ކަރަންޓީނު ފެސިލިޓީސްގައި ތިބި ފަރާތްތަކަށް ކެއަރ ޕެކޭޖް ފޮނުވުމުގެ ފުރުސަތު އަނެއްކާވެސް ހުޅުވާލައިފިއެވެ.
ދަރުބާރުގޭގައި ގާއިމްކޮށްފައިވާ ނެޝަނަލް އިމެރޖެންސީ އޮޕަރޭޝަން ސެންޓަރު (އެންއީއޯސީ) ގައި ނޫސްވެރިންނަށް މައުލޫމާތު ދެއްވަމުން އެ ސެންޓަރު ތަރުޖަމާނު މުހައްމަދު މަބްރޫކް އަޒީޒް ވިދާޅުވީ، ކަރަންޓީނު ފެސިލިޓީސްތަކުގައި ތިބި މީހުންނަަށް އާއިލާތަކުގެ ފަރާތުން ކެެއާ ޕެކޭޖް ފޮނުވަން ފުރުސަތު އަނެއްކާވެސް ހުޅުވާލާފައިވާ ކަމަށެވެ.
މަބްރޫކް ވިދާޅުވީ، އެ ތަކެތި ބަލައިގަތުމަށް ހަމަޖެހިފައިވަނީ ކަލާފާނު ސްކޫލުގައި ކަމަށެވެ. ކަރަންޓީނުގައި ތިބި ފަރާތްތަކަށް ހަވާލުކުރާ ކެއަރ ޕެކޭޖްތައް ބަލައިގަތުމަށް ހަމަޖެހިފައިވަނީ ހޮނިހިރު އަދި ބުދަ ދުވަހު ހެނދުނު 11 އިން ފެށިގެން މެންދުރުފަހު ތިނަކާއި ހަމަޔަށެވެ.
ސަރުކާރުން ކަރަންޓީނު ފެސިލިޓީސްގެ ގޮތުގައި މިހާރު ދަނީ ބައެއް ރިސޯޓްތައްވެސް ބޭނުން ކުރަމުންނެވެ. އޭގެ އިތުރުންވެސް އެހެނިހެން ތަންތަންވެސް ކަރަންޓީނު ފެސިލިޓީސްގެ ގޮތުގައި ބޭނުން ކުރުމުގެ މަސައްކަތް ކުރަމުންދާ ކަމަށް ސަރުކާރުން ވަނީ މީގެ ކުރިން ހާމަކޮށްފައެވެ.
މީގެ ކުރިން ބޭއްވި ޕްރެސްކޮންފަރެންސްގައި ތަރުޖަމާނު މަބްރޫކް ވިދާޅުވެފައިވަނީ، ރާއްޖެއިން ބޭރުގައި ތިބި ދިވެހިން ރާއްޖެ ގެންނާނީ ކަރަންޓީނު ފެސިލިޓީސްތަކުން ޖާގަ ހުސްވާވަރަކުން ކަމަށެވެ.
