ޔާމީނުގެ މަރަށް އިންސާފު ހޯދާދިނުމަކީ މުޅި ގައުމަށް މުހިއްމު ކަމެއް!

މިދިޔަ އޭޕްރީލް މަހުގެ 22 ވަނަ ދުވަހުގެ ރޭ އަނިޔާވެރިގޮތަކަށް މަރާލާފައިވާ ޔާމީން ރަޝީދުގެ މަރުގެ މައްސަލައިގައި އާއިލާއިން ފުލުހުންގެ އިދާރާއަށް ހުށަހެޅި 800 އަށް ވުރެ ގިނަ ސިޓީތައް އަލުން ބަލައިގަނެ، ރައްޔިތުންނާއި ފުލުހުންނާއި މެދު އޮންނަންޖެހޭ ގާތް ގުޅުން ދެމެހެއްޓުމަށް ޓްރާންސްޕޭރެންސީ މޯލްޑިވްސް އަދި މޯލްޑިވްސް ޑިމޮކްރެޓިކް ނެޓްވޯކުން ގޮވާލައްވައިފި އެވެ.

ޓްރާންސްޕޭރެންސީ މޯލްޑިވްސް އަދި މޯލްޑިވްސް ޑިމޮކްރެޓިކް ނެޓްވޯކުން ގުޅިގެން ނެރިފައިވާ ނޫސްބަޔާނުގައިވަނީ ޔާމީނުގެ އައިލާއިން ފުލުހުންނަށް ހުށަހެޅި 800 އަށް ވުރެ ގިނަ ސިޓީ ބަލައިނުގަތުމުން އެކަމާ ކަންބޮޑުވުން ފާޅުކޮށްފަ އެވެ.

ޔާމީން ރަޝީދަށް އިންސާފު ހޯދައިދިނުމުގެ މަސައްކަތަކީ މިއަދު މުޅި ގައުމަށްވެސް މުހިއްމު ކަމެއް ކަމަށާއި މި ވިސްނުމަށް އިހުތިރާމުކުރުމަށް ބަޔާނުގައި ގޮވާލާފައިވެއެވެ.

މި ސިޓީތައް ހުށަހެޅުމުގެ ބޭނުމަކީ ފުލުހުންގެ މުއައްސަސާއަށް އުނދަގޫކޮށް، މަސައްކަތައް ދަތިކުރުން ނޫން ކަމަށާއި މިފަދަ މައްސަލަތަކުގެ ސަބަބުން ރައްޔިތުންގެ ކަންބޮޑުވުން ފާޅުކުރުން ކަމަށެވެ. އަދި މީގެ ކުރިން ހިނގާފައިވާ މިފަދަ ހާދިސާތަކުގައި މިއަދާ ހަމައަށްވެސް އިންސާފު ހޯދާދެވިފައިނުވުން ކަމަށް މި ބަޔާނުގައި ބުނެ އެވެ. އެގޮތުން ރައްޔިތުންގެ މަޖިލީހުގެ އުނގޫފާރު ދާއިރާގެ ކުރީގެ މެމްބަރު ޑރ.އަފްރާޝީމް އަލީ މަރާލުމުގެ މައްސަލައާއި، މިނިވަން ނޫހުގެ ނޫސްވެރިޔާ އަދި ޔާމީން ރަޝީދުގެ އެންމެ ގާތް އެކުވެރިޔާ އަހުމަދު ރިލްވާން ވަގަށްނެގި މައްސަލައަށް މިއަދާ ހަމައަށް އައިއިރުވެސް އިންސާފު ނުލިބޭ ކަމަށް ޓްރާންސްޕޭރެންސީ މޯލްޑިވްސް އަދި މޯލްޑިވްސް ޑިމޮކްރެޓިކް ނެޓްވޯކުން ގުޅިގެން ނެރުނު ބަޔާނުގައި ބަޔާންކޮށްފައިވެ އެވެ.

ކަންމިހެން ހުރި އިރު، ޔާމީން ރަޝީދުގެ މައްސަލައަކީވެސް ދިގު ދެމިގެންދާ، އިންސާފު ލިބުމުގެ އެއްވެސް ކޮޅެއް މެދެއް ފެންނަން ނެތް މައްސަލައަކަށް ވިޔަ ނުދިނުމަށްޓަކައި ޔާމީންގެ އާއިލާގެ ފަރާތުން ކުރާ މަސައްކަތަށް އެއްވެސް ވަރެއްގެ އިޖާބައެއް ނުދިނުމަކީ ރައްޔިތުންގެ ކުރިމަތީގައި ފުލުހުންގެ މުއައްސަސާގެ އަގު ވެއްޓިގެންދާނަ ކަމަށް މި ބަޔާނުގައި ބުނެ އެވެ.

އަދި މިކަމުގެ ސަބަބުން ރައްޔިތުންގެ ހައްގުގައި އިހްލާސްތެރި މަސައްކަތްކުރާ މުއައްސަސާއެއްކަމާމެދު ޝައްކު އުފެދިގެންދާނެ ކަމަށް މި ބަޔާނުގައި ބުނެ އެވެ.