ސްރީލަންކާ އަދި އިންޑިއާއަށް ފޮނުވި ކެއަރޕެކޭޖްތަކުގެ ބޮޑުބައި ހަވާލުކޮށް ނިމިއްޖެ
ބުދަ ދުވަހުގެ ނިޔަލަށް ލަންކާއަށް ފޮނުވި 622 ޕެކޭޖްގެ ތެރެއިން 560 އަށްވުރެ ގިނަ ޕެކޭޖް އާއިލާތަކަށް ރައްދުކޮށްދީފައިވޭ
ބޭރުގައުމުތަކުގައި ތިބި ދިވެހިންނަށް ކެއަޕެކޭޖް ފޮނުވަން ހުޅުވާލި ފުރުސަތުގައި އެޕެކޭޖުތައް ހަވާލުކުރުމަށް ބަޔަކު ގޮސްތިބި މަންޒަރު
ކޮވިޑް-19 އާ ގުޅިގެން މިސަރަހައްދުގެ ބައެއް ޤައުމުތަކުން އަޅާފައިވާ ރައްކާތެރިކަމުގެ ފިޔަވަޅުތަކާ ގުޅިގެން، ޒަރޫރީ ބައެއް ތަކެތި ހޯދުމަށް ދަތިވެފައިވާ ދިވެހި އާއިލާތަކަށް އެހީތެރިވެދިނުމަށް ސަރުކާރުން ފެށި ކެއަރ ޕެކޭޖް ފޮނުވުމުގެ އިންތިޒާމްތަކުގެ ދަށުން، ސްރީލަންކާ އަދި އިންޑިއާގެ ޓްރިވެންޑްރަމްއާއި ކޮޗިންއަށް ފޮނުވި ކެއަރޕެކޭޖްތަކުގެ ބޮޑު ބައި އާއިލާތަކާ ހަވާލުކޮށް ނިމިއްޖެއެވެ.
މިކަމާއި ގުޅިގެން ފޮރިން މިނިސްޓްރީން ބުނީ ބުދަ ދުވަހުގެ ނިޔަލަށް ލަންކާއަށް ފޮނުވި 622 ޕެކޭޖްގެ ތެރެއިން 560 އަށްވުރެ ގިނަ ޕެކޭޖް އާއިލާތަކަށް ރައްދުކޮށްދީފައިވާކަމަށެވެ. އަދި ބާކީ ހުރީ ލަންކާއަށް ޕެކޭޖްތައް ފޮނުވި ފަހުން، އެޕެކޭޖާއި ހަވާލުވާން ޖެހޭ އާއިލާ މާލެއަށް އައިސްފައިވާ ޕެކޭޖްތަކާއި، ހައިކޮމިޝަނުން ގުޅަން މަސައްކަތްކޮށްގެން ނުގުޅުނު އާއިލާތަކާ ހަވާލުކުރަން ޖެހޭ ބައެއް ޕެކޭޖްތައް ކަމަށެވެ.
ފޮރިން މިނިސްޓްރީން ބުނީ ސްރީލަންކާގައި ކޮވިޑް-19 އިން ރައްކާތެރިވުމުގެ ގޮތުން އަޅާފައިވާ ފިޔަވަޅުތަކުގެ އެގައުމުގެ އެކި ސަރަހައްދުތަކުގައި ފުލުހުން ޗެކް ޕޮއިންޓްތައް ގާއިމްކޮށްފައިވާކަމަށެވެ. އަދި ޕެކޭޖްތައް ގެންދާ ވެހިކަލްތައް މިއިން ކޮންމެ ޗެކް ޕޮއިންޓެއް ކައިރިއަށް މަޑުކޮށް، މުޅި ވެހިކަލް ޗެކް ކުރަން ޖެހޭ ކަމަށާއި އެހެންކަމުން ލޮކްޑައުންގެ ޙާލަތުގައި އޮތް ސިޓީއެއްގައި މި ޚިދުމަތް ދިނުމުގައި އުއްމީދުކުރި ވަރަށް ވުރެ ގިނަ ގޮންޖެހުންތަކާ ކުރިމަތިލާން ޖެހުނު ކަމަށެވެ. ހަމައެއާއިއެކު ބައެއް ޕެކޭޖްތައް ގެންދަން ޖެހޭ ގެތަކަކަކީ ހަނި މަގުތަކާ ގޯޅިތަކުގައި ހުންނަ ގެތައް ކަމުން، އެތަކެތި ގޭގެއަށް ފޯރުކޮށްދިނުމުގައި އިތުރު ގޮންޖެހުންތަކާ ކުރިމަތިލާން ޖެހުނު ކަމަށް ފޮރިން މިނިސްޓްރީން ބުންޏެވެ.
