ގައުމީ ވޮލީ ޓީމުތައް ރީފޯމް ކުރުމުގެ މަސައްކަތް، ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން ފަށައިފިއެވެ.

މި މަސައްކަތުގެ ދަށުން އެ އެސޯސިއޭޝަނުން ވަނީ ގައުމީ ސީނިއާ އަންހެން ވޮލީޓީމަށް ބުދަ ދުވަހުގެ ރޭ ޙާއްސަ ހަރަކާތެއް ބާއްވާފައެވެ. ތިއަރީ ލެސަން ކްލާހަކާއި އެކު ކުރިއަށްގެންދިޔަ މި ހަރަކާތުގައި ގައުމީ ޓީމުގެ ކުޅުންތެރިންނަށް ވަނީ، ލީޑާޝިޕް ނެގުމާއި މޯޓިވޭޝަންގެ ކަންތައްތަކާއި ގުޅޭގޮތުން މައުލޫމާތު ދީފައެވެ. އެގޮތުން މި ޕްރޮގްރާމްގައި އިންސްޓްރަކްޓަރެއްގެ ގޮތުން ބައިވެރިވެ ވަޑައިގެންނެވީ، ދަރުމަޔަށް މަސައްކަތް ކުރުމާއި، މަސައްކަތް ކުރުމުގެ ރޫހު އާލާކުރުމުގެ ރޮނގުން ގައުމީ އިނާމު ހާސިލް ކުރައްވާފައިވާ ހަސަން ޝިޔާމެވެ.

މި ޕްރޮގްރާމުގައި ހަސަން ޝިޔާމް ވަނީ، ގައުމު ތަމްސީލް ކުރުމަކީ ކިހާވަރެއްގެ ކަމެއް ކަމާއި، ގައުމީ ޓީމުން ކޯޑް އޮފް ކޮންޑަކްޓާއި ޚިލާފުވެއްޖެނަމަ ދެން އަމަލު ކުރާނެ ގޮތްވެސް ކުޅުންތެރިންނަށް ކިޔައިދީފައެވެ.

މި ޕްރޮގްރާމްގެ އިތުރުން ވީއޭއެމްއިން ވަނީ ބުދަ ދުވަހުގެރޭ، ގައުމީ ސީނިއާ އަންހެން ވޮލީ ޓީމުގެ ކުޅުންތެރިންނާއި އެކު ޓީމް މެމްބަރޝިޕް އެގްރިމެންޓެއްގައި ސޮއެކޮށްފައެވެ.

ގައުމީ އަހެން ވޮލީޓީމުން އަންނަނީ، އަންނަ މަހުގެ 09 އިން 17 އަށް ފިލިޕީންސްގައި ކުރިއަށް ގެންދިއުމަށް ހަމަޖެހިފައިވާ އޭޝިއަން ވިމެންސް ވޮލީބޯޅަ ޗެމްޕިއަންޝިޕަށް ތައްޔާރުވަމުންނެވެ. އެގޮތުން އެ މުބާރާތުގައި ރާއްޖެ ތަމްސީލުކުރާ ރަސްމީ ސްކޮޑް އިއުލާން ކުރުމަށް ހަމަޖެހިފައިވަނީ މިމަހު ފުވައްމުލަކުގައި ބާއްވާ ވިމެންސް ވޮލީބޯލް އެސޯސިއޭޝަން ކަޕަށް ފަހު ކަމަށް ވީއޭއެމްއިން ވަނީ މީގެ ކުރިން މައުލޫމާތު ދީފައެވެ.