ކޮވިޑް-19 ޖެހިގެން ވުހާން އިން މަރުވި މީހުން އިތުރަށް ބެލުމުން އަދަދުތައް މައްޗަށް
17 އެޕްރީލު 2020 | ހުކުރު 10:00ވައިރަސް ޖެހިގެން މަރުވި މީހުންގެ އަދަދު ވަނީ 1290 މީހުން އިތުރުވެފައި
ޗައިނާގައި އަދިވެސް އަންނަނީ ވައިރަސް ފެތުރެމުން
ދުނިޔޭގައި މިހާރު ހަލުވިކަމާއެކު ފެތުރެމުންދާ ކޮވިޑް-19 އެންމެ ފުރަތަމަ ފެނުނު ޗައިނާގެ ވުހާން ސިޓީން ވައިރަސް ޖެހިގެން މަރުވި މީހުންގެ އަދަދުތައް އަލުން ބެލުމުން އަދަދުތައް މައްޗަށް އަރައިފި އެވެ.
ޗައިނާގެ ކަމާބެހޭ ފަރާތްތަކުން ހާމަކޮށްފައިވާ މައުލޫމާތުތަކަށް ބަލާއިރު އަލުން ބެލިއިރު ވައިރަސް ޖެހިގެން މަރުވި މީހުންގެ އަދަދު ވަނީ 1290 މީހުން އިތުރުވެފަ އެވެ. އެއާއެކު ޖުމްލަ ޗައިނާއިން ވައިރަސް ޖެހިގެން މަރުވި މީހުންގެ އަދަދު ވަނީ 4,632 އަށް އަރާފަ އެވެ. ބުރާސްފަތި ދުވަހު ހާމަކޮށްފައިވާ މައުލޫމާތުތަކުން އެނގޭ ގޮތުގައި ޗައިނާގައި ވައިރަސް ޖެހިގެން މަރުވެފައިވަނީ 3,342 މީހުންނެވެ.
ޗައިނާގެ އޮފިޝަލުން ހާމަކުރާގޮތުގައި ފަހުން އައިސްފައިވާ ރިޕޯޓްތަކަކީ މެޑިކަލް އިންސްޓިޓިޔުޝަންތަކުން ހާމަކޮށްފައިވާ މައުލޫމާތުތަކާއެކު އައިސްފައިވާ ރިޕޯޓްތަކެވެ. އެއީ ބައެއް މީހުން ގޭގައި މަރުވެފައިވުމާއި ވައިރަސް ފެތުރެން ފެށިތަނާއި މަރުވި މީހުންނެވެ. އެހެންކަމުން އެއަދަދުތައް އައިސްފައިވަނީ ފަހުންކަމަށް ޗައިނާގެ އޮފިޝަލުން ބުނެއެވެ.
ޗައިނާގައި ވައިރަސް ޖެހިގެން މަރުވި މީހުންގެ އަދަދު މައްޗަށް ގޮސްފައިވާކަން ޗައިނާއިން ހާމަކޮށްފައިވަނީ ބައިނަލް އަގްވާމީ މުޖުތަމަޢުން ޗައިނާއިން ވައިރަސް ޖެހިގެން މަރުވާ މީހުންނާއި ވައިރަސް ޖެހޭ މީހުންނާ ގުޅޭގޮތުން ޞައްހަ މައުލޫމާތު ފޯރުކޮށްނުދޭކަމަށް ބުނަމުންދާ އަޑުތައް ގަދަވެފައިވާ ދުވަސްވަރެއްގަ އެވެ. މިހާތަނަށް އާއިރު މުޅި ދުނިޔެއިން ވައިރަސް ޖެހިގެން މަރުވި މީހުންގެ އަދަދު ވަނީ އެލައްކަ ސާޅީސް ހާހަށް ވުރެ މަތީގަ އެވެ.
މީގެއިތުރުން ވުހާންގައި ވައިރަސް ޖެހިފައިވާ މީހުންގެ އަދަދުތައްވެސް ވަނީ އަލުން ބެލިބެލުމުން މައްޗަށް ގޮސްފަ އެވެ. އެގޮތުން އިތުރަށް 325 މީހުންނަށް ވައިރަސް ޖެހިފައިވާކަން ވަނީ ހޯދިފަ އެވެ.
ޗައިނާއިން ވައިރަސް އާ ގުޅިގެން ޞައްހަ މައުލޫމާތުތައް ފޯރުކޮށްނުދޭކަމަށް މިފަހަކުން އެމެރިކާގެ ރައީސް ޑޮނަލްޑް ޓްރަމްޕް ގެންދަވަނީ ވަރަށް ގިނައިން ވިދާޅުވެ ޗައިނާއަށް ބަހުގެ ހަމަލާތައް ދެއްވަމުންނެވެ. އަދި އެކަމަށް އިނގިރޭސިވިލާތާއި ފްރާންސުންވެސް އަންނަނީ ތާޢީދުކުރަމުންނެވެ. އެގޮތުން މިވައިރަސް އާ ގުޅިގެން ޗައިނާއިން ޖަވާބުދާރީ ވާންޖެހޭ ބޮޑެތި ސުވާލުތަކެއް އެބަހުރިކަމަށް އިނގިރޭސިވިލާތުން ބުނެއެވެ.
މީގެއިތުރުން ފްރާންސްގެ ރައީސް އެމަނުއަލް މެކްރޮންވެސް ދާދިފަހުން ވިދާޅުވެފައިވަނީ ވައިރަސް ޗައިނާއިން ކޮންޓްރޯލް ކޮށްފައިވަނީ ރަނގަޅަށްކަމަށް ވިސްނުމަކީ އަދި އެންމެ ރަނގަޅުގޮތް ނޫންކަމަށެވެ. ޗައިނާގެ ތެރޭގައި ވައިރަސް އާ ގުޅިގެން ދުނިޔެއަށް ނޭންގޭ ކަންތައްތަކެއް ހިނގާފައިވާނެ ކަމަށް މެކްރޮން ވިދާޅުވި އެވެ.
މިކަމާއި ގުޅިގެން އެހެން ގައުމުތަކުން ދައްކަމުން އަންނަ ވާހަކަތައް ޗައިނާއިން އަންނަނީ ދޮގުކުރަމުންނެވެ.
