ބަހުގެ ކުރިއެރުމަށްޓަކައި ކުރަންވީ ކަމަކީ ދިވެހިބަހުން ގިނަގިނައިން ވާހަކަ ދެއްކުން: މިނިސްޓަރ

ބަހުގެ ކުރިއެރުމަށްޓަކައި ކުރަންވީ ކަމަކީ ދިވެހިބަހުން ގިނައިން ވާހަކަދެއްކުން ކަމަށް މިނިސްޓްރީ އޮފް އާރްޓްސް، ކަލްޗަރ އެންޑް ހެރިޓޭޖް ޔުމްނާ މައުމޫނު ވިދާޅުވެއްޖެއެވެ.

ދިވެހި ބަހުގެ ދުވަހާއި ގުޅިގެން މިނިސްޓަރ ދެއްވި ޚާއްސަ މެސެޖެއްގައި ވިދާޅުވީ މިހާރު ދުނިޔޭގެ އެކި ކަންކޮޅުތަކުގައި ފެތުރެމުންދާ ކޮވިޑް-19 އާއި ގުޅިގެން ދުނިޔޭގެ އެކި ކަންކޮޅުތަކުގައި ދަތުރުފަތުރު ހުއްޓާލައި، ވީހާވެސް ގިނަ ވަގުތު ގޭގައި ހޭދަކުރުމަށް އަންގަމުންދާއިރު، ސަމާލުކަންދޭންޖެހޭ ކަންކަން އެބަހުރި ކަމަށެވެ. އެގޮތުން މި ދުވަސްވަރު ގޭގައި ތިބޭއިރު، ލިބޭ ހުސްވަގުތުތަކުގައި ދިވެހިބަހުން ލިޔެފައިވާ ލިޔުންތަކާއި ފޮތްތައް ކިއުމާއި، ދިވެހިބަހުން އުފެއްދުންދުންތެރި ލިޔުންތައް ލިޔުމަށް އާދަ ކުރެވިދާނެ ކަމަށް މިނިސްޓަރ ވިދާޅުވެފައިވެއެވެ.

ގޭގައި މަޑުކުރާއިރު ލިބޭ ހުސްވަގުތުގައި ދަރިންނާވެސް ދިވެހިބަހުން ވާހަކަދެއްކުމާއި، ދިވެހިބަހުން ޝުއޫރު ފާޅު ކުރަން ދަރިންނަށް ހިތްވަރު ދިނުމަށް މިނިސްޓަރުގެ މެސެޖުގައި ގޮވާލާއްވާފައިވެއެވެ.

އޭގެއިތުރުން، ޅަފަތުގައި މާދަރީބަހަށް އަހުލުވެރިވާ ކުދިންގެ ވިސްނުން ތޫނުކަން ފާހަގަކުރައްވައި މިނިސްޓަރ ވިދާޅުވީ، އޭގެ ސަބަބުން ދެވަނަ ބަހެއް ދަސްކުރަންވެސް އެފަދަ ކުދިންނަށް ފަސޭހަވެގެންދާ ކަމަށެވެ. ވުމާއެކު ގޭގައި މަޑުކުރާ ވަގުތުގައި ކުދިންނާ ދިވެހި ބަހުން މުޢާމަލާތު ކުރުމާއި، ބަހަށް އަހުލުވެރި ކުރުވުމަށް މިނިސްޓަރ ވަނީ ގޮވާލައްވާފައެވެ.

މިނިސްޓަރ އިތުރަށް ވިދާޅުވީ، ކޮވިޑް-19 ގެ މައުލޫމާތު ރައްޔިތުންނަށް ފަސޭހައިން ވިސްނޭ ގޮތަކަށް ފެތުރުމުގައި މުހިންމީ މާދަރީ ބަހުން މަޢުލޫމާތު ދިނުން ކަމަށެވެ.