ކޮވިޑް-19 ޖެހިގެން ރަނގަޅުވި މީހުންގެ އަދަދު 7 ލައްކައަށްވުރެ މައްޗަށް
ވައިރަސް ޖެހުނު މީހުންގެ ތެރެއިން އެންމެ ގިނަ އަދަދެއްގެ ބަޔަކު ރަނގަޅުވެގެން ރިޕޯޓްކުރަމުން އަންނަނީ ޖަރމަނީން
ކޮވިޑް-19 ޖެހޭ މީހުންގެ އަދަދު ވަނީ އިތުރުވަމުން
ދުނިޔޭގައި މިހާރު ހަލުވިކަމާއެކު ފެތުރެމުންދާ ކޮވިޑް-19 ޖެހިގެން ރަނގަޅުވީ މީހުންގެ އަދަދު 7 ލައްކައަށްވުރެ މައްޗަށް އަރައިފި އެވެ.
އެންމެފަހުގެ ތަފާސް ހިސާބުތަކުން ފެންނަގޮތުގައި މިވައިރަސް ޖެހިގެން ރަނގަޅުވި މީހުންގެ އަދަދު ވަނީ 722,055 ށް އަރާފަ އެވެ. ބަލިޖެހުނު މީހުންގެ ތެރެއިން އެންމެ ގިނަ އަދަދެއްގެ ބަޔަކު ރަނގަޅުވެގެން ރިޕޯޓްކުރަމުން އަންނަނީ ޖަރމަނީންނެވެ. އެއީ 103,300 މީހުންނެވެ. އެގައުމުގައި 150,648 މީހުންނަށް ވައިރަސް ޖެހިފައިވެ އެވެ. ވައިރަސް މިހާރުވެސް ހަލުވިކަމާއެކު ފެތުރެމުންދާ ގައުމުތަކުގެ ތެރެއިން ބަލި ޖެހޭ މީހުންގެ ނިސްބަތުން ދެން އެންމެ ގިނަބަޔަކު ރަނގަޅުވެގެން ރިޕޯޓްކުރަމުން އަންނަނީ އިރާނުންނެވެ. އެގައުމުގައި 85,996 މީހުންގެ ތެރެއިން 63,113 މީހުންނެވެ.
ބަލިޖެހޭ މީހުންގެ ނިސްބަތަށް ބަލާއިރު އެންމެ މަދުން މީހުން ރަނގަޅުވެގެން ރިޕޯޓްކުރަމުން އަންނަ ގައުމަކީ އެމެރިކާ އެވެ. އެމެރިކާގައި 849,092 މީހުންނަށް ވައިރަސް ޖެހިފައިވާއިރު ރަނގަޅު ވެފައިވަނީ 84,050 މީހުންނެވެ. ދެވަނަ އަށް އެންމެ ގިނަ މީހުންނަށް ވައިރަސް ޖެހެމުން އަންނަ ސްޕެއިންގައި 208,389 މީހުންނަށް ވައިރަސް ޖެހިފައިވާއިރު ރަނގަޅު ވެފައިވަނީ 85,915 މީހުންނެވެ. އިޓަލީގައި 187,327 މީހުންނަށް ވައިރަސް ޖެހިފައިވާއިރު 54,543 މީހުން ވަނީ ރަނގަޅުވެފަ އެވެ.
މިހާތަނަށް މުޅި ދުނިޔެއިން 2,638,909 މީހުންނަށް ވަނީ ވައިރަސް ޖެހިފަ އެވެ. އަދި މިބަލީގައި 184,249 މީހުންވަނީ މަރުވެފަ އެވެ.
