ތެލެސީމިއާ ކުދިންނަށް ބޭނުންވާ ލޭ ހަދިޔާކޮށް ދިނުމަށް އިލްތިމާސްކޮށްފި
މިއީ ލޭ ހަދިޔާކޮށްދިނުމަށް އެދުނު 3 ވަނަ ފަހަރު
ތެލެސީމިއާ ކުދިންގެ ގަޔަށް އަޅަން ހަފްތާއަކު 160 ޔުނިޓްގެ ލޭ ބޭނުންވޭ
މޯލްޑިވްސް ބްލަޑް ސާވިސަސް (އެމްބީއެސް)ގެ ސްޓޮކް ދަށަށްދާތީ ލޭ ހަދިޔާކޮށްދިނުމަށް އިލްތިމާސްކޮށްފިއެވެ.
ކޮވިޑް-19 ފެތުރެމުންދާތީ މާލެސިޓީ ވަނީ ލޮކްޑައުންކޮށްފައެވެ. އެހެންކަމުން ގިނަ ގޮންޖެހުންތައް ކުރިމަތިވާއިރު، މިދުވަސްވަރު ލޭ ހަދިޔާކުރާ މީހުން ވަރަށް ބޮޑަށް މަދުވެފައިވާ ކަމަށް އެމްބީއެސްއިން ބުނެއެވެ. އަދި މިއީ ލޭ ހަދިޔާކޮށްދިނުމަށް އިލްތިމާސްކުރި ތިންވަނަ ފަހަރެވެ.
އެމްބީއެސްއިން ބުނީ ގަވާއިދުން ލޭ އަޅަންޖެހޭ ކުދިން ތިބިއިރު ސްޓޮކް ދަށަށްދާ ކަމަށެވެ. ތެލެސީމިއާ ކުދިންގެ ގަޔަށް އަޅަން ހަފްތާއަކު 160 ޔުނިޓްގެ ލޭ ބޭނުންވާކަން ފާހަގަކޮށް އެމްބީއެސްއިން ބުނީ ތެލެސީމިއާ ކުދިންގެ ފުރާނަ ސަލާމަތްކުރުމަށް ވީހާވެސް ގިނަ ބައެއް ލޭ ހަދިޔާކޮށްދިނުމަށް އެދޭ ކަމަށެވެ.
އެންމެ އާއްމުކޮށް އަޅަންޖެހޭ ލޭ ގުރޫޕްތައް ކަމަށްވާ އޯ ޕޮޒިޓިވް އާއި ބީ ޕޮޒިޓިވްގެ އެއް ދުވަހަށް ބޭނުންވާ ވަރަށްވެސް ލޭ ސްޓޮކްގައި ނެތް ކަމަށް އެމްބީއެސްއިން މައުލޫމާތުދެއެވެ.
ލޭ ހަދިޔާ ކުރަން ބޭނުންވާ މީހުންނަށް އެއިންތިޒާމް ވަނީ ހަމަޖައްސާދީފައެވެ. އެގޮތުން އެގޮތުން 3306089 އަށް ގުޅައި މައުލޫމާތު ހިއްސާކޮށްދިނުމަށް އެމްބީއެސްއީން ވަނީ އެދިފައެވެ.
ހޯމަ ދުވަހު ދަރުބާރު ގޭގައި ބޭއްވި ނޫސްވެރިންގެ ބައްދަލުވުމުގައި އެންއޯއީސީގެ ތަރުޖަމާން މަބްރޫކް އަބްދުލްއަޒީޒް ވިދާޅުވީ ލޭ ހަދިޔާކުރަން ބޭނުންވާ ފަރާތްތަކަށް އެ އިންތިޒާމްތައް ހަމަޖައްސާފައިވާކަމަށެވެ. އަދި ރައްކާތެރިކަމާއެކު ލޭ ހިދިޔާކުރެވޭނެ ގޮތްތަކެއް އެކަށައެޅިފައިވާ ކަމަށާއި، އެގޮތަށް ކުރިއަށްދިއުމަށް އިލްތިމާސްކުރައްވާކަމަށެވެ. މަބްރޫކް ވަނީ ވީހާސްވެސް ގިނަ ފަރާތްތަކުން ލޭ ހަދިޔާކުރުމަށް އިލްތިމާސްކުރައްވާފަ އެވެ.
