އިތުރު ތިން ހަފުތާއަށް އިނގިރޭސިވިލާތުގެ ލޮކްޑައުންގެ މުއްދަތު އިތުރުކޮށްފި

އިތުރު ތިން ހަފުތާގެ މުއްދަތަށް އިނގިރޭސިވިލާތުގެ ލޮކްޑައުންގެ މުއްދަތު އިތުރުކުރަން ނިންމައިފި އެވެ.

ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި މިކަން އިއުލާންކުރެއްވީ، ކޮވިޑް-19 އަށް ފަރުވާ ހޯދަމުން އަންނަ ބޮޑުވަޒީރު ބޯރިސް ޖޯންސަން ގެ މަސްއޫލިއްޔަތުތަކާ ވަގުތީ ގޮތުން ހަވާލުވެވަޑައިގެން ހުންނެވި އިނގިރޭސި ފޮރިން ސެކެޓްރީ ޑޮމިނިކް ރާބް އެވެ.

މިއީ ކޮރޯނާވައިރަސް އާ ގުޅިގެން ލަފާ ހޯދުމަށް އެކުލަވާލާފައިވާ ސައިންޓިފިކް އެޑްވައިޒަރީ ގްރޫޕް ފޯރ އެމަރޖެންސީސް (ސޭޖް) ގެ ލަފަޔާ އެއް ގޮތަށް ނިންމި ނިންމުމެކެވެ. އަދި މި ނިންމުމުގެ މަގުސަދަކީ ވައިރަސްގެ ޕީކުން އަރައިގަންނަން މަސައްކަތް ކުރުން ކަމަށް އިނގިރޭސި ސަރުކާރުން ވަނީ ހާމަކޮށްފަ އެވެ.

ނޫސްވެރިންގެ ބައްދަލުވުމުގައި ރާބް ވިދާޅުވީ، މިހާރު ލުއިތަކެއް ދީފިނަމަ ކުރަމުން އައި މަސައްކަތަށް ބޮޑު ގޮންޖެހުންތަކެއް ކުރިމަތިވާން ކަމަށް ސޭޖް އިން ލަފާދީފައިވާ ކަމަށެވެ. އަދި އާންމު ސިއްހަތުގެ އިތުރުން އިގްތިސާދަށް ވެސް ބޮޑެތި ގޮންޖެހުންތަކަކާ ކުރިމަތިލާން ޖެހޭނެ ކަމަށް ލަފާދީފައިވާ ކަމަށް ވިދާޅުވި އެވެ.

މި ނިންމުމާއެކު، އިނގިރޭސިވިލާތް އޮންނާނީ އަންނަ މޭ މަހުގެ 7 ވަނަ ދުވަހާ ހަމައަށް ލޮކްޑައުން ކޮށްފަ އެވެ. ފަހަރުގައި އެ މުއްދަތު އެއަށް ވުރެ އިތުރުކުރަން ޖެހިދާނެ ކަމަށް ވެސް ރާބް ވިދާޅުވި އެވެ. އެ ގައުމުގެ ލޮކްޑައުން ހާލަތު އުވާލުމުގެ ކުރިން ފުރިހަމަ ވާންޖެހޭ ބައެއް ކަންކަމުގެ ލިސްޓެއް ވެސް ވަނީ އެކުލަވާލާފަ އެވެ. އަދި އެކަންކަން ފުރިހަމަވުމުން ލޮކްޑައުން އެއްކޮށް އުވާލާނެ ކަމަށް ރާބް ވިދާޅުވި އެވެ.

އިނގިރޭސިވިލާތުން ފެންނަ ކޭސްތަކުގެ އަދަދު ދުވަހަކަށް ވުރެ ދުވަހެއް އިތުރުވަމުން އައި ކަމުގައިވީނަމަވެސް، ވިލާތުގެ އެހެން ބައެއް ގައުމުތަކާ އަޅާ ބަލާއިރު ނިސްބަތުން ހާލު ރަނގަޅެވެ. މިހާތަނަށް އެ ގައުމުން ވައިރަސް އަށް ޕޮޒިޓިވްވެފައިވާ މީހުންގެ އަދަދު ވަނީ ލައްކައަކަށް ވުރެ އިތުރުވެފަ އެވެ. އަދި މަރުވީ މީހުންގެ އަދަދު ވަނީ 13،700 އަށް ވުރެ އިތުރުވެފަ އެވެ.