އުތުރު ކޮރެއާގެ ލީޑަރު ކިމް ޖޮންގ އުންގެ އެއްބަފާ ބޭބެ ކިމް ޖޮންގ ނަމް މެލޭޝިއާގައި އަވަހާރަކޮށްލި މައްސަލައިގައި އުތުރު ކޮރެއާގެ ރައްޔިތަކު ހައްޔަރުކޮށްފި ކަމަށް މެލޭޝިއާގެ ފުލުހުން ބުނެފިއެވެ.
މެލޭޝިއާގެ ފުލުހުންވަނީ ހައްޔަރުކޮށްފައިވަނީ އުމުރުން 46 އަހަރުގެ ރީ ޖޮންގ ޗޮލް ނަމަކަށް ކިޔާ މީހެއް ކަން ހާމަކޮށްފައެވެ.
ކުއާލަ ލަމްޕޫރުގެ އެއާޕޯޓްގައި ވަޑައިގެން ހުންނަވަނިކޮށް ކިމް ޖޮންގ ނަމް އަވަހާރަކޮށްލި މައްސަލައިގައި މީގެ ކުރިން ދެ އަންހެނަކާއި ފިރެހެނަކު ހައްޔަކޮށްފައި ވެއެވެ.
މިދިޔަ ހޯމަ ދުވަހު މަކާއޯ އަށް ވަޑައިގަންނަވަން ފްލައިޓަށް އަރާވަޑައިގަންނަވަން މަޑުކޮށްލައްވައިގެން އިންނަވަނިކޮށް ކިމް އަވަހާރަކޮށްލާފައި ވަނީ މޫނަށް ވިހައެއް ސްޕެރޭ ކޮށްގެން ކަމަށް ބެލެވޭ ކަމަށް ފުލުހުން ބުނެއެވެ.
ނަމް މަރާލާފައިވަނީ އުތުރުކޮރެއާއިން ކަމަށް ފުޅާދާއިރާއެއްގައި ތުހުމަތު ކުރެވެމުން ދިޔަ ނަމަވެސް މިހާތަނަށް އެކަން ކަށަވަރު ކުރެވިފައެއް ނުވެއެވެ
ނަމްގެ ޕޯސްޓް މޯޓަމް ރިޕޯޓް ބުދަ ދުވަހު ހަވީރު ނިމިފައިވީ ނަމަވެސް ރިޕޯޓް އާއްމުކުރާނެ ކަމެއް ފުލުހުން ކަށަވަރެއް ނުކޮށްދެއެވެ.
