ސީރިޔާގައި މިމަހު ކުރީކޮޅު ދިން ކެމިކަލް ހަމަލާއާއި ގުޅިގެން، އެމެރިކާއިން އެގައުމަށް އެޅި ދަތިކުރުމުގެ ފިޔަވަޅުގެ ގެއްލުން ވާނީ އާދައިގެ ރައްޔިތުންނަށް ކަމަށް ސީރިޔާ ސަރުކާރުން ބުނެފިއެވެ.

ސީރިޔާގެ ފޮރިން މިނިސްޓަރުގެ ނައިބު ފައިސަލް މަކްދޫދް މީޑިއާތަކަށް ވިދާޅުވީ އެމެރިކާ އިން އެޅި ދަތިކުރުމުގެ ފިޔަވަޅުތަކުގެ ގެއްލުން ވާނީ އާދައިގެ ރައްޔިތުންނަށް ކަމަށާއި، އެއީ ބޯނެ ކިރާއި، އަސާސީ ތަފާތު ޚިދުމަތްތަކުން މަހުރޫމުވެފައިވާ މީހުން ކަަމަށެވެ.

މިހިނގާ އޭޕްރީލް މަހު ސީރިޔާ އަށް ދެވުނު ކެމިކަލް ހަމަލާ އާއި ގުޅިގެން ސީރިޔާ ސަރުކާރަށް އަޅާ އާންމުވެގެންވާ ދަތިކުރުމުގެ ފިޔަވަޅެއްގެ ގޮތުން ސީރިޔާ ސަރުކާރުގެ އެޖެންސީއެއްގެ 271 މުވައްޒަފަކަށް އެމެެރިކާ އިން ދަތިކުރުމުގެ ފިޔަވަޅު ދާދިފަހުން ވަނީ އަޅާފައެވެ.

ކެމިކަލް ހަމަލާއާއި ގުޅިގެން އެމެރިކާ ސަރުކާރުން ދަތިކުރުމުގެ ފިޔަވަޅު އެޅީ ކެމިކަަލް ހަތިޔާރާއި އަދި ބެލިސްޓިކް މިސައިލް އުފައްދާ އެޖެންސީއަކަށްވާއިރު، އެ އެޖެންސީ އަކީ ސީރިޔަން ސައިންޓިފިކް ސްޓަޑީސް އެންޑް ރިސާޗް ސެންޓާ (އެސްއެސްއާރްސީ) އެވެ.

ސީރިޔާގެ ފޮރިން މިނިސްޓަރުގެ ނައިބު ފައިސަލް ވިދާޅުވީ ސީރިޔާ ސަރުކާރުން ހާދިސާ ތަހުގީގު ކުރުމަށް ކޮމިޓީއެއް އުފައްދާފައިވާ ކަމަށާއި އަދި ސަރުކާރުން އެކިގައުމުތަަކަށް ނިސްބަތްވާ ކަމާބެހޭ މާހިރުންނަށް ކަންހިނގައިދިޔަ ގޮތް ބެލުމަށް ވަޑައިގަތުމަށް، މަރުހަބާ ވިދާޅުވާ ކަމަށެވެ.

ސީރިޔާގެ އިދްލީބަށް އޭޕްރީލް ކުރީކޮޅު ދިން ކެމިކަލް ހަމަލާ އާއި ގުޅިގެން މަދުވެގެން 80 މީހުން މަރުވެ 557 މީހުންނަށް ފަރުވާ ދޭންޖެހިފައި ވެއެވެ. މިހަމަލާއާ ގުޅިގެން ބައިނަލްއަގްވާމީ މުޖުތަމައުއިން އިނގިލި ދިއްކުރަނީ ރައީސް ބައްޝާރުލް އަސަދުގެ ސަރުކާރަށެވެ. ނަމަވެސް އަސަދުގެ ސަރުކާރުން ބުނަމުން ދަނީ އެފަދަ ހަމަލާއެއް ނުދޭ ކަމަށެވެ.

އެސްއެސްއާރްސީ ގެ 271 މުވައްޒަފުންގެ އެސެޓްތައް އެމެރިކާ އިން ފްރީޒް ކުރިއިރު، އެެމެރިކާ އިން ގަބޫލުކުރާ ގޮތުން މިމަހު ކުރީކޮޅު ސީރިޔާގައި ދިން ކެމިކަލް ހަަމަލާ ގައި ބޭނުން ކުރި "ނާވް އެޖެންޓް" އުފައްދާފައި ވަނީ އެސްއެސްއާރްސީ އިންނެވެ.

އެމެރިކާ އިން އެސްއެސްއާރްސީ ގެ 271 މުވައްޒަފެއްގެ އެސެޓްތައް ތައް ފްރީޒް ކުރުމުގެ ސަބަބުން އެ މުވައްޒަފުންނާ އެމެރިކާގެ އެއްވެސް ރައްޔިތަކަށް މުއާމަލާތު ކުރުންެވެސް މަނާވާނެއެވެ.