ސައުދީއަރަބިއާގެ އެންމެ މުޤައްދަސް ދެ މިސްކިތް ކަމަށްވާ މައްކާގައި ހުންނަ މަސްޖިދުލް ޙަރަމްއާއި މަދީނާގައި ހުންނަ މަސްޖިދުލް ނަބަވީގައި ރަމަޟާން މަހުވެސް ޖަމާއަތުގައި ނަމާދު ނުކުރެވޭ ގޮތަށް ހަމަޖައްސައިފިއެވެ.

ކޮވިޑް-19 އާ ގުޅިގެން މަސްޖިދުލް ޙަރަމްއާއި މަސްޖިދުލް ނަބަވީގައި ޖަމާއަތުގައި ނަމާދު ކުރުން ހުއްޓާލާފައިވާއިރު، އެ ޤައުމުގެ މިހާރުގެ ޙާލަތަށް ބަލައި ހޯމަ ދުވަހު އެ ނިންމުމުގެ މުއްދަތު ވަނީ އިތުރުކޮށްފައެވެ. އެގޮތުން ކުރިއަށް އޮތް ރަމަޟާން މަހުވެސް އެ ދެ މިސްކިތުގައި ޖަމާއަތުގައި ފަރުޟު ނަމާދު ކުރުމާއި، ތަރާވީސް ނަމާދު ކުރުން މެދުކަނޑާލާފައިވާކަމަށް ބޭރުގެ މީޑިއާތަކުން ރިޕޯޓްކޮށްފައިވެއެވެ.

ނަމަވެސް ދެ މިސްކިތުގައިވެސް ފަރުޟު ނަމާދުގެ ބަންގި ގޮވާނެ ކަމަށާއި، ރަމަޟާން މަހު އަޅުކަން ކުރުމަށް އާންމުންނަށް މިސްކިތްތައް ބަންދުވެފައި ހުންނާނެ ކަމަށް މިސްކިތްތަކާއި ޙަވާލުވެ ހުންނަވާ އިމާމް ޝެއިޙް އަބްދުއްރަޙްމާން ބިން އަބްދުލްއަޒީޒް އާ ޙަވާލާދީ މީޑިއާތަކުން ރިޕޯޓްކޮށްފައިވެއެވެ.

ސައުދީން މިގޮތަށް ނިންމާފައިވާއިރު، ކުރިއަށް އޮތް ރަމަޟާން މަހު އެ ޤައުމުގެ އެހެން މިސްކިތް ތަކުގައިވެސް ޖަމާއަތުގައި ނަމާދު ނުކުރުމަށާއި، ކުރިއަށް އޮތް ފިތުރު އީދުގެ އީދު ނަމާދުވެސް ގޭގައި ކުރުމަށް ރައްޔިތުންނަށް ވަނީ އަންގާފައެވެ. އަދި ގިނަ މީހުން އެއްވެގެން ބާއްވާ ރޯދަ ވީއްލުމުގެ ހަރަކާތްތަކާއި ކެއުންތައް މިއަހަރު ނުބޭއްވުމަށްވެސް އަންގާފައިވެއެވެ.

އޭގެ އިތުރުން، އާދިއްތަ ދުވަހުން ފެށިގެން އެ ޤައުމުގައި ކާފިއު އިއުލާނު ކޮށްފައިވާއިރު، 24 ގަޑިއިރަށް ކާފިއު އިއުލާނުކުރި ސަރަޙައްދުތަކުގެ ތެރޭގައި ވެރިރަށް ރިޔާދްވެސް ހިމެނެއެވެ.

ސައުދީއަރަބިއާއިން މިހާތަނަށް ކޮވިޑް-19 ގެ 10،400ށް ވުރެ ގިނަ ކޭސް ފެނިފައިވާއިރު، މިހާތަނަށް 103 މީހުން ވައިރަސްގެ ސަބަބުން މަރުވެފައިވެއެވެ.