އިނގިރޭސި ޕްރިމިއާ ލީގުގައި ވާދަކުރަމުން އަންނަ ޗެލްސީގެ ކުޅުންތެރިންގެ މުސާރަ ކުޑަނުކޮށް، ޗެރިޓީ އަށް އެހީވާން ކުޅުންތެރިންގެ ކިބައިން އެދިއްޖެ އެވެ.

މިހާރު ދުނިޔޭގައި ހަލުވިކަމާއިއެކު ފެތުރެމުން އަންނަ ކޮރޯނާވައިރަސް (ކޮވިޑް-19) ގެ ސަބަބުން ކްލަބަށް ދިމާވާ މާލީ ގޮންޖެހުންތަކުން އަރައިގަތުމަށް މީގެ ކުރިން ޗެލްސީން ވަނީ ކުޅުންތެރިންގެ މުސާރަ ކުޑަކުރަން މަސައްކަތް ކޮށްފައެވެ. އެގޮތުން ކުޅުންތެރިންގެ މުސާރައިން 10 އިންސައްތަ އުނިކުރަން ޗެލްސީގެ ކެޕްޓަން ސެޒާ އެޒްޕަލިކިއުޓާ އާއެކު ޗެލްސީގެ ޑިރެކްޓަރު މަރިއާނާ ގްރަނޮވޮސްކިއާ މަޝްވަރާ ކުރި ކަމަށް ރިޕޯޓުތައް ބުނެއެވެ.

އެކަމަކު ހޮނިހިރު ދުވަހު ޗެލްސީން ނެރުނު ބަޔާނެއްގައި ބުނެފައިވަނީ ކުޅުންތެރިންގެ މުސާރަ ކުޑަނުކުރާނެ ކަމަށެވެ. އޭގެ ބަދަލުގައި ވަނީ ޗެރިޓީތަކަށް އެހީވާން ކުޅުންތެރިންގެ ކިބައިން އެދިފައެވެ. އަދި ކުޅުންތެރިންގެ މުސާރަ ކުޑަނުކުރި ނަމަވެސް، އެ ކްލަބުގެ މުވައްޒަފުން ނޯޕޭ ލީވްއަށް ނުފޮނުވާނެ ކަމަށާއި، މުވައްޒަފުންނަށް ބަރާބަރަށް މުސާރަ ދޭނެ ކަމަށް ވަނީ ބުނެފައެވެ.

ޗެރިޓީތަކަށް އެހީވާން ކުޅުންތެރިންގެ ކިބައިން އެދުނުއިރު، މީގެ ކުރިން ޗެލްސީން ވަނީ ކޮވިޑް-19 އާ ގުޅިގެން އެންމެ ބޭނުން ޖެހިފައިވާ ފަރާތްތަކަށް 78،000 މީލް ޕެކް ފޯރުކޮށްދީފައެވެ. އަދި ޗެލްސީގެ ސްޓެމްފޯޑް ބްރިޖްގެ އެއް ހޮޓާވެސް ވަނީ ނެޝަނަލް ހެލްތު ސާވިސަސްގެ ބޭނުމަށް ދޫކޮށްފައެވެ.

ޕްރިމިއާ ލީގުން މިހާތަނަށް ކުޅުންތެރިންގެ މުސާރަ ކުޑަކޮށްފައިވަނީ އާސެނަލް، ޝެފީލްޑް ޔުނައިޓެޑް، ސައުތެމްޓަން އަދި ވެސްޓް ހޭމް ޔުނައިޓެޑުންނެވެ.

ކޮވިޑް-19 ގެ ސަބަބުން އިނގިރޭސި ޕްރިމިއާ ލީގުގެ ކުޅުންވެސް މުއްދަތެއް ނެތް ގޮތަށް މެދު ކަނޑާލާފައިވާއިރު، ގިނަ ކްލަބުތަކަށް ވަނީ މާލީ ގޮތުން އަސަރު ކޮށްފައެވެ. އެގޮތުން މިފަހަރުގެ ސީޒަން ފުރިހަމަ ނުކުރެވިއްޖެނަމަ، ކްލަބުތަކަށް އެއް ބިލިއަން ޔޫރޯގެ ގެއްލުން ވާނެ ކަމަށް ވަނީ ރިޕޯޓުކޮށްފައެވެ.