އާސެނަލްގެ ކުޅުންތެރިންގެ މުސާރަ ކުޑަކޮށްފި

އިނގިރޭސި ޕްރިމިއާ ލީގުގައި ވާދަކުރަމުން އަންނަ އާސެނަލްގެ ކުޅުންތެރިންގެ މުސާރަ ކުޑަކުރަން ނިންމައިފި އެވެ.

ހޯމަ ދުވަހު ނެރުނު ބަޔާނެއްގައި އާސެނަލުން ވަނީ އެޓީމުގެ ކުޅުންތެރިންގެ އިތުރަށް، ކޯޗު މިކޭލް އާޓެޓާ އާއި އިތުރު އޮފިޝަލުންގެ މުސާރައިން 12.5 އިންސައްތަ ކުޑަކުރަން ނިންމާފައިވާ ކަން ހާމަކޮށްފައެވެ. އަދި މި ގޮތަށް އަމަލުކުރަން ފަށާނީ އަންނަ މެއި މަހުން ފެށިގެންނެވެ.

މުސާރަ ކުޑަކުރަން އާސެނަލްގެ ކުޅުންތެރިން އެއްބަސްވީ އަންނަ ސީޒަނުގެ ޔުއެފާ ޗެމްޕިއަންސް ލީގަށް ކޮލިފައިވެއްޖެނަމަ، ކުޅުންތެރިންނަށް ބޯނަހެއް ދޭން އާސެނަލުން ނިންމުމާ ގުޅިގެންނެވެ. އެގޮތުން އަންނަ ސީޒަނުގެ ޔުއެފާ ޗެމްޕިއަންސް ލީގަށް ކޮލިފައިވެއްޖެނަމަ، ކޮންމެ ކުޅުންތެރިއަކަށް އެއް ލައްކަ ޕައުންޑުގެ ބޯނަހެއް ދޭން އާސެނަލުން ނިންމާފައިވާ ކަމަށް ރިޕޯޓުތައް ބުނެއެވެ. އަދި އަންނަ ސީޒަނުގެ ޗެމްޕިއަންސް ލީގު ކާމިޔާބުކޮށްފިނަމަ އިތުރު ފަސް ލައްކަ ޕައުންޑް، ނުވަތަ ޔޫރޮޕާ ލީގު ކާމިޔާބުކޮށްފިނަމަ އިތުރު އެއް ލައްކަ ޕައުންޑް ދޭން އާސެނަލުން ނިންމާފައިވާ ކަމަށްވެސް ރިޕޯޓުތައް ބުނެއެވެ.

ޕްރިމިއާ ލީގު ތާވަލުގައި އާސެނަލް މިވަގުތު އޮތީ ނުވަވަނައިގައި 40 ޕޮއިންޓާއެކު އެވެ.

އާސެނަލުން އެޓީމުގެ ކުޅުންތެރިންގެ މުސާރަ ކުޑަކުރަން ނިންމިއިރު، މީގެ ކުރިން ސައުތެމްޓަނާއި ވެސްޓް ހޭމް ޔުނައިޓެޑުންވެސް ވަނީ އެޓީމުގެ ކުޅުންތެރިންގެ މުސާރަ ކުޑަކޮށްފައެވެ. ދެން މުސާރަ ކުޑަކުރަން މަސައްކަތް ކުރަމުން އަންނަނީ ޗެލްސީ އާއި ވަޓްފޯޑުންނެވެ.

މިހާރު ދުނިޔޭގައި ހަލުވިކަމާއިއެކު ފެތުރެމުން އަންނަ ކޮރޯނާވައިރަސް (ކޮވިޑް-19) ގެ ސަބަބުން އިނގިރޭސި ޕްރިމިއާ ލީގުގެ ކުޅުންވެސް މުއްދަތެއް ނެތް ގޮތަށް މެދު ކަނޑާލާފައިވާއިރު، ގިނަ ކްލަބުތަކަށް ވަނީ މާލީ ގޮތުން އަސަރު ކޮށްފައެވެ. އެގޮތުން މިފަހަރުގެ ސީޒަން ފުރިހަމަ ނުކުރެވިއްޖެނަމަ، ކްލަބުތަކަށް އެއް ބިލިއަން ޔޫރޯގެ ގެއްލުން ވާނެ ކަމަށް ވަނީ ރިޕޯޓުކޮށްފައެވެ.