ހައުސިންގ މިނިސްޓްރީގެ ބައެއް ޚިދުމަތްތައް ދިނުމަށް ނިންމައިފި
23 އެޕްރީލު 2020 | ބުރާސްފަތި 13:45ޚިދުމަތްތައް ފަސޭހައިން ލިބޭނެ އިންތިޒާމް ހަމަޖެހިފައި އޮތުމަކީ މުހިންމު ކަމެއް
މިދަނޑިވަޅުގައި ސަރުކާރު ބަންދުވެފައި އޮތް ނަމަވެސް ހައުސިންގ މިނިސްޓްރީގެ ބައެއް ޚިދުމަތްތައް ރައްޔިތުން ބޭނުންވޭ
އާންމުސިއްހަތުގެ ކުއްލި ނުރައްކަލުގެ ހާލަތުގައި މިނިސްޓްރީ އޮފް ހައުސިންގ އެންޑް އަރބަން ޑިވެލޮޕްމަންޓުން ބައެއް ޚިދުމަތްތައް ދިނުމަށް ނިންމައި، ގަޑިތައް ކަނޑައަޅައިފިއެވެ.
ހައުސިންގ މިނިސްޓްރީން ބުނީ ރާއްޖޭގައި ކޮވިޑް-19 ފެތުރުން ކޮންޓްރޯލްކޮށް، އާންމު ރައްޔިތުންގެ ސިއްހަތާއި ރައްކާތެރިކަމަށްޓަކައި، އާންމު ސިއްހަތު ރައްކާތެރިކުރުމުގެ ޤާނޫނުގެ ދަށުން އަޅަންޖެހޭ ޚާއްސަ ފިޔަވަޅުތައް އެޅުމަށް މަގުފަހިކުރުމުގެ ގޮތުން، އެޤާނޫނުގެ 34 ވަނަ މާއްދާގެ (ރ) އާއި (ޅ) ގެ ދަށުން، ޑިރެކްޓަރ ޖެނެރަލް އޮފް ޕަބްލިކް ހެލްތުއަށް ލިބިދޭ ބާރުގެ ދަށުން، މިމަހުގެ 17ން އިން 14 ދުވަހަށް އިތުރުކޮށްފައިވާ ކަމަށެވެ.
މިއަމުރު ތަންފީޒުކުރުމުގެ ގޮތުން މިމަހުގެ 19 ވަނަ ދުވަހުން ފެށިގެން އޭޕްރިލް މަހުގެ 30 ވަނަ ދުވަހުގެ ނިޔަލަށް ސަރުކާރު އޮފީސްތައް ނުހުޅުވާ ގޮތަށް ރައީސް ސޯލިހު ނިންމާފައިވާ ކަމަށެވެ.
ހައުސިން މިނިސްޓްރީން ބުނީ މިނާޒުކު ހާލަތުގައިވެސް މިނިސްޓްރީގެ ޚިދުމަތްތައް ފަސޭހައިން ލިބޭނެ އިންތިޒާމް ހަމަޖެހިފައި އޮތުމަކީ މުހިންމު ކަމެއް ކަމަށް ދެކޭ ކަމަށެވެ.
އެގޮތުން އޮފީހާގުޅޭ އާންމު ކަންކަމުގައި މަޢުލޫމާތު ލިބިގަތުމަށް ކޮންމެ ހަފުތާއެއްގެ އާދީއްތަ ދުވަހުން ފެށިގެން ބުރާސްފަތި ދުވަހުގެ ހެނދުނު 09:00 ން މެންދުރު 14:00ށް 3004300/3004302 ނަންބަރު ފޯނަށް ގުޅުމަށާއި، "މަގޭހިޔާވެހި" ހެލްޕްޑެސްކް އަށް ގުޅުއްވުމަށް ކޮންމެ ހަފުތާއެއްގެ އާދީއްތަ ދުވަހުން ފެށިގެން ބުރާސްފަތި ދުވަހުގެ ހެނދުނު 09:00 އިން މެންދުރު 14:00 އަށް 3021500/3021503 ނަންބަރު ފޯނުން ގުޅުމަށް މިނިސްޓްރީން އެދިފަވެއެވެ.
މީގެ އިތުރުން ހައުސިންގ މިނިސްޓްރީން ބުނީ މިނިސްޓްރީއިން ވަކި ގޮތަކަށް ހުށަހެޅުމަށް އެދި އިއުލާން ކުރެވިފައިވާ ތަކެތި ފިޔަވައި، މިނިސްޓްރީއަށް ހުށަހަޅާ ސިޓީއާއި ތަކެތި ބަލައިގަތުން އީ-ގަވް ނުވަތަ އީމެއިލްsecretariat@housing.gov.mvމެދުވެރިކޮށް ހުށަހެޅުމަށް އެދޭ ކަމަށެވެ.
ހައުސިންގ މިނިސްޓްރީން ބުނީ މިނިސްޓްރީ އާއި ގުޅުން ހުރި ކަމެއްގައި އިމަރޖެންސީކޮށް މެސެޖްކުރުމަށް އެދޭ ކަމަށެވެ. އެގޮތުން 7950712 އަށް ވައިބަރ/ ވަޓްސްއަޕް/ ޓެލެގްރަމް މެސެޖް ކުރުމަށް އެދިފައިވެއެވެ.
