އައްޑޫ ސިޓީ، ހިތަދޫ ފެނަކަ ޕަމްޕް ސްޓޭޝަންގައި އަލިފާން ރޯވެއްޖެއެވެ.

ފުލުހުންގެ މީޑިއާ އޮފިޝަލް ވިދާޅުވީ އަލިފާނުގެ ހާދިސާއެއް ހިނގައިގެން އުޅޭކަމުގެ ރިޕޯޓް ލިބިފައިވަނީ އޭޕްރީލް 21 ވަނަ ދުވަހުގެ 16:53 ހާއިރު ކަމަށެވެ. އަދި މި ހާދިސާގައި އެއްވެސް މީހަކަށް އަނިޔާއެއް ލިބިފައިނުވާ ކަމުގައެވެ.

ފުލުހުން ބުނީ، ރޯވެފައިވާ އަލިފާންގަނޑު ނިއްވާލެވިފައިވާކަމަށާއި، މައްސަލަ އިތުރަށް ތަހުޤީޤު ކުރަމުން އަންނަ ކަމަށެވެ. ނަމަވެސް އެއީ ބަޔަކު ގަސްދުގައި ކުރިކަމެއް ކަމެއް ނުވަތަ ނޫންކަމެއް ފުލުހުން ހާމައެއް ނުކުރެއެވެ.

ފެނަކަ ކުންފުނީގެ މެނޭޖިންގ ޑިރެކްޓަރ އަހުމަދު ސައީދު ރާއްޖެ.އެމްވީއަށް މައުލޫމާތު ދެއްވަމުން ވިދާޅުވީ މި ހާދިސާއާއި ގުޅިގެން ވަރަށް ބޮޑު ގެއްލުމެއް ލިބިފައިވާކަމަށެވެ. އަދި ލިބުނުގެ ގެއްލުމުގެ ސަބަބުން ހިދުމަތް ކެނޑުމުގެ ބިރު އެބައޮތްކަމަށާއި، ކުންފުނިން މަސައްކަތް ކުރަމުން އަންނަނީ ރައްޔިތުންނަށް ދަތިނުވާނެގޮތަކަށް ހައްލެއް ހޯދުމަށް ކަމަށެވެ.

ސައީދު ވިދާޅުވީ ބަޔަކު ހިންގާ މިފަދަ އަމަލުތަކުގެ ސަބަބުން ކުންފުނީގެ އަޒުމަށް އެއްވެސް ބަދަލެއް ނާންނާނެކަމަށާއި، ކުންފުނިން ސާބިތުކަމާއެކު ރައްޔިތުންނަށް ހިދުމަތް ފޯރުކޮށްދިނުމުގައި ދެމިތިބޭނެކަމުގެ ޔަޤީންކަން އަރުވާކަމަށެވެ.

އަލިފާން ރޯވި ޕަންޕުސްޓޭޝަނަކީ، މައި ޕަންޕު ސްޓޭޝަނެއްގެ ގޮތުގައި ފެނަކައިން ބޭނުން ކުރަމުން އަންނަ ސްޓޭޝަނެކެވެ.

މިފަހަކަށް އައިސް، ރާއްޖޭގެ އެކި ސަރަހައްދު ތަކުގައި އަލިފާނުގެ ހާދިސާތައް ހިނގާ މިންވަރު އިތުރުވެފަައި ވެއެވެ. މިމަހުގެ 15 ދުވަހު ބޭއްވި ނޫސްވެިރންގެ ބައްދަލުވުމުގައި ކޮމިޝަނަރަ އޮފް ޕޮލިސް މުހައްމަދު ހަމީދު ވިދާޅުވެފައިވަނީ، އަލިފާނުގެ ގިނަ ހާދިސާތަކަކީ ބަޔަކު ގަސްތުގައި، ރާވައިގެން ކޮށްފައިވާ ކަންކަމެވެ. އަދި އޭގެތެރޭގައި ފުލުހުން މަސްތުވާ ތަކެއްޗާއި ދެކޮޅަށް ކުރާ މަސައްކަތްތަކުގެ ސަބަބުން، ހިންގާފައިވާ ހާދިސާތަކާއި، ހަރުކަށި ވިސްނުމުގެ ފަރާތްތަކާއި ގުޅުންހުރި ހާދިސާތައް ފާހަގަ ކުރެވިފައިވާ ކަމަށެވެ. ކޮމިޝަނަރު ވަނީ އެފަދަ މައްސަލަތައް ބަލައި ހަރުކަށި ފިޔަވަޅުތައް އަޅަމުން ގެންދާނެ ކަމުގެ ޔަޤީންކަން ދެއްވައިފައެވެ.