ޗާޕްކުރި ފައިސާ ނުގެނެވި ޔަމަނުގައި ފައިސާ މަދުވެފައި

ސައުދީ އަރަބިއްޔާ އާއި ގުޅިފައިވާ ކޯލިޝަނުން ޔަމަނުގެ އިގްތިސާދުގެ ވައިނޮޅީގައި ހިފައި ހާސްކޮށްލާފައިވާ ކަމަށް ޔަމަނުގެ މަރުކަޒީ ބޭންކުން ބުނެފިއެވެ.

އެ ގައުމުން މިހެން ބުނީ ރަޝިއާގައި އަލަށް ޗާޕްކޮށްފައިވާ ޔަމަނުގެ ފައިސާ އެ ގައުމަށް އުފުލުން އެ ކޯލިޝަނުން ހުއްޓުވުމާ ގުޅިގެންނެވެ.

ޔަމަނުގެ މަރުކަޒީ ބޭންކްގެ ގަވަރނަ މަންސްރު އަލް ޤައިތީ އާދީއްތަ ދުވަހު ވިދާޅުވީ ފައިސާ ހިފައިގެން އަދަނަށް ދަތުރުކުރަން އުޅުނު 13 ފްލައިޓެއް މިދިޔަ އޭޕްރީލް މަހުން ފެށިގެން އެ ކޯލިޝަނުން ހުއްޓުވާފައިވާ ކަމަށެވެ.

އެސޯސިއޭޓެޑް ޕްރެސްއިން ރިޕޯޓްކޮށްފައިވާ ގޮތުގައި ޔަމަނުގެ މަރުކަޒީ ބޭންކްގެ ގަވަރނަރ ވަނީ ސައުދީ ކޯލިޝަނުން "ޔަމަނުގެ އިގްތިސާދު ނޭވާ ހާސްކޮށްލާފައިވާ ކަމަށް" ތުހުމަތުކުރައްވާފައެވެ.

ސައުދީ އަރަބިއްޔާ އާއި ގުޅިފައިވާ ގައުމުތަކުން ޔަމަނަށް އެރީ ޔަމަނުގައި އޮތް ގާނޫނީ ސަރުކާރު ،ހޫޘީންނާއި ކުރީގެ ރައީސް އަލީ އަބްދުﷲ ސާލިހަށް ވަފާތެރި ސިފައިން ބަޤާވާތަކުން ބަދަލުކުރަން އުޅުމުން އެ ސަރުކާރުގެ ދިފާއުގައެވެ.

ޔަމަނުގެ ރައީސް އަބްދު ރައްބޫ މަންސޫރު ހާދީއަށް ސައުދީ އަރަބިއްޔާއިން ހިމާޔަތްދީ ސައުދީ ކޯލިޝަނުން ޔަމަނަށް ހަމަލާދޭން ފެށީ 2015 ވަނަ އަހަރުގެ މާޗް މަހުގެ 26 ވަނަ ދުވަހުއެވެ.

ޔަމަނުގައި ފައިސާގެ ދަތިކަން ކުރިމަތިވެފައިވާއިރު އޭޕްރީލް މަހުން ފެށިގެން ފެތުރެމުން އަންނަ ކޮލެރާގައި 2،000 މީހުން މަރުވެފައިވާ ކަމަށް ދުނިޔޭގެ ސިއްހަތު ޖަމްއިއްޔާއިން ބުނެއެވެ.

ޑަބްލިއުއެޗްއޯއިން ލަފާކޮށްފައިވާ ގޮތުގައި މިހާތަނަށް 500،000 އެއްހާ މީހުންނަށް ވަނީ ކޮލެރާ ޖެހިފައެވެ.