އާސެނަލާއި ޗެލްސީގެ ކުޅުންތެރިންގެ މުސާރަ ކުޑަކުރަނީ

އިނގިރޭސި ޕްރިމިއާ ލީގުގައި ވާދަކުރަމުން އަންނަ އާސެނަލާއި ޗެލްސީގެ ކުޅުންތެރިންގެ މުސާރަ ކުޑަކުރަން މަޝްވަރާ ކުރަމުން އަންނަ ކަމަށް ރިޕޯޓުތައް ބުނެފި އެވެ.

އެގޮތުން ކުޅުންތެރިންގެ މުސާރައިން 12.5 އިންސައްތަ ކުޑަކުރުމަށް އާސެނަލުން ނިންމާފައިވާ ކަމަށް ރިޕޯޓުތައް ބުނެއެވެ. ރިޕޯޓުތައް ބުނާގޮތުން މުސާރަ ކުޑަކުރަން އާސެނަލްގެ ކުޅުންތެރިން އެއްބަސްވީ އަންނަ ސީޒަނުގެ ޔުއެފާ ޗެމްޕިއަންސް ލީގަށް ކޮލިފައިވެއްޖެނަމަ، ކުޅުންތެރިންނަށް ބޯނަހެއް ދޭން އާސެނަލުން ނިންމުމާ ގުޅިގެންނެވެ. އެގޮތުން އަންނަ ސީޒަނުގެ ޔުއެފާ ޗެމްޕިއަންސް ލީގަށް ކޮލިފައިވެއްޖެނަމަ، ކޮންމެ ކުޅުންތެރިއަކަށް އެއް ލައްކަ ޕައުންޑުގެ ބޯނަހެއް ދޭން އާސެނަލުން ނިންމާފައިވާ ކަމަށްވެސް ރިޕޯޓުތައް ބުނެއެވެ.

މީގެ އިތުރުން އިނގިރޭސި ކްލަބު ޗެލްސީން ވެސް އަންނަނީ ކުޅުންތެރިންގެ މުސާރަ ކުޑަކުރުމަށް މަޝްވަރާ ކުރަމުންނެވެ. އެގޮތުން ޗެލްސީގެ ޑިރެކްޓަރު މަރިއާނާ ގްރަނޮވޮސްކިއާ ވަނީ މިކަމާއި ބެހޭ ގޮތުން ޗެލްސީގެ ކެޕްޓަން ސެޒާ އެޒްޕަލިކިއުޓާއާ މަޝްވަރާ ކޮށްފައިވާ ކަމަށްވެސް ރިޕޯޓުތައް ބުނެއެވެ.

ކުޅުންތެރިންގެ މުސާރަ ކުޑަކުރަން އާސެނަލާއި ޗެލްސީން މަޝްވަރާ ކުރަމުން އަންނައިރު، އިނގިރޭސި ކްލަބްތަކުގެ ތެރެއިން މިހާތަނަށް ކުޅުންތެރިންގެ މުސާރަ ކުޑަކުރުމަށް ނިންމައިފައިވަނީ ސައުތެމްޓަނާއި ވެސްޓް ހޭމް ޔުނައިޓެޑުން އެކަންޏެވެ.

ކޮރޯނާވައިރަސް (ކޮވިޑް-19) ގެ ސަބަބުން ކްލަބުތަކަށް ދިމާވާނެ މާލީ ގޮންޖެހުންތަކުން އަރައިގަތުމަށް ކުޅުންތެރިންގެ މުސާރަ ކުޑަކުރަން މަޝްވަރާ ކުރަމުން އަންނައިރު، ފްރޮފެޝަނަލް ފުޓްބޯލާސް އެސޯސިއޭޝަން (ޕީއެފްއޭ) އިން ވަނީ ކުޅުންތެރިންގެ މުސާރަ ކުޑަކުރުމަށް ދެކޮޅު ހަދާފައެވެ. އެ ޔޫނިއަނުން ބުނީ ކުޅުންތެރިންގެ މުސާރައިން 30 އިންސައްތަ އުނިކުރުމުން، ކްލަބުތަކަށް ޖުމްލަ 500 މިލިއަން ޔޫރޯ އެއްކުރެވޭ ކަމަށެވެ. އެކަމުގެ ސަބަބުން ބައެއް ކްލަބުތަކުން ނާޖައިޒު ފައިދާ ނަގަން މަސައްކަތް ކުރާނެ ކަމަށްވެސް ވަނީ ބުނެފައެވެ.