ކޮވިޑް-19 ޖެހިގެން ރަނގަޅުކުރެވުނު މީހުންގެ އަދަދު ބައިމިލިއަނަށް ވުރެ މައްޗަށް

މިހާރު މުޅި ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 ޖެހިގެން ރަނގަޅުކުރެވޭ މީހުންގެ އަދަދު ފަސް ލައްކައަށް ވުރެ މައްޗަށް އަރައިފިއެވެ.

އެގޮތުން މިހާތަނަށް އާއިރު މުޅި ދުނިޔެއިން ކޮވިޑް-19 ޖެހިގެން ރަނގަޅުކުރެވުނު މީހުންގެ އަދަދަކީ 511،440 މީހުންނެވެ. މިއީ ޖުމްލަ ވައިރަސް ޖެހިފައިވާ 2,083,304 މީހުންގެ ތެރެއިންނެވެ. މިވައިރަސް ޖެހިގެން މިހާތަނަށް އާއިރު މަރުވެފައިވަނީ 134,616 މީހުންނެވެ.

ވައިރަސް ޖެހިފައިވާ މީހުން އެންމެ ގިނައިން ރަނގަޅު ކުރެވިފައިވަނީ އެންމެ ފުރަތަމަ ވައިރަސް ފެނުނު ޗައިނާގަ އެވެ. އެއީ 77,892 މީހުންނެވެ. ޗައިނާގައި ވައިރަސް ޖެހިފައިވާ މީހުންގެ އަދަދު އުޅެނީ 82,341 ގަ އެވެ. އަދި ޗައިނާއަކީ މިހާތަނަށް އާއިރު ބަލި ޖެހިފައިވާ މީހުންގެ ނިސްބަތުން އެންމެ ގިނަ އަދަދަކަށް މީހުން ރަނގަޅުވެފައިވާ ގައުމުވެސްމެއެވެ.

ދެވަނަ އަށް އެންމެ ގިނަ ބަލި މީހުން ރަނގަޅު ވެފައިވަނީ ޖަރުމަނުގަ އެވެ. އެއީ 72,600 މީހުންނެވެ. ނަމަވެސް ޖަރުމަނުގައި ވައިރަސް ޖެހިފައިވާ މީހުންގެ އަދަދު 134,753 އަށް އަރައެވެ.

ތިން ވަނައަށް އެންމެ ގިނަ މީހުން ރަނގަޅު ކުރެވިފައިވަނީ ސްޕެއިންގަ އެވެ. އެއީ 70,853 މީހުންނެވެ. ސްޕެއިންގައި ކޮވިޑް-19 180,659 މީހުންނަށް ޖެހިފައިވެ އެވެ.

އެންމެ ގިނަ އަދަދެއްގެ މީހުންނަށް ވައިރަސް ޖެހިގެން ރިޕޯޓްކުރަމުން އަންނަ އެމެރިކާއިން ރަނގަޅު ވެފައިވަނީ 48,708 މީހުންނެވެ. އެއީ 644,089 މީހުންގެ ތެރެއިންނެވެ. ވައިރަސް ހަލުވިކަމާއެކު ފެތުރެމުން އަންނަ އިޓަލީގައި މިހާތަނަށް 165,155 މީހުންނަށް ވައިރަސް ޖެހިފައިވާއިރު ރަނގަޅުވެފައިވަނީ މީގެތެރެއިން 38,092 މީހުންނެވެ.

ޔޫރަޕް ނެގުމަށްފަހު ދެން އެންމެ ގިނަ އަދަދެއްގެ މީހުން ރަނގަޅުކުރެވެމުން އަންނަ ގައުމަކީ އިރާނެވެ. އެއީ 49,933 މީހުންނެވެ. އިރާނުގައި މިވައިރަސް 76,389 މީހުންނަށް ވަނީ ޖެހިފަ އެވެ.

ކޮވިޑް-19 އަށް މިހާތަނަށް އާއިރު އަދި ވެކްސިނެއް ހޯދިފައިނުވާއިރު މިވައިރަސް ޖެހޭ މީހުންނަށް ފަރުވާދިނުމަށް ވަކި ޚާއްސަ ބޭހެއްވެސް އަދި ހޯދިފައެއް ނުވެއެވެ. އެކި ގައުމުތަކުން ވައިރަސް ޖެހޭ މީހުންނަށް ފަރުވާދިނުމަށް އެކި ބޭސް ބޭނުން ކުރަމުންދާއިރު ދުނިޔޭގެ ސިއްހަތާއި ބެހޭ ޖަމިއްޔާއިން ބުނަމުން އަންނަނީ ވައިރަސް ފެތުރުން ކޮންޓްރޯލްކުރުމަށް އަޅާފައިވާ ފިޔަވަޅުތަކަށް ލުޔެއްނުދީ އެއާ އެއްގޮތަށް އަމަލުކޮށްގެން ނޫނީ މިވަގުތު ވައިރަސް ފެތުރުން ކޮންޓްރޯލް ނުކުރެވޭނެ ކަމަށެވެ. ވައިރަސް ހަލުވިކަމާއެކު ފެތުރެމުންދާ ގިނަ ގައުމުތައް މިހާރު ވަނީ ލޮކްޑައުންކޮށްފަ އެވެ. އަނެއް ބައި ގައުމުތަކުން އަންނަނީ ވައިރަސް ފެތުރުން ކޮންޓްރޯލްކުރުމަށް މީހުން އެއްވެ އުޅުން މަނާކޮށް ސްކޫލްތަކާއި އޮފީސްތައް ބަންދުކުރަމުންނެވެ.