ބިލް ތައްޔާރުކުރުމަށް މީޓަރުގެ ފޮޓޯއެއް ފޮނުވައިދިނުމަށް ސްޓެލްކޯ އިން އެދިއްޖެ
25 އެޕްރީލު 2020 | ހޮނިހިރު 20:37ވީހާވެސް އަވަހަށް ވެބް ޕޯޓަލް މެދުވެރިކޮށް މީޓަރުގެ ފޮޓޯ ފޮނުވައިދެއްވާ
ސްޓެލްކޯގެ މައި އޮފީސް ހުންނަ އިމާރާތް
އޭޕްރީލް މަހުގެ ބިލް ހެދުމަށްޓަކައި ގްރޭޓަރ މާލެ ސަރަހައްދުގެ ކަސްޓަމަރުން ވީ އެންމެ އަވަހަކަށް ވެބް ޕޯޓަލްއަށް މީޓަރުގެ ފޮޓޯ ފޮނުއްވާދެއްވުމަށް ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން އިލްތިމާސްކޮށްފިއެވެ.
މިކަމާއި ގުޅިގެން ސްޓެލްކޯއިން ނެރެފައިވާ ނޫސްބަޔާނުގައި ބުނެފައިވަނީ، ކޮވިޑް-19 އާ ގުޅިގެން އިއުލާން ކޮށްފައިވާ ފުރަބަންދުގެ މުއްދަތުގައި މީޓަރުގެ ރީޑިންގ ނަގަން ގޭގެއަށް ވަދެ އުޅުމަކީ ގޭގޭގައި ދިރިއުޅުއްވާ ފަރާތްތަކަށާއި ކުންފުނީގެ މުވައްޒަފުންނަށްވެސް ރައްކާތެރި ގޮތަކަށް ނުވާތީ، މިވަގުތައް މީޓަރުތަކުގެ ރީޑިން ނަގަން އިތުރު ގޮތެއް ހަމަޖައްސާފައިވާކަމަށެވެ. އެގޮތުން މީޓަރުގެ ފޮޓޯ ކުންފުނީގެ ވެބް ޕޯޓަލް www.stelco.com.mv/sur މެދުވެރިކޮށް ފޮނުއްވޭނެ އިންތިޒާމް ހަމަޖައްސާފައިވާކަމަށާއި ކަރަންޓުގެ ޚިދުމަތަށް ބިލްކުރުމުގައި ޢަމަލުކުރަމުން އަންނަ ގޮތުގެމަތިން، މިހިނގާ އޭޕްރީލް މަހުގެ ބިލް ހެދުމަށްޓަކައި ގްރޭޓަރމާލެ ސަރަހައްދުގެ ކަސްޓަމަރުން ވީ އެންމެ އަވަހަކަށް ވެބް ޕޯޓަލްއަށް މިޓަރުގެ ފޮޓޯ ފޮނުވުމަށް އެދޭކަމަށެވެ.
ނޫސްބަޔާނުގައި އިތުރަށް ބުނެފައިވަނީ، ފޮޓޯ ފޮނުވެން ނެތް މީޓަރުތަކަށް ކުރިން އެތަނަކަށް ކަރަންޓު ބޭނުން ކުރަމުން އައި މިންވަރަށާއި، މި ހާލަތުގައި އެތަނެއް ބޭނުން ކުރަމުން އަންނަގޮތަށް ބަލައި އެވްރެޖް ބިލެއް ހެދުމަށް ހަމަޖެހިފައިވާކަމަށެވެ. އަދި، އެވްރެޖް ބިލެއް ހެދި ކަމުގައި ވީނަމަވެސް އަބަދުވެސް އަމަލުުކުރަމުން އަންނަ އުސޫލަކީ ކަރަންޓުގެ ހިދުމަތް ބޭނުންކުރާ މިންވަރަށް ބިލް ކުރުން ކަމުގައެވެ. އެގޮތުން، އެމިންވަރާއި އެއްހަމަ ކުރުމަށް ޓަކައި ފަހުން ފޮނުވޭ ބިލްތަކަށް އެޑްޖަސްޓްމަންޓް ނުވަތަ ބަދަލުތަކެއް ގެނެވިގެންދާނެކަމަށް ކުންފުނިން ބުންޏެވެ.
ސްޓެލްކޯއިން ބުނެފައިވަނީ، ގެނެވޭ ބަދަލުތަކުގެ ސަބަބުން އެއްވެސް ގެއެއްގެ ބިލް ބޮޑު ނުވާނެ ކަމުގެ ޔަގީންކަން ރައްޔިތުންނަށް އަރުވާކަމަށެވެ. ސްޓެލްކޯއިން ވަނީ މި ހާލަތުގައި އެންމެންގެ ރައްކާތެރިކަމަށްޓަކައި، ބިލަށް ފައިސާ ދެއްކެވުމަށް އެ ކުންފުނީގެ އެޕްލިކޭޝަނާއި، ވެބްސައިޓް ބޭނުން ކުރެއްވުމަށް އިލްތިމާސް ކުރާކަމަށެވެ.
