ދުނިޔޭގައި މިހާރު ހަލުވިކަމާއިއެކު ފެތުރެމުން އަންނަ ކޮރޯނާވައިރަސް (ކޮވިޑް-19) ގެ ސަބަބުން ޔޫރަޕުގެ ބޮޑު ފަސް ލީގުގެ ކުޅުން މެދުކަނޑާލައިފައިވީ ނަމަވެސް, ލީގު ކެންސަލްކުރުމުގެ ވިސްނުމެއް ނެތް ކަމަށް ޔޫރަޕިއަން ލީގުގެ ޑެޕިއުޓީ ޖެނެރަލް ސެކްރެޓަރީ ވިދާޅުވެއްޖެއެވެ.

ކޮވިޑް-19 އާ ގުޅިގެން ދުނިޔޭގެ ފުޓްބޯޅަ ހުއްޓުމަކަށް އައިސްފައިވާއިރު، ޔޫރަޕްގެ ގަދަ ފަސް ލީގު ކަމަށްވާ އިނގިރޭސި ޕްރިމިއާ ލީގާއި، ސްޕެނިޝް ލީގާއި، އީޓާލިއަން ލީގާއި، ޖަރުމަން ލީގުގެ އިތުރުން ފްރެންޗު ލީގު ވަނީ މެދު ކަނދާލާފައެވެ. އަދި ޔުއެފާއިން ވަނީ ޗެމްޕިއަންސް ލީގާއި ޔޫރޮޕާ ލީގުވެސް މެދ ކަނދާލާފައެވެ. ޔޫރަޕްގައި މިހާރު ކުރިޔަށްދާ ހަމައެކަނި ފުތްބޯލަ ލީގަކީ ބެލަރޫސިއަން ޕްރިމިއާ ލީގެވެ.

ޔޫރަޕްގެ 36 ގައުމެއްގެ ލީގު ތަމްސީލުކުރާ ޔޫރަޕިއަން ލީގުގެ ޑެޕިއުޓީ ޖެނެރަލް ސެކްރެޓަރީ އަލްބާޓޯ ކޮލަމްބޯ ވިދާޅުވީ ކޮވިޑް-19 އިން ރައްކާތެރި މާހައުލެއް ގާއިމްވިހާ އަވަހަކަށް ފުޓްބޯޅަ ލީގުތައް ފަށާނެ ކަމަށާއި، އެކަމަކު ލީގުގެ މެޗުތައް ކުރިޔަށް ގެންދާނީ ސްޓޭޑިއަމަށް ސަޕޯޓަރުން ވައްދައިގެން ނުވަތަ ނޫންކަން އަދި ބުނަން ނޭނގޭ ކަމަށެވެ.

އަލްބާޓޯ އިތުރަށް ވިދާޅުވީ ކޮވިޑް-19ގެ ސަބަބުން ފުޓްބޯޅައަށް ބޮޑު ގެއްލުމެއް ވެފައިވާ ކަމަށާއި ހާއްސަކޮށް ކްލަބުތަކަށާއި ލީގުތައް ހިންގާ ފަރާތްތަކަށް މިކަމުގެ ސަބަބުން ބޮޑު ގެއްލުމެއް ވެފައިވާ ކަމަށެވެ. އަދި އިނގިރޭސި ޕްރިމިއާ ލީގާއި އަދި އިނގިރޭސި އެހެން ލީގުތައް ވަރަށް އަވަހަށް ފެށޭނެ ކަމަށް ބެލެވޭ ކަމަށާއި، އިނގިރޭސިވިލާތުގައި ކޮވިޑް-19 ގެ ކަންކަން ދުވަހެއް ދުވަހަކަށް ރަނގަޅުވަމުން އަންނަ ކަމަށްވެސް ވިދާޅުވި އެވެ.

އަދި ވިދާޅުވީ ހުރިހާ ވިސްނުމެއް ހުރީ ލީގުތައް އަލުން ފެށޭނެ ގޮތެއް ހޯދުމާއި ދޭތެރޭގައި ކަމަށާއި ސަބަބަކީ ސީޒަން ކެންސަލްކޮށްފިނަމަ ކްލަބުތަކަށާއި ލީގު ހިންގާ ފަރާތްތަކަށް ލިބޭ މާލީ ގެއްލުންތައް ބޮޑުވާނެތީ ކަމަށެވެ.

އަލްބާޓޯ މިހެން ވިދާޅުވިއިރު، ޖަރުމަން ލީގުގެ ބައެއް ކްލަބުތަކުން ވަނީ ފަރިތަކުރުންތައް ފަށާފައެވެ. މިކަމާ ބެހޭ ގޮތުން އަލްބާޓޯ ވިދާޅުވީ ގައުމުތަކުން ކަނޑައަޅާ ގޮތަކަށް ފަރިތަކުރުން އެއީ މައްސަލައެއް ނޫން ކަމަށެވެ.

ކޮވިޑް-19 އާ ގުޅިގެން މެދުކަނދާލާފައިވާ ލީގުތައް ފުރިހަމަ ކުރުމަށް ވަގުތު ދިނުމުގެ ގޮތުން ޔޫރޯ ފުޓްބޯޅަ އާއި ކޮޕާ އެމެރިކާ ފުޓްބޯޅަ މުބާރާތް ވަނީ އަންނަ އަހަރަށް ފަސްކޮށްފައެވެ. އަދި ފީފާއިން އަންނަނީ ބައިނަލްއަގުވާމީ މެޗުތައް މިއަހަރު ކުރިއަށް ނުގެންދިޔުމަށް މަޝްވަރާ ކުރަމުންނެވެ.