ރާއްޖެއަށް މިހާރު ކުރިމަތިވެފައިވާ މައްސަލަތަކުގެ މައިގަނޑު އަސްލު ފެށިފައި ވަނީ ރައްޔިތުންގެ މަޖިލީހުން ކަމަށް، އެމްޑީޕީގެ ޕާލިމެންޓަރީ ގްރޫޕްގެ ލީޑަރު އިބްރާހިމް މުހައްމަދު ސޯލިހް ވިދާޅުވެއްޖެ އެވެ.
މިހާރު ކުރިއަށްދާ ގުޅިފައިވާ ޕާޓީތަކުގެ ޕްރެސް ކޮންފަރެންސްގައި، ހިންނަވަރު ދާއިރާގެ މެމްބަރު އިބްރާހިމް މުހައްމަދު ސޯލިހް ވިދާޅުވީ މަޖިލީހުގެ ރިޔާސަތުން ގާނޫނުތަކާއި ގަވާއިދުތަކަށް ގެނެސްފައިވާ ބަދަލުގެ ސަބަބުން ސަރުކާރު ޖަވާބުދާރީކުރުމުގެ މަސައްކަތް ހުއްޓިފައިވާ ކަމަށެވެ.
މާލިއްޔަތު ގާނޫނަށް ކުއްލިއަކަށް ގެނައި ބަދަލުގެ ސަބަބުން ސަރުކާރުން މަޖިލީހަށް ޖަވާބު ދާރީވުން ވަނީ ހުއްޓުމަށް އައިސްފައި ކަމަށާއި އެކަމުގެ ސަބަބުން ރައްޔިތުންނަށް ނޭނގި ސަރުކާރުން ބޭނުންވާ ބަޔަކަށް ސުވޮރިން ގެރެންޓް ދެވޭ ކަމަށާއި އެއްވެ އުޅުމުގެ ހައްގު ވަނީ ހަނިކޮށްފައިވާ ކަމަށެވެ.
"ގައުމަށް ކުރިމަތިވެފައިވާ މައްސަލަތަކުގެ މައިގަނޑު މައްސަލަ ފެށިފައި ވަނީ މަޖިލީހުން،" އޭނާ ވިދާޅުވި އެވެ.
ޖުމްހޫރީ ޕާޓީގެ ޕާލިމެންޓަރީ ގްރޫޕްގެ ޑެޕިއުޓީ ލީޑަރު، ކިނބިދޫ ދާއިރާގެ މެމްބަރު އަބްދުﷲ ރިޔާޒު ވިދާޅުވީ މަޖިލިސް ހިންގަމުން ދަނީ ވަރަށް ހުދުމުޚްތާރުކޮށް ކަމަށާއި ސަރުކާރު ޒިންމާދާރުކުރުމުގެ އެއްވެސް މަސައްކަތެއް ރައްޔިތުންގެ މަޖިލީހުން ނުގެންދެވޭ ކަމަށެވެ.
"މިހާރުގެ ސްޕީކަރާ މެދު ހިތްހަމަ ނުޖެހޭ މައިގަނޑު ސަބަބަކީ މިއީ،" ރިޔާޒު ވިދާޅުވި އެވެ.
މަސީހުގެ އިތުބާރު ނެތް ކަމުގެ މައްސަލަ ހުށަހެޅީ އަނިޔާވެރިކޮށް ކަންކުރުން ހުއްޓުވުމަށް ކަމަށް ވެސް އޭނާ ވިދާޅުވި އެވެ.
ފައިސާ ދީގެން ވެސް، ނުފޫޒު ބޭނުންކޮށްގެން ވެސް ދިވެހި ބިން ވިއްކުމަކީ ގަބޫލު ކުރެވޭ ކަމެއް ނޫން ކަމަށާއި، މަޖިލިސް ވެފައި ވަނީ ސަރުކާރުގެ ރަބާ ސްޓޭމްޕަށް ކަމަށް އޭނާ ވިދާޅުވި އެވެ.
