ޒަކާތުގެ ފައިސާ ކޮވިޑް-19 ޖެހިފައިވާ ފަޤީރުންނަށް ދެވިދާނެ: ދުބާއީ އިސްލާމިކް އެފެއަރޒް

ޒަކާތު ފައިސާ ކޮވިޑް-19 ޖެހިފައިވާ ފަޤީރުންނަށް ދިނުން ހުއްދަ ކަމަށް ދުބާއީގެ އިސްލާމިކް އެފެރއަޒް އެންޑް ޗެރިޓޭބަލް އެކްޓިވިޓީސް ޑިޕާޓްމަންޓުގެ ގްރޭންޑް މުފްތީ އަދި ޑިރެކްޓަރ އޮފް އިފްތާ, އަޙްމަދު ބިން އަބްދުލް އަޒީޒް އަލް-ހަދާދު ވިދާޅުވެއްޖެއެވެ.

ގަލްފުގެ މީޑީއާތަކުން ރިޕޯޓުކޮށްފައިވާގޮތުގައި، ހޮސްޕިޓަލަކަށް ނުވަތަ ފަރުވާދޭ މަރުކަޒަކަށް ބޭނުންވާ ފަންނީ އާލާތްތައް ގަތުމަށާއި، މުވައްޒަފުންނަށް މުސާރަދިނުމަށް އެހީއެއްގެ ގޮތުން ޒަކާތު ފައިސާ ހަދިޔާނުކުރެވޭނެކަމަށް މުފްތީ ވިދާޅުވެފައިވެއެވެ. އެއީ މާތްވެގެންވާ އިސްލާމްދީނުގައި އަންގަވާފައިވާގޮތުގައި ޒަކާތް ދޭން ޖެހެނީ އެއަށް އެންމެ ބޭނުންޖެހިފައިވާ މީހުންނަށް ކަމުގައި ވާތީއެވެ. އެހެންނަމަވެސް ތަނަވަސް މީހުން އެފަދަ މަރުކަޒުތަކައް ޞަދަޤާތުގެގޮތުގައި މާލީގޮތުން އެހީތެރި ވެވިދާނެކަމަށް އޭނާ ވިދާޅުވެފައިވެއެވެ.

މި ފަތުވާ މުފްތީ ދެއްވާފައިވަނީ ކީރިތި ޤުރުއާނާއި، ރަސޫލާގެ ޙަދީޘްތަކައް ރިޢާޔަތްކުރެއްވުމަށްފަހުއެވެ.

މުފްތީ ވިދާޅުވެފައިވަނީ ކޮވިޑް-19 ޖެހި ފަރުވާއާއި އެހެނިހެން ބޭނުންތައް ފުއްދުމަށް ނުކުޅެދިފައިވާ މީހުންނާއި، މި ރޯގާއާއި ގުޅިގެން ވަޒީފާ ގެއްލި ޙާލުގައި ޖެހިފައިވާ މީހުންނާއި، މި ދަނޑިވަޅުގައި ފައިސާ ލިބޭނެ ގޮތް ހުސްވެފައިވާ މީހުންނަށް ޒަކާތުގެ ފައިސާ ދެވިދާނެކަމަށެވެ. މީގައި އާއިލާގެ މީހުންނާއި އަވަށްޓެރިންވެސް ހިމެނިދާނެކަމަށްވެސް މުފްތީ ވިދާޅުވެފައިވެއެވެ. އަދި ޢާއިލާ މީހަކު ޙާލުގައި ޖެހިފައި ހުރިނަމަ، އެންމެ އެދެވިގެންވަނީ އެމީހުންނަށް ދިނުންކަމުގައިވެސް މުފްތީ ވިދާޅުވެފައިވެއެވެ.

އާންމުގޮތެއްގައި ދުބާއީގައި ޒަކާތް ދައްކަނީ ނިޞާބަށްވާ ފައިސާއިންނެވެ. އެހެންނަމަވެސް އާދަކާދައިގެ މަތިން ބައެއް މީހުން އަދިވެސް ރަނާއި ރިހިން ޒަކާތް ދައްކައި އުޅެއެވެ.