މަހުގެ 15 އިން ފެށިގެން ބައެއް ޚިދުމަތްތައް ދެމުންދާއިރު، ކީމޯތެރަޕީގެ ޚިދުމަތް ދޭން ފެށުމަކީ މުޅި ރާއްޖެއަށް އަދި އައްޑޫ ސިޓީ ރައްޔިތުންނަށް ލިބުނު ވަރަށް ބޮޑު ކުރިއެރުމެކެވެ.
އައްޑޫ އެކުއެޓޯރިއަލް ހޮސްޕިޓަލަކީ 100 އެނދުގެ ހޮސްޕިޓަލެކެވެ. މިހޮސްޕިޓަލް އެޅުމަށް އެލިއާ ކޮންސްޓްރަކްޝަންސް އާ ޙަވާލުކޮށްފައިވަނީ ކުރީގެ ރައީސް ޢަބްދުﷲ ޔާމީނުގެ ވެރިކަމުގައި 2016 ވަނަ އަހަރުގެ ނޮވެންބަރ މަހުގެ 14 ވަނަ ދުވަހު އެވެ.
