މާލެއިން ކޮވިޑް-19 އަށް ޕޮޒިޓިވްވީ މީހާއަށް ބަލި ޖެހިފައިވަނީ ކޮމިއުނިޓީ ޓްރާންސްމިޝަން އެއްކަމަށް ބެލެވޭ ކަމަށް ޑރ. އަލީ ލަތީފު ވިދާޅުވެއްޖެ އެވެ.

އެންއީއޯސީގައި ބޭއްވި ނޫސްވެރިންގެ ބައްދަލުވުމުގައި ޑރ. އަލީ ލަތީފް ވިދާޅުވީ، މިހާތަނަށް ބެލި ބެލުމުން އެނގެނީ އެއީ ކޮމިއުނިޓީ ޓްރާންސްމިޝަން އެއް ކަމަށެވެ. ޑރ. ވިދާޅުވީ، ޕޮޒިޓިވްި މީހުންނާ ގުޅުންހުރި މީހުންގެ ކޮންޓެކްޓް ޓްރޭސިން ހެދުމަށް ފަހު އެކަމާއި ބެހޭ ތަފްސީލު ފަހުން ހާމަކުރައްވާނެ ކަމަށެވެ.

ކޮމިއުނިޓީ ޓްރާންމިޝަން އަކީ، ކޮވިޑް-19 ކޭސްއަކާއި ގުޅުން ނެތް އެއްވެސް މީހަކު ބައްޔަށް ޕޮޒިޓިވްވުމެވެ. ކޭސް އެއް ފެނުމަކީ ބިރުވެރިކަމެއްގެ ގޮތުގައި ސިފަކުރައްވަމުން ޑރ. އަލީ ލަތީފް ވިދާޅުވީ، ބައްޔަކީ އެއްވެސް ހާލަތެއްގައި އާދައިގެ ރޯގާއެއް ކަމަށް ބަލައިގެން ނުވާނެ ކަމަށެވެ. އަދި ބައްޔާއި މެދު ހޭލުންތެރި ކުރުމުގެ ގޮތުން މީޑިއާތަކުންނާއި އެހެނިހެން ވަސީލަތްތައް މެދުވެރިކޮށް މައުލޫމާތު ފޯރުކޮށްދެމުން ދާއިރު ބައެއް ފަރާތްތަކަށް ބަލީގެ ސީރިއަސްކަން ނޭނގޭކަމަށާއި، އަދިވެސް ގައިދުރުކަމަށް ބެލުމެއް ނެތި މަގުމަތީގައި މީހުން އުޅެމުންދާތަން ފެންނަމުންދާ ކަމަށެވެ.

ކޮވިޑް-19 އަކީ އަދި މިހާތަނަށް ފަރުވާ ހޯދިފައިވާ ބައްޔަކަށް ނުވާއިރު، ބަލިން ސަލާމަތްވުމަށް އެންމެ ރައްކާތެރި ގޮތަކަީ ގޭގައި މަޑުކުރުންކަން ޑރ. ލަތީފް ފާހަގަކުރެއްވިއެވެ. އޭނާ ވިދާޅުވީ، 14 ދުވަހުގެ ކަރަންޓީނުގެ މުއްދަތު ފުރިހަމަ ކުރުމަށް ފަހު މީހުން ޓެސްޓު ކުރަނީ ކަރަންޓީން ނިންމާފައި އަންނަ މީހެއްގެ ފަރާތުން ބަލި ނުފެތުރޭނެ ކަމުގެ ޔަގީން ކުރުމުގެ ގޮތުން ކަމަށެވެ.

ޑރ. ލަތީފް ވިދާޅުވީ، މިހާތަނަށް އަޅާފައިވާ ފިޔަވަޅުތަކުން ''ކޮމިއުނިޓީ ސްޕްރެޑް ޓްރާންމިޝަން'' ކުޑަކުރެވިފައި އޮތް ކަމަށް ގަބޫލްކުރައްވާ ކަމަށެވެ.

ޑރ. ވިދާޅުވި ގޮތުގައި ރާއްޖޭގައި ކޮމިއުނިޓީ ޓްރާންމިޝަންއެއް ހިނގާފައިވަނީ އެއްވެސް އަލާމާތެއް ނެތް މީހެއްގެ ސަބަބުން ކަމަށްވުން އެކަށީގެންވާ ކަމަށެވެ. ބުދަ ދުވަހުން ފެށިގެން 24 ގަޑިއިރަށް މާލެ ލޮކްޑައުން ކޮށްފައިވާއިރު، ޑރ. ލަތީފް ވިދާޅުވީ ލޮކްޑައުން ކުރީ ކޮންޓެކްޓް ޓްރޭސީންގެ އިތުރުން އެހެނިހެން ފިޔަވަޅުތައް އެޅުމުގެ މަގްސަދުގައި ކަމަށެވެ.

ޕްރެސްކޮންފަރެންސްގައި ވާހަކަ ދައްކަވަމުން ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ މެޑިކަލް އޮފިސަރު ޑރ. ނަޒްލާ ރަފީގް ވިދާޅުވީ، ދިވެހި މީހާ ޕޮޒިޓިވްވުމާއި ގުޅިގެން ދެ ކަމެއް ކުރިޔަށްދާ ކަމަށެވެ. އެގޮތުން ބަލި ޖެހުނު މީހާ އަށް ބަލި ޖެހުނު ދެ ދުވަސް ކުރިން ކްލޯޒް ކޮންޓެކްޓްވެފައި ތިބި މީހުން ހޯދުމުގެ މަަސައްކަތް ކުރިޔަށްދާ ކަމަށެވެ. އެގޮތުން މިހާތަނަށް އެ މީހާއާ ގުޅުން ހުރި 54 މީހެއްގެ ކޮންޓެކްްޓް ހޯދިފައިވާ ކަމަށެވެ. އަދި އިތުރު މީހުން ހޯދައި އެކަހެރި ކުރުމުގެ މަސައްކަތް ކުރިޔަށްދާކަން ނަޒްލާ ފާހަގަކުރެއްވިއެވެ.