ރޭ ޖަލުގައި ހިނގި ހާދިސާ ކޮންޓްރޯލްކުރުމަށް އަމަލު ކޮށްފައިވަނީ ކުރީފަހަރުތަކާ ބަލާއިރު ޕްރޮފެޝަނަލްކޮށް: އަލީ ނަޒީރު

މިހާތަނަަށް އެނގޭގޮތުގައި ރޭ މާފުށި ޖަލުގަ ހިނގި ހާދިސާ ކޮންޓްރޯލްކުރުމުގަ އޮފިސަރުން އަމަލު ކޮށްފައިވަނީ ކުރީފަހަރުތަކާ ބަލާއިރު ޕްރޮފެޝަނަލްކޮށް ކަމަށް ހޯމް މިނިސްޓްރީގެ ސްޓޭޓް މިނިސްޓަރު އަލީ ނަޒީރު ވިދާޅުވެއްޖެ އެވެ.

ހޮނިހިރު ދުވަހުގެ ރޭ ޖަލުގައި ހިނގި ހަމަނުޖެހުމުގައި ތިން މީހަކަށް ވަނީ އަނިޔާވެފައެވެ. މިކަމާއި ގުޅިގެން ކަރެކްޝަންސް ސަރވިސްއިން ބުނެފައިވަނީ މަފުށީ ޖަލު ޔުނިޓު ނުވައެއްގައި ތިބި ގައިދީންނަށް ކާންދިނުމަށް ޔުނިޓު ހުޅުވި ވަގުތު ބައެއް ގައިދީން ވަނީ ގަދަކަމުން ޔުނިޓުން ނުކުމެފައި ކަމަށެވެ. ޖަލުގައި ހިނގި އެ ހާދިސާގައި ގައިދީއަކާއި ދެ އޮފިސަރަކަށް އަނިޔާވެފައިވާ ކަމަށް ވެސް ކަރެކްޝަންސް އިން ބުނެއެވެ.

މިކަމާއި ގުޅިގެން އަލީ ނަޒީރު ކުރެއްވި ޓްވީޓެއްގައި ވިދާޅުވެފައިވަނީ މިކަން ކޮންޓްރޯލްކުރުމަށް އޮފިސަރުން މަސައްކަތް ކުރިގޮތް ސާފުވާނީ އިންސިޑެންޓް ރިޕޯޓާއި ޔޫޒް އޮފް ފޯސް ރިވިއު ކޮމިޓީގެ ރިޕޯޓް ލިބުމުން ކަމަށެވެ. އަދި އިތުރަށް ހުށިޔާރުވާން ޖެހޭކަމަށްވެސް އަލީ ނަޒީރު ވިދާޅުވި އެވެ.

މިހަމަނުޖެހުމާ ހިންގުމާ ހޯމް މިނިސްޓަރ އިމްރާނާއި ކޮމިޝަނާ އޮފް ޕްރިޒަންސް އަހުމަދު މުހައްމަދުފުޅު ހޮނިހިރު ދުވަހުގެ ރޭ ވަނީ ޖަލަށް ވަޑައިގެން ހާލަތު ބައްލަވާލައްވާފައެވެ.

މިހާދިސާއާ ބެހޭ ގޮތުން މިނިސްޓަރު އިމްރާން ވިދާޅުވީ ކޮވިޑް-19އާ ގުޅިގެން މުއައްސަސާތަކަށް ބާރުބޮޑުވެ ނާޒުކު މިވަގުތު ޖަލު ހަލަބޮލި ކޮށްލަން ކުރި މަސައްކަތް ގައިދީންނާއި އޮފިސަރުންނަށް ބޮޑު ގެއްލުމެއް ނުވެ ކޮންޓްރޯލްވެފައިވާ ކަމަށެވެ. އަދި މިހަމަ ނުޖެހުން ކޮންޓްރޯލް ކުރެވުނީ މާތްﷲގެ ވާގިފުޅާއެކު އޮފިސަރުންގެ ކުޅަދާނަކަމުންކަން މިނިސްޓަރު ފާހަގަކުރެއްވިއެވެ. އަދި މިސަރުކާރުގެ އަމާޒަކީ އިންސާނީ ކަރާމާތްތައް އިސްކަންދީގެން ޖަލު ބެލެހެއްޓުން ކަމަށް މިނިސްޓަރު އިމްރާން ވިދާޅުވިއެވެ.