އދ. މަހިބަދޫ ބަނދަރުގައި އަޅާފައި އޮތް ހަތް އުޅަނދެއްގައި ރޯކޮށްލުމުގެ ޒިންމާ އައިސިސް ޖަމާއަތުން ނަގައިފި އެވެ.

ޓެރަރިސްޓް ޖަމާއަތްތަކުގެ ހަރަކާތްތަކާއި، ޓެރަރިސްޓް ހަމަލާތަކާ ބެހޭ މައުލޫމާތު ހާމަ ކުރުމާއި، އެފަދަ މައުލޫމާތު ސަރުކާރުތަކަށް ފޯރުކޮށް ދިނުމުގެ މަގްސަދުގައި މަސައްކަތް ކުރާ, ސައިޓް އިންޓެލިޖެންސް ގްރޫޕްގައި ބުނެފައިވާގޮތުން، މަހިބަދޫ ބަނދަރުގައި އަޅާފައިވާ ލޯންޗުތަކަށް ދިން މި ހަމަލާގެ ޒިންމާ އައިސިސް އިން ވަނީ ނަގާފަ އެވެ.

ސައިޓް އިންޓެލިޖެންސް ގްރޫޕުން ބުނެފައިވަނީ، މަހިބަދޫ ބަނަދަރުގައި އަޅާފައިވާ ލޯންޗުތަކުގައި ރޯކޮށްލުމަށް ބޭނުން ކޮށްފައިވަނީ ލޯންޗްތައް ގޮއްވާލުމުގެ ބޭނުމަށް އަމިއްލަ އަށް ތައްޔާރު ކޮށްފައިވާ ޑިވައިސް އެއް ބޭނުން ކޮށްގެން ކަމުގައެވެ.

ސައިޓް އިންޓެލިޖެންސް ގްރޫޕުން ހާމަކޮށްފައިވާ ގޮތުގައި، މި ހަމަލާ އަކީ އައިސިސް ޖަމާއަތުން ރާއްޖެއަށް ދިން ފުރަތަމަ ޓެރަރިސްޓް ހަމަލާއެވެ.

މި އުޅަނދުތަކުގައި ރޯކޮށްލި ހާދިސާއާ ގުޅިގެން ބުދަ ދުވަހު އެމްއެންޑީއެފްއާ ފުލުހުން ގުޅިގެން ބޭއްވި ނޫސްވެރިންގެ ބައްދަލުވުމުގައި ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވީ، މިހާތަނަށް ހޯދި ހޯދުންތަކުން އެނގުނީ މަހިބަދޫ ފަޅުގައި އަޅާފައިވާ ލޯންޗުތަކުގައި ރޯކޮށްލީ ގަސްތުގައި ކަމަށެވެ. އަދި މިއީ ޓެރަރިސްޓް ހަމަލާއެއް ކަމަށް ބެލެވޭ ކަމަށް ވެސް ސީޕީ ހަމީދު ވިދާޅުވި އެވެ.

ލޯންޗުތަކުގައި ރޯކޮށްލަން ދިން ހަމަލާއަކީ ޓެރަރިޒަމްގެ ހަމަލާއެއްގެ ގޮތުގައި ކަނޑައަޅާފައި ނުވަނީ ކީއްވެގެންތޯ ނޫސްވެރިޔަކު ސުވާލުކުރުމުން ސީޕީ ހަމީދު ވިދާޅުވީ އެކަމަކީ ވަކި ބާވަތެއްގެ ހަމަލާއެއްކަމަށް ބުނަން އަދި އަވަސް ކަމަށެވެ. ނަމަވެސް މިހާތަނަށް ތަހުޤީޤުގައި އެއްކުރެވިފައިވާ މައުލޫމާތުތަކުން އެއީ ޓެރަރިޒަމްގެ ހަމަލާއެއްކަމަށް ބެލުމުގެ ފުރުސަތު އެބަ އޮތްކަމަށާއި، ވަކި ގޮތެއް ނިންމާނީ އެއްކޮށް ތަހުޤީޤް ނިމުމުންކަމަށް ހަމީދު ވިދާޅުވި އެވެ.

މި ޙާދިސާގައި މަހިބަދޫ ފަޅުތެރޭގައި އަޅާފައިވާ ފަސް ލޯންޗަކާއި، ދެ ޑިންގީއެއްގައި އަލިފާން ރޯވިކަމަށް އެމްއެންޑީއެފުން މަޢުލޫމާތުދެ އެވެ. ރޯވެފައިވަނީ ޕޮލިސް ލޯންޗަކާއި، އެއަތޮޅު ކައުންސިލް ލޯންޗާއި، ސީ އެމްބިޔުލެންސް ލޯންޗް އަދި އެޗްއެމްއެޗްއައި ޓްރެވަލްސް ކިޔާ ދެ ލޯންޗެއްގެ އިތުރުން ދެ ޑިންގީއެއްގައި ކަމަށް އެމްއެންޑީއެފުން ބުނެ އެވެ.

ސައިޓް އިންޓެލިޖެންސް ގްރޫޕުން ހާމަ ކޮށްފައިވާ މައުލޫމާތާ ގުޅިގެން ފުލުހުންގެ ބަހެއް ހޯދުމަށް ކުރި މަސައްކަތް ވަނީ ކާމިޔާބު ނުވެފައެވެ.