ފޮރިން މިނިސްޓްރީން ބުނީ އިންޑިއާގެ ޓްރިވެންޑްރަމް އަށް ފޮނުވި 79 ޕެޖޭކްގެ ތެރެއިން ބުދަދުވަހާއި ހަމަޔަށް ޑެލިވަރ ނުކުރެވި ހުރީ 2 ޕެކޭޖު ކަމަށެވެ. އަދި ޓްރިވެންޑްރަމްއަށް ދިޔަ ފްލައިޓްގައި އެސިޓީއަށް ފޮނުވި 79 ޕެކޭޖްގެ އިތުރުން ކޮޗިންގައި ތިބި އާއިލާތަކަށް 65 ޕެކޭޖް ފޮނުވާފައިވާކަމަށެވެ. ފޮރިން މިނިސްޓްރީން ބުނީ ކޮޗިންއަށް ފޮނުވި ޕެކޭޖްތައް ޓްރިވެންޑްރަމްއިން ކޮޗިންއަށް ގެންދިޔުމަށް ބޭނުންވާ ހުއްދަތައް ހޯދައިގެން، ޓްރިވެންޑްރަމްގައި ހުންނަ ދިވެހިރާއްޖޭގެ ކޮންސިއުލޭޓް ޖެނެރަލްއިން ވަނީ މިހާރު އެތަކެތި ކޮޗިންއަށް ގެންގޮސްފައި ކަމަށާއި އިންޑިއާގެ ކެރެލާ ސްޓޭޓްވެސް އޮތީ ލޮކްޑައުންގައި ކަމުން ޓްރިވެންޑްރަމްގައި ދިރިއުޅޭ ދިވެހި އާއިލާތަކަށް ގެންދިޔަ ޕެކޭޖްތައްވެސް ގޭގެއަށް ގެންގޮސްފައިވަނީ އެކަމަށް ބޭނުންވާ ޚާއްސަ ހުއްދައެއް ނަގައިގެން ކަމަށް ފޮރިން މިނިސްޓްރީން މައުލޫމާތުދެއެވެ.
މީގެއިތުރުން، މެލޭޝިއާގެ ވެރިރަށް ކުއާލަލަމްޕޫރުގައި ދިރުއުޅޭ ދިވެހި އާއިލާތަކަށް ފޮނުވި 452 ކެއަރޕެކޭޖްތަކުގެ ތެރެއިން 250 ޕެކޭޖް އާއިލާތަކާ ހަވާލުކޮށްފައިވާކަމަށް ބާކީ ހުރި 202 ޕެކޭޖް ހަވާލުކުރުމުގެ މަސައްކަތް ހައިކޮމިޝަނުން ކުރަމުންދާ ކަމަށް ފޮރިން މިނިސްޓްރީން ބުންޏެވެ.
ދަތިތަކާއެކުވެސް ސަރުކާރުން ދަނީ ލަންކާއަށާ އިންޑިއާ އަދި މެލޭޝިއާއަށް ފޮނުވި ކެއަރޕެކޭޖްތައް ވީއެންމެ އަވަހަށް އާއިލާތަކަށް ރައްދުކުރުމަށް މަސައްކަތްކުރަމުންދާ ކަމަށް މިނިސްޓްރީން ބުންޏެވެ.
