އާންމު އެއްގަމު ދަތުރުތައް ފަށަން ދުބާއީން ތައްޔާރުވެއްޖެ

ކޮވިޑް-19 ރޯގާއާއި ގުޅިގެން ރައްކާތެރިކަމުގެ ފިޔަވަޅެއްގެ ގޮތުން ދުބާއީ ސަރުކާރުން ހުއްޓާލާފައިވާ އާންމު އެއްގަމުގެ ދަތުރުތައް އަލުން ފަށަން ނިންމައިފިއެވެ.

މިކަން ހާމަކޮށް ދުބާއީގެ ރޯޑްސް އެންޑް ޓްރާންސްޕޯޓް އޮތޯރިޓީ (އާރްޓީއޭ) އިން ބުނެފައިވަނީ އެޕްރީލް މަހުގެ 26 ވަނަ ދުވަހުން ފެށިގެން މެޓްރޯ ދަތުރުތަކާއި، އާންމު ބަސްދަތުރުތަކާއި، ޓެކްސީގެ ޚިދުމަތް އަލުން ފެށުމަށް ނިންމާފައިވާކަމަށެވެ.

އާރްޓީއޭއިން ބުނެފައިވަނީ ޓެކްސީތަކުން މިދަނޑިވަޅުގައި ޢަމަލުކުރަންޖެހޭ ބައެއް އުޞޫލުތައް ކަނޑައަޅާފައިވާނެކަމަށެވެ. އެގޮތުން ޓެކްސީދުއްވާ މީހާއާއި، ފަސިންޖަރުންނާއި ދެމެދު އައިސޮލޭޓަރސް ހަރުކުރުމާއެކު ފަހަތު ސީޓުގައި ބޭތިއްބޭނީ ދެ ފަސިންޖަރުންގެގޮތުގައި ނިންމާފައިވާކަމަށެވެ.

ދުބާއީގައި ކޮވިޑް-19 ފެތުރެމުންދާތީ، ވައިރަސް ކޮންޓްރޯލް ކުރުމަށް މަދަނީގޮތުން ގިނަ ކަންތައްތަކެއް ދަނީ ތަންފީޒުކުރަމުންނެވެ. އޭގެ ތެރޭގައި ބައިނަލްއަޤުވާމި އުދުހުންތަކާއި، މަދަނީ އުދުހުންތަކުގެ އިތުރުން އާންމު އެއްގަމު ދަތުރުފަތުރު ވަގުތީ ގޮތުން ހުއްޓާލުން ހިމެނެއެވެ. އަދި ސްކޫލް، ކޮލެޖް، ޔުނިވަރސިޓީތައް ބަންދުކޮށް އާންމު ޚިދުމަތްތައް ދޭ އިދާރާތައް ބަންދުކުރުން ހިމެނެއެވެ. އެހެންނަމަވެސް ބަރަކާތްތެރި ރަމަޟާންމަހު ޢާންމު ރައްޔިތުންނަށް ލުއި ފަސޭހަކޮށްދިނުމުގެ ގޮތުން ކޮވިޑް-19 އާއި ގުޅިގެން އެޅި ބައެއް ހަރުކަށި ފިޔަވަޅުތައް ދަނީ ލުއިކުރަމުންނެވެ.