ވަޓްފޯޑުންވެސް ކުޅުންތެރިންގެ މުސާރަ ކުޑަކުރަނީ

ކޮރޯނާވައިރަސް (ކޮވިޑް-19) ގެ ސަބަބުން ކްލަބަށް ދިމާވާނެ މާލީ ހާލަތުން އަރައިގަތުމަށް، އިނގިރޭސި ކްލަބު ވަޓްފޯޑުންވެސް ކުޅުންތެރިންގެ މުސާރަ ކުޑަކުރަން މަޝްވަރާ ކުރަމުން އަންނަ ކަމަށް ރިޕޯޓުތައް ބުނެފިއެވެ.

ރިޕޯޓުތައް ބުނާ ގޮތުން ވަޓްފޯޑުގެ ކުޅުންތެރިންގެ އިތުރުން އެ ކްލަބުގެ ސީނިއާ މެނޭޖުމަންޓާއި، އެގްޒެކެޓިވް ޑިރެކްޓަރުންގެ މުސާރަވެސް ކުޑަކުރުމަށްވެސް އަންނަނީ މަޝްވަރާ ކުރަމުންނެވެ.

ވަޓްފޯޑުން ކުޅުންތެރިންގެ މުސާރަ ކުޑަކުރަން މަސައްކަތް ކުރަމުން އަންނަނީ، މިހާރު އެކްލަބަށް ދިމާވެފައިވާ މާލީ ދަތިކަމުގެ ސަބަބުންނެވެ.

ކޮވިޑް-19 އާ ގުޅިގެން އިނގިރޭސި ޕްރިމިއާ ލީގުގެ މެޗުތައް މުއްދަތެއް ނެތް ގޮތަށް ފަސްކޮސްފައިވާއިރު، މިހާތަނަށް ކުޅުންތެރިންގެ މުސާރަ ކުޑަކުރުމަށް ނިންމައިފައިވަނީ ސައުތެމްޓަނާއި ވެސްޓް ހޭމް ޔުނައިޓެޑުން އެކަންޏެވެ.

މީގެއިތުރުން ކުޅުންތެރިންގެ މުސާރަ ކުޑަކުރަން އާސެނަލާއި ޗެލްސީންވެސް އަންނަނީ މަޝްވަރާ ކުރަމުންނެވެ. އެގޮތުން ކުޅުންތެރިންގެ މުސާރައިން 12.5 އިންސައްތަ ކުޑަކުރުމަށް އާސެނަލުން ނިންމާފައިވާ ކަމަށް ރިޕޯޓުތައް ބުނެއެވެ. އަދި ޗެލްސީގެ ކުޅުންތެރިންގެ މުސާރައިން 10 އިންސައްތަ ކުޑަކުރަން މަސައްކަތް ކުރަމުން އަންނަ ކަމަށްވެސް ރިޕޯޓުތައް ބުނެއެވެ.

ކޮރޯނާވައިރަސް (ކޮވިޑް-19) ގެ ސަބަބުން ކްލަބުތަކަށް ދިމާވާނެ މާލީ ގޮންޖެހުންތަކުން އަރައިގަތުމަށް ކުޅުންތެރިންގެ މުސާރަ ކުޑަކުރަން މަޝްވަރާ ކުރަމުން އަންނައިރު، ފްރޮފެޝަނަލް ފުޓްބޯލާސް އެސޯސިއޭޝަން (ޕީއެފްއޭ) އިން ވަނީ ކުޅުންތެރިންގެ މުސާރަ ކުޑަކުރުމަށް ދެކޮޅު ހަދާފައެވެ.