ރާއްޖޭގައި ތިބި ތައިލެންޑުގެ 55 މީހުން، މޯލްޑިވިއަންގެ އެހީގައި ގައުމަށް ގޮސްދީފިއެވެ.
މޯލްޑިވިއަންއިން ބުނީ ބުރާސްފަތި ދުވަހުގެ ހެނދުނު ފުރި މިފްލައިޓަކީ އެގައުމުގައި ތިބި ދިވެހިންނަށް ފޮނުވި ކެއާ ޕެކޭޖުތަކާއެކު ދިޔަ ފްލައިޓެއް ކަމަށެވެ. މިފްލައިޓުގައި ރާއްޖޭގައި ތިބި ތައިލެންޑުގެ ފަތުރުވެރިންނާއި ވޯކް ޕާމިޓް ހޯލްޑަރުން ހިމެނޭ ކަމަށެވެ.
ބެންކޮކްގައި ދިރިއުޅޭ ދިވެހިނަށް ކެއަރ ޕެކެޖްތައް ފޮނުވާފައިވާއިރު، މީގެ ކުރިން ސްރީލަންކާ، މެލޭޝިއާ އަދި އިންޑިއާގައި ތިބި ދިވެހި އާއިލާތަކަށް ކެއަރ ޕެކޭޖްތައް ފޮނުވާދިނެއެވެ. މީގެ އިތުރުން ޔޫއޭއީގައި ތިބި ދިވެހިންނަށް ކެއާ ޕެކޭޖު ފޮނުވޭނެ އިންތިޒާމުވެސް ސަރުކާރުން ހަމަޖައްސައިދިނެވެ.
ކޮވިޑް-19އާ ގުޅިގެން ރާއްޖޭއިން ބޭރުގައި ތިބި ގިނަ ދިވެހިންނަށް ރާއްޖެއަށް އައުމަށް ވަނީ ދަތިތައް ކުރިމަތިވެފައެވެ. ލޮކްޑައުންކޮށްފައިވާ ގައުމުތަކުގައި ޒަރޫރީ ބޭނުންތަކަށް ބޭނުންވާ ސާމާނު ލިބުމުގައި ދަތިތައް ކުރިމަތިވާ ކަމަށް ވެސް އެމީހުން ބުނެއެވެ. އެހެންކަމުން ރާއްޖެއަށް އައުމަށް ބޭނުންވާ ދިވެހިން ގެނައުމުގެ މަސައްކަތް ފޮރިން މިނިސްޓްރީންނާއި، މޯލްޑިވިއަންއިން އަންނަނީ ކުރަމުންނެވެ. އެގޮތުން ސްރީލަންކާ، އިންޑިއާ އަދި މެލޭޝިއާގައި ތިބި ބައެއް ދިވެހިން ވަނީ ގެނެސްފައެވެ.
މީގެ އިތުރުން ވެސް ބޭރުގެ ގައުމުތަކުގައި ދިރިއުޅޭ ދިވެހިންގެ ހާލު ވަރަށް ގާތުން ބަލަމުންދާ ކަމަށް ފޮރިން މިނިސްޓްރީން ވަނީ ބުނެފައެވެ. އަދި ބޭރު ގައުމުތަކުގައި ދިރިއުޅޭ ދިވެހިން އެގައުމުތަކުގެ ސަރުކާރުން ނެރޭ އިރުޝާދުތަކާ އެއްގޮތަށް އަމަލުކުރުމަށްވެސް ދިވެހި ސަރުކާރުން ވަނީ އިލްތިމާސްކޮށްފައެވެ.
