ކުރިޔަށް އޮތް ހަފްތާ ތެރޭގައި ޔޫރަޕުން ކޮވިޑް-19 ޖެހޭ މީހުންގެ އަދަދު މިލިއަނަކަށް އަރާނެ: ޑަބްލިޔުއެޗްއޯ

ކޮވިޑް-19 ދުނިޔޭގައި ހަލުވިކަމާއެކު ފެތުރެމުންދާއިރު މިވައިރަސް އެންމެ ހަލުވި މިނުގައި ފެތުރެމުން އަންނަނީ ޔޫރަޕްގެ ގައުމުތަކުގަ އެވެ.

ޑަބްލިޔުއެޗްއޯގެ ޔޫރަޕިއަން ރީޖަނަލް ޑިރެކްޓަރ ހާންސް ކުލްގާ ބުރާސްފަތި ދުވަހު އޮންލައިންކޮށް ބޭއްވި ނޫސްވެރިންގެ ބައްދަލުވުމެއްގައި ވިދާޅުވީ ޔޫރަޕްގެ ގައުމުތަކުން އެކަނި ކޮވިޑް-19 އަށް ޕޮޒިޓިވްވެފައިވާ މީހުންގެ އަދަދު މިލިއަނަކާ ކައިރިކުރާ ކަމަށެވެ. އަދި ވައިރަސް ޖެހޭ މީހުންގެ އަދަދު އިތުރުވަމުން އަންނަކަމަށް ކުލްގާ ވިދާޅުވި އެވެ.

މީގެ މާނައަކީ މުޅި ދުނިޔެއިން ވައިރަސް ޖެހޭ މީހުންގެ ޖުމްލަ އަދަދުގެ ގާތްގަޑަކަށް 50 އިންސައްތަ ހިއްސާކުރަނީ ޔޫރަޕުން އެކަނިކަމެވެ. މިހާތަނަށް އާއިރު މުޅި ދުނިޔެއިން މިވައިރަސް ޖެހިފައިވާ މީހުންގެ އަދަދު ވަނީ ދެ މިލިއަނަށް ވުރެ މައްޗަށް އަރާފަ އެވެ. 2,107,433 މީހުންނަށް ވައިރަސް ޖެހިފައިވާއިރު މިވައިރަސް ޖެހިގެން މިހާތަނަށް 136,980 މީހުން ވަނީ މަރުވެފަ އެވެ.

ކުލްގާ ވިދާޅުވީ ޔޫރަޕުން އެކަނިވެސް ވައިރަސް ޖެހިގެން 84،000 ށް ވުރެ ގިނަ މީހުން މަރުވެފައިވާ ކަމަށެވެ. އަދިވެސް މިވައިރަސް ޔޫރަޕްގައި ފެތުރުމުގެ ފުރުސަތު ބޮޑުކަން ހާމަކުރައްވާ ކުލްގާ ވިދާޅުވީ އާންމު ހާލަތަކަށް ޔޫރަޕް ދިޔުމަށް އަދި ކައިރިވެސް ނުވާކަމަށެވެ. އެކަމަށް ވަގުތު ނަގާނެކަމަށް ކުލްގާ ވިދާޅުވި އެވެ.

މިވަގުތު ދުނިޔޭގައި ކޮވިޑް-19 ގެ ހާލަތަށް ބަލާއިރު ލައްކައަކަށްވުރެ ގިނައިން ވައިރަސް ޖެހިގެން ރިޕޯޓްކުރަމުންދާ ގައުމުތަކުގެ ތެރޭގައި އެމެރިކާ ފިޔަވައި ދެން ހިމެނެނީ ޔޫރަޕްގެ ގައުމުތަކެވެ. އޭގެތެރޭގައި ހިމެނޭ ސްޕެއިން އިން މިހާތަނަށް ވައިރަސް ޖެހިފައިވާ މީހުންގެ އަދަދު 182،816 އަށް އަރާއިރު އިޓަލީން ވައިރަސް ޖެހިފައިވާ މީހުންގެ އަދަދު 165،155 ށް އަރައެވެ. އަދި ފްރާންސުން ވައިރަސް ޖެހިފައިވާ މީހުންގެ އަދަދު 147،863 ށް އަރާއިރު ޖަރމަނީން ވައިރަސް ޖެހިފައިވާ މީހުންގެ އަދަދު 135،383 ށް އަރައެވެ. އިނގިރޭސިވިލާތުން ވައިރަސް ޖެހިފައިވާ މީހުންގެ އަދަދު ވަނީ 103،093 ށް އަރާފަ އެވެ.