"މަޖިލީހުގެ ސްޕީކަރު ބަދަލުކުރުމަކީ ހުރިހާ މެމްބަރުންނަށް ލާޒިމު ކަމެއް،" އޭނާ ވިދާޅުވި އެވެ.
ދިއްގަރު ދާއިރާގެ މެމްބަރު އަހްމަދު ފާރިސް ވިދާޅުވީ ރައްޔިތުންގެ މަޖިލީހުގެ ދައުރު އަދާ ނުކުރެވޭ ކަމަށާއި ވަކިވަކި މެމްބަރުންނަށް ހުވައާ އެއްގޮތަށް މަސައްކަތް ނުކުރެވޭ ކަމަށެވެ. މަޖިލީހުގެ މެމްބަރުންގެ ދައުރު ފުރިހަމައަށް އަދާކުރުމަށްޓަކައި، މަސީހް މަގާމުން ދުރުކުރަން ޖެހޭ ކަމަށް އޭނާ ވިދާޅުވި އެވެ.
މަޖިލީހުގެ ކަންކަން ހަމައަކަށް އެޅުވުމަށް ޕީޕީއެމްގެ ޕާލިމެންޓްރީ ގްރޫޕްގައި މަސައްކަތް ކުރެއްވި ކަމަށާއި ނަމަވެސް އެކަން ކާމިޔާބު ނުވި ކަމަށެވެ. އަދި ކައުންސިލްގެ ތެރެއިން ވެސް އިސްލާހުތައް ނުގެނެވޭނެ ކަމަށް އޭނާ ވިދާޅުވި އެވެ.
މަސީހު މަގާމުން ވަކިކުރުމަށްޓަކައި ޕީޕީއެމްގެ މެމްބަރުންގެ ބޮޑު އަޣުލަބިއްޔަތެއް ލިބޭނެ ކަމަށް ވެސް އޭނާ ވިދާޅުވި އެވެ.
"މިއީ ވަރަށް އުފާވެރި ވަގުތެއް،" ފާރިސް ވިދާޅުވި އެވެ.
މަކުނުދޫ ދާއިރާގެ މެމްބަރު އަނާރާ ނައީމް ވިދާޅުވީ "އިސްލާހުކުރަންޖެހޭ ހުރިހާ ކަމެއް އިސްލާހުވެގެން ދިއުން އެދޭ ކަމަށާއި ގައުމަށް އަބަދުވެސް މަންފާއާއި ފާގަތިކަން ލިބިގެން ދިއުމަށް ވެސް އެދޭ ކަމަށެވެ.
ނޫސްވެރިންގެ ސުވާލުތަކަށް ޖަވާބު ދެއްވަމުން އިބްރާހިމް މުހައްމަދު ސޯލިހް ވިދާޅުވީ ބިން ވިއްކޭ ގޮތަށް ގާނޫނު އަސާސީއަށް ގެނައި އިސްލާހު ބަދަލުކުރުވާނެ ކަމަށާއި ސަރުކާރު ޖަވާބުދާރީ ނުކުރެވޭ ގޮތަށް ގާނޫނަށް ގެނެސްފައިވާ ބަދަލުތަކާއި ރައްޔިތުންގެ ހައްގުތައް ގެއްލޭ ގޮތަށް ގެނެސްފައިވާ ބަދަލުތައް ވެސް އިސްލާހުކޮށް ހައްގުތައް އަނބުރައި ހޯދައިދޭނެ ކަމަށެވެ.
މިކަންކަން ކާމިޔާބުވަންދެން ހުރިހާ ޕާޓީތަކެއް ތިބޭނީ ގުޅިގެން އެކުގައި ކަމަށް ވެސް އޭނާ ވިދާޅުވި އެވެ.
ތަފްސީލް އަންނަނީ
