ރައީސް ނަޝީދާއި ރައީސް މައުމޫންގެ ބަސްފުޅު: އެއްބަސްވުމުގައި ސޮއިކުރެއްވީ ގައުމަށްޓަކައި!

ޕާޓީތައް ގުޅިގެން މަސައްކަތް ކުރުމަށް އެއްބަސްވުމުގައި ސޮއިކުރީ ގައުމުގެ ހައްގުގައި ކަމަށް ކުރީގެ ދެ ރައީސުން ކަމަށްވާ ރައީސް މައުމޫން އަބްދުލްގައްޔޫމާއި، ރައީސް މުހައްމަދު ނަޝީދު ވިދާޅުވެއްޖެ އެވެ.

އެމްޑީޕީ އާއި، ޕީޕީއެމާއި، ޖުމްހޫރީ ޕާޓީގެ އިތުރުން އަދާލަތު ޕާޓީ ގުޅިގެން މަސައްކަތް ކުރުމަށް އެއްބަސްވެފައި ވަނީ ހުކުރު ދުވަހު އެވެ. އެ އެއްބަސްވުމުގައި އެމްޑީޕީގެ ފަރާތުން ރައީސް ނަޝީދު ސޮއިކުރެއްވި އިރު، ޕީޕީއެމްގެ ފަރާތުން ސޮއިކުރެއްވީ ރައީސް މައުމޫނެވެ. ޖުމްހޫރީ ޕާޓީގެ ފަރާތުން އެ ޕާޓީގެ ލީޑަރު ގާސިމް އިބްރާހިމް އެއްބަސްވުމުގައި ސޮއިކުރެއްވި އިރު، އަދާލަތު ޕާޓީގެ ފަރާތުން ސޮއިކުރެއްވީ އެ ޕާޓީގެ ރައީސް ޝެއިޚް އިމްރާން އަބްދުﷲ އެވެ.

އެ އެއްބަސްވުމާ ގުޅޭ ގޮތުން ރައީސް ނަޝީދު ކުރެއްވި ޓްވީޓެއްގައި ވިދާޅުވީ ހުރިހާ ސިޔާސީ ފިކުރުތަކަށް ވެސް އެއްކޮށް މަސައްކަތްކުރެވޭނެ މާހައުލެއް ގާއިމްކުރުމަށް ކެނޑިނޭޅި މަސައްކަތް ކުރެއްވި ކަމަށެވެ. އަދި އެ އެއްބަސްވުމާއެކު ޑިމޮކްރަސީގެ އުސޫލްތަކާ ދިމާލަށް ރާއްޖެ އަނބުރާލުމުގެ ފުރުސަތު ލިބިގެންދާނެ ކަމަށް ރައީސް ނަޝީދު ވިދާޅުވި އެވެ. އެމަނިކުފާނު ވަނީ ހުރިހާ ފަރާތްތަކަށް އެކަމުގެ މަރުހަބާ ދަންނަވާފަ އެވެ.

އެއްބަސްވުމާ ގުޅޭ ގޮތުން ރައީސް މައުމޫން ކުރެއްވި ޓްވީޓެއްގައި ވިދާޅުވީ އެ އެއްބަސްވުމުގައި ސޮއިކުރެއްވީ މާތްﷲގެ ވާގިފުޅާއެކުު ގައުމު އިސްލާހު ކުރުމުގެ ހެޔޮ ނިޔަތުގައި ކަމަށެވެ.

އެ އެއްބަސްވުމުގައި ސޮއިކުރެއްވީ ގައުމު އިސްލާހު ކުރުމުގެ ހެޔޮ ނިޔަތުގައި ކަމަށް ރައީސް މައުމޫން ވިދާޅުވެފައިވާ އިރު، ރައީސް އަބްދުﷲ ޔާމީންގެ ޕީޕީއެމް ފެކްޝަނުގެ ސެކްރެޓަރީ ޖެނެރަލް އަދި ނިލަންދޫ ދާއިރާގެ މެންބަރު ޑރ. އަބްދުﷲ ޚަލީލް ވަނީ ރައީސް މައުމޫންގެ ނަންފުޅުގައި އެއްބަސްވުމުގައި ސޮއިކުރައްވާފައިވަނީ އެހެން ފަރާތެއް ކަމަށް ވިދާޅުވެފަ އެވެ. ޚަލީލް ވިދާޅުވީ "ފަނާކުރާ ފިކުރާ" އެކު ރައީސް މައުމޫން އެއްބަސްވުމުގައި ސޮއި ނުކުރައްވާނެ ކަމަށެވެ.

ރައީސް މައުމޫން އެ އެއްބަސްވުމުގައި ސޮއިކުރައްވާފައި ވަނިކޮށް، ރައީސް ޔާމީންގެ ޕީޕީއެމް ފެކްޝަނުގެ ނައިބު ރައީސް އަދި ފޮނަދޫ ދާއިރާގެ މެންބަރު އަބްދުއްރަހީމް އަބްދުﷲ ވަނީ ޕީޕީއެމްގެ ނަމުގައި އެއްވެސް އެއްބަސްވުމެއްގައި ސޮއިކުރެވޭނީ އެ ޕާޓީގެ ކައުންސިލުން ފާސްކޮށްގެން ކަމަށާއި އެހެންވެ އިދިކޮޅު ފަރާތްތަކާ އެކު ކޯލިޝަން އެއްބަސްވުމުގައި ޕީޕީއެމްގެ ރައީސް މައުމޫނަށް ސޮއިނުކުރެއްވޭނެ ކަމަށް ވިދާޅުވެފަ އެވެ.

އަބްދުއްރަހީމް އަށް ރައްދު ދެއްވައި، ރައީސް މައުމޫންގެ ދަރިކަނބަލުން އަދި ޕީޕީއެމް ކައުންސިލް މެންބަރު ޔުމްނާ މައުމޫން ވިދާޅުވީ ޕީޕީއެމްގެ އަސާސީ ގަވާއިދުގައިވާ ގޮތުން ޕާޓީ ހިންގުމުގެ ހުރިހާ ޒިންމާއެއް މެންބަރުން ހަވާލު ކުރައްވާފައި ވަނީ ޕާޓީގެ ރައީސްއާ ކަމަށެވެ.

ޔުމްނާ ވިދާޅުވީ ކައުންސިލުގައި މަޝްވަރާކޮށް، ޕާޓީގެ ރައީސް އަށް އިޚްތިޔާރު އަރުވާފައި ވާތީ ޕީޕީއެމްގެ ރައީސް މައުމޫނަށް އެއްބަސްވުމުގައި ސޮއިކުރެވޭނެ ކަމަށެވެ.

ހަތަރު ޕާޓީގެ ލީޑަރުން ހުކުރު ދުވަހު ސޮއިކުރެއްވި އެއްބަސްވުމުގައި ބުނެފައި ވަނީ ސިޔާސީ ޕާޓީތަކާއި ސިޔާސީ ހުރިހާ ފިކުރެއްގެ ފަރާތްތަކުގެ މެދުގައި ކުރެވޭ ބިނާކުރަނިވި މައުނަވީ މަޝްވަރާތަކެއްގެ މައްޗަށް ބިނާކޮށް މާތްވެގެންވާ އިސްލާމްދީނާއި ދިވެހިރާއްޖޭގެ މިނިވަން ކަމާއި ސިޔާދަތާއި ގައުމީއްޔަތު ހިމާޔަތްކޮށް ދިވެހިރާއްޖޭގެ ބިންބިމާއި ފަޅުފަޅާއި ގުދުރަތީ ވަސީލަތްތަކުގެ މިލްކުވެރިކަން ހިމާޔަތްކޮށް ސިޔާސީ ގޮތުން އުފެދިފައިވާ ނުތަނަވަސްކަން ހައްލެއް ހޯދައި ދިނުމަށް މަސައްކަތް ކުރާނެ ކަމަށެވެ.

ދިވެހިރައްޔިތުންގެ ކިބައިން ނިގުޅައިގަންނަމުން ގެންދާ މަދަނީ އަދި ސިޔާސީ ހައްގުތައް ރައްކާތެރިކޮށް ދިވެހިރާއްޖޭގައި ބާއްވާ އިންތިހާބުތަކަކީ މިނިވަން އިންސާފްވެރި އަދި ސިޔާސީ ޕާޓީތަކުން އިޙްތިޔާރު ކުރާ ކެންޑިޑޭޓުން ވާދަކުރެވޭ އިންތިހާބަކަށް ހަދާނެ ކަމަށް އެއްބަސްވުމުގައި ބުނެފައި ވެއެވެ.

މީގެ އިތުރުން ސިޔާސީ ސަބަބުތަކަށްޓަކައި ނުހައްގުން ހައްޔަރުކޮށް ތަހުގީގު ކުރަމުންދާ ނުވަތަ ދައުވާ އުފުލި ނުވަތަ ދައުވާ އުފުލުމުގެ މަގުމަތީގައިވާ މީހުންނާއި އަދި ހުކުމް ކޮށްފައިވާ މީހުން މިނިވަން ކުރުމަށް މަސައްކަތް ކުރުމަށް އެއްބަސްވެފައި ވެއެވެ.

ހަމައެހެންމެ، ސަރުކާރުގެ ތެރޭގައި ހިންގަމުން ގެންދާ ކޮރޮޕްޝަނާއި ވައްކަމުގެ އަމަލުތައް ހުއްޓުވައި ނުހައްގުން ނިގުޅައިގަނެފައިވާ މުއާމަލާތްތަކާއި ރައްޔިތުންގެ މުދާ އަލުން އިޔާދަކޮށް ގައުމު ބިނާ ކުރުމަށްޓަކައި އަދި ގައުމާއި ރައްޔިތުންގެ ތަަރައްގީ ގާއިމް ކުރުމުގެ ގޮތުން ދިވެހިރާއްޖެ އަށް ދެމެހެއްޓެނެވި ހަމަޖެހުން ހޯދުމަށް ގުޅިގެން މަސައްކަތް ކުރާނެ ކަމަށް އެއްބަސްވުމުގައި ބުނެފައި ވެއެވެ.

މީގެ އިތުރުން ސިޔާސީ ޕާޓީގެތަކުގެ ލީޑަރުންގެ މެދުގައި އެއްބަސް ވެވޭ ގޮތެއްގެ މަތިން ރައްޔިތުންގެ މަޖިލީހުގައްޔާއި ސިޔާސީ މަސްރަހުގައި އެކުގައި ގުޅިގެން މަސައްކަތް ކުރުުމަށް ހަތަރު ސިޔާސީ ލީޑަރުން ސޮއިކޮށް އެއްބަސްވެފައި ވެއެވެ.