މިނިވަން ޗެމްޕިއަންޝިޕްގައި ރ. އުނގޫފާރު ފެށުން ރަނގަޅުކުރި އިރު، ނ. މާޅެންދޫ އެ އަތޮޅު ޒޯންގެ ފައިނަލާ ގާތަށް ޖެހިލައިފި އެވެ.

ހުކުރު ދުވަހު ހަވީރު ކުޅުނު މެޗުން މާޅެންދޫ މޮޅުވީ ކެނދިކުޅުދޫއާ ވާދަކޮށް 0-1 ގެ ނަތީޖާއަކުންނެވެ.

ކެނދިކުޅުދޫ ދަނޑުގައި ކުޅުނު މި މެޗުގައި ފެނިގެންދިޔަ ހަމައެކަނި ލަނޑު މާޅެންދޫ އަށް ކާމިޔާބުކޮށް ދިނީ މުހައްމަދު ފައިސަލް އެވެ. މި ލަނޑަށް ފަހު ވެސް އެޓީމަށް ވަނީ ލީޑު ފުޅާކުރުމަށް ވެސް ފުރުސަތުތަކެއް ލިބިފައެވެ.

މީގެ އިތުރުން ކެނދިކުޅުދޫއިން ވެސް މެޗުގައި މޮޅ ކުޅުމެއް ދައްކާފައިވާއިރު، އެޓީމަށް ވެސް ވަނީ މެޗުގައި ލަނޑު ޖެހުމަށް ގިނަ ފުރުސަތުތަކެއް ލިބި ބޭކާރުވެފައެވެ.

މެޗުގެ މޮޅު ކުޅުންތެރިޔަކަށް ހޮވިފައިވަނީ މާޅެންދޫ ޓީމުގެ މުހައްމަދު ނައުފަލް އެވެ.

މި ނަތީޖާއާއެކު ލީގު ބުރުގެ އުސޫލުން ކުޅޭ މި ޒޯނުގެ ފައިނަލާ ގާތަށް ހަތް ޕޮއިންޓާއެކު މާޅެންދޫ ދަތުރުކޮށްފައިވާއިރު، އެޓީމު ލީގު ބުރުގައި ކުޅުނު އެއްވެސް މެޗަކުން ބަލިނުވެއެވެ.

ހުކުރު ދުވަހު ހަވީރު ކުޅުނު މެޗުން ރ.ރަސްމާދޫއާ ވާދަކޮށް އުނގޫފާރު މޮޅުވީ 0-2 ގެ ނަތީޖާއަކުންނެވެ.

އުނގޫފާރު ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށްގެން ރަނގަޅަށް ކޫޅުނީ އެޓީމުންނެވެ. އެގޮތުން 42 ވަނަ މިނެޓުގައި އެޓީމުން ވަނީ މެޗުގެ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ގާނާގެ ފޯވާޑް ބޭނާޑް ކަވަސީ އެވެ.

މި ލަނޑާއެކު ފުރަތަމަ ހާފް 0-1 ގެ ނަތީޖާއިން އުނގޫފާރުގެ  ބުރަވެގެން ނިމުނުއިރު، ދެވަނަ ހާފް ފެށިގެންވެސް ލީޑު ފުޅާކުރަން އެޓީމަށް ވަނީ ގިނަ ފުރުސަތުތަކެއް ލިބި ބޭކާރުވެފައެވެ.

އުނގޫފާރުން މެޗުގެ ލީޑު ފުޅާކުރީ 68 ވަނަ މިނެޓުގައި މެޗުގެ ފުރަތަމަ ލަނޑުވެސް ކާމިޔާބުކޮށްދިން ގާނާގެ ފޯވާޑް ބެނާޑް ކަވަސީ އެވެ.