ރާއްޖޭގައި ތިބި ބިދޭސީން އަނބުރާ ގައުމަށް ގެންދަން ތިން ފްލައިޓެއް ހަމަޖެހިއްޖެ
އިޓަލީގެ ނިއޫސް ފްލައިޓް އާއި ގަރޫޑާ އިންޑޮނޭޝިއާ އެއަރލައިންސް ފްލައިޓް ފުރާނީ އޭޕްރިލް 24 ގައި
ވެލާނާ އިންޓަނޭޝަނަލް އެއަރޕޯޓަށް ފުރަން ގޮސްފައި ތިބި ބިދޭސީންތަކެއް
ގައުމަށް ނުދެވި ރާއްޖޭގައި ތާށިވެފައި ތިބި ބިދޭސީ މުވައްޒަފުންނާއި ފަތުރުވެރިން އަނބުރާ ގައުމަށް ގެންދިއުމަށް ތިން ފްލައިޓެއް ހަމަޖެހިއްޖެ އެވެ.
ގައުމަށް ނުދެވިފައި ތިބި ބިދޭސީން ބަލާ އަންނަ ފްލައިޓްތަކުގެ ތެރެއިން އިޓަލީގެ ނިއޫސް ފްލައިޓް އާއި ގަރޫޑާ އިންޑޮނޭޝިއާ އެއަރލައިންސް ފްލައިޓް ވެލާނާ އިންޓަރނޭޝަނަލް އެއަރޕޯޓުން ފުރަން ހަމަޖެހިފައިވަނީ އޭޕްރިލް 24 ވަނަ ދުވަހު އެވެ. އަދި ފިލިޕީންސް އެއަރލައިން ފްލައިޓް ފުރުމަށް ހަމަޖެހިފައިވަނީ އޭޕްރިލް 25 ވަނަ ދުވަހު އެވެ.
މި ފްލައިޓްތަކުގައި ފުރަންޖެހޭ ފަސިންޖަރުން ފުރުމުގެ އިންތިޒާމްތައް ހަމަޖައްސަނީ ޓޫރިޒަމް މިނިސްޓްރީ އާއި މިނިސްޓްރީ އޮފް ފޮރިން އެފެއަރޒް އަދި ޓޫރިސްޓް ޕޮލިސް ގުޅިގެންނެވެ. އަދި މި ފަރާތްތައް އެއަޕޯޓަށް ގެންދިއުމުގައި އަމަލުކުރަންޖެހޭ ގޮތުގެ ތަފްސީލު ވެސް ޓޫރިޒަމް މިނިސްޓްރީ އިން ވަނީ އާންމުކޮށްފަ އެވެ.
އެގޮތުން އެއަރޕޯޓަށް ދަތުރުކުރުމުގެ ހުއްދަ ފުލުހުން ދޭނީ މި ފްލައިޓްތަކުން ޖާގަ ޔަގީންކޮށް ޓިކެޓް ނަގާފައިވާ ފަރާތްތަކަށް އެކަންޏެވެ. ނަމަވެސް، މި ފަރާތްތައް އެއަރޕޯޓަށް ގެންދާ އުޅަނދުތަކުގެ ފަޅުވެރިންނަށް އެއަރޕޯޓަށް ނުފޭބޭނެ ކަމަށް ޓޫރިޒަމް މިނިސްޓްރީން ވަނީ އަންގާފަ އެވެ.
ފުރަން އެއަރޕޯޓަށް ދަތުރުކުރަން ޖެހޭ ހުރިހާ ފަރާތްތަކަށް ދޭންޖެހޭ ހުރިހާ އެއްބާރުލުމަކާއި އެހީ ފޯރުކޮށްދިނުމަށް ރިސޯޓުތަކާއި، ގެސްޓްހައުސްތައް އަދި ރަށު ކައުންސިލްތަކަށް މިނިސްޓްރީން ވަނީ އެދިފަ އެވެ.
ކޮވިޑް-19 އާ ގުޅިގެން ވައިގެ ދަތުރުފަތުރުތައް ހުއްޓުމަކަށް އައިސްފައިވާއިރު، އަނބުރާ ގައުމަށް ނުދެވި ގިނަ އަދަދެއްގެ ފަތުރުވެރިންނާއި ބިދޭސީ މުވައްޒަފުން އެބަތިބި ކަމަށް ޓޫރިޒަމް މިނިސްޓްރީން ވަނީ މައުލޫމާތު ދީފަ އެވެ. އަދި މި ފަރާތްތަކުގެ އަނބުރާ ގައުމަށް ފޮނުވާލުމުގެ އިންތިޒާމުތައް ހަމަޖެއްސުމަށް މަޝްވަރާކުރާ ކަމަށް ވަނީ ބުނެފަ އެވެ.
