ކޮވިޑް-19 ޓާސްކް ފޯސްގެ ބައްދަލުވުމެއް ކުރިއަށްދަނިކޮށް މާރާމާރި ހިންގި ބަޔަކު ހައްޔަރުކޮށްފި
މައްސަލާގައި ހައްޔަރުކުރީ 25 އަދި 28 އަހަރުގެ ފިރިހެނެއް
ށ. ފީވަށް
ށ. ފީވަކު ކޮވިޑް-19 ޓާސްކް ފޯސްގެ ބައްދަލުވުމެއް ކުރިއަށްދަނިކޮށް މާރާމާރި ހިންގި ބަޔަކު ހައްޔަރުކޮށްފިއެވެ.
ފުލުހުން ބުނީ 13 އޭޕްރީލް 2020 ވަނަ ދުވަހުގެ ރޭ ފީވަކު ސުކޫލްގައި ކޮވިޑް-19 ގެ ރަށު ޓާސްކްފޯސްގެ ބައްދަލުވުން ކުރިއަށްދަނިކޮށް އެތަނުގެ ތެރެއަށް ބަޔަކުވަދެ، މާރާމަރި ހިންގަމުންދާކަމުގެ މައުލޫމާތު ލިބިގެން ފުލުހުން ދިޔުމުން ފުލުހުންގެެ ވާޖިބަށް ހުރަސްއަޅާ ހަމަނުޖެހުން ހިންގާފައިވާ ކަމަށެވެ. އަދި އެ މައްސަލާގައި އުމުރުން 25 އަހަރުގެ ފިރިހެނަކު ހައްޔަރުކޮށްފައިވާ ކަމަށާއި އަދި ކޯޓު އަމުރެއްގެ ދަށުން އުމުރުން 28 އަހަރުގެ ފިރިހެނަކު ވެސް ހައްޔަރުކޮށްފައިވާ ކަމަށް ފުލުހުން ބުނެއެވެ.
ފުލުހުން ބުނީ އެ މީހުންގެ ބަންދާ މެދުގޮތެއް ނިންމުމަށް ށ. މިލަންދޫ މެޖިސްޓްރޭޓް ކޯޓަށް ހާޒިރުކުރުމުން އުމުރުން 25 އަހަރުގެ މީހާގެ ބަންދަށް 7 ދުވަސް އަދި އުމުރުން 28 އަހަރުގެ މީހާގެ ބަންދަށް 5 ދުވަސް ޖަހާދީފައިވާކަމަށެވެ.
ފުލުހުން ބުނީ އެ މައްސަލަ އިތުރަށް ތަހުޤީޤްކުރަމުންދާ ކަމަށެވެ